Read Hmar JEREMIA 15 Bible Online

JEREMIA 15 - Hmar bible

JEREMIA 15

¹Chun, LALPA chun ka kuomah, “Mosie le Samuel chu ka hmaah ngîr ta hai sienla khawm, ka lungril chu hi hnam tienga hin ân hêm thei nawh; ka mithmua inthawkin hnawt suok la, anni chu infe suoktir rawh.

²Chun, i kuoma chun, ‘Khawtieng am kan fe ding a na?’ an ti pha chun anni chu hi hi hril i tih: ‘LALPA chun hieng hin a tih: Thina ta dinghai chu thinaah, kâwlhnâm ta dinghai chu kâwlhnâmah; ṭâmna ta dinghai chu ṭâmnaah; sala intângna ta dinghai chu salah,’ tîng i tih.

³Chun, an chunga tlung dingin thil chi li ruot ka ta; LALPA chun a tih: kâwlhnâm chu sukhlum dingin, uihai chu keinawitu dingin, chun, chunglêng vatehai le hnuoia ramsahai chu fa zotu ding le suksetu dingin.

⁴Chun, anni chu, Juda lal Hezekia naupa Manasse Jerusalema a thilthawhai lei khan, hnuoi chunga lalram po pohai laia chun hmatieng hnungtienga hnawtlêng dingin inumtir ka tih.

⁵Aw Jerusalem, tuin am i chungah lunginsietna nei a ta? Tuin am an sûn ding che a ni leh? Annawleh, i hamṭhatna ding thu hni dingin tu am hnungkîr an ta?

⁶Nang chun i mi lo hnâwl ta a, LALPA chun a tih: hnungtieng i lo fe ta a; chuleiin, i chungah ka kut kân let a, ka suksiet che a nih; lunginsietna inlangtir hi ka nghawk ta a nih.

⁷Chu ram dai kawtkhârahai chun anni chu hmaizâpin ka zâp a; an nauhai chu ka lâk hmangpêk tâwl a; ka mihai chu ka suksiet ta a; an lampuihaia inthawk chun an lamlêt chuong nawh.

⁸Tuisuorieta phaiphin nêk hmanin an hmeithaihai chu ka sukpung lem a, sûn changlai chun nuhai le tlangvâlhai chunga chun suksetu ka hung intlungtir a, amânu chunga chun ṭitnahai le lunginzîngnahai kân tlâktir thut a.

⁹Nau pasari neitunu chu a chau ta a, a chau let dêr a; sûn a ni lai chun a nisa chu a tla ta a; ama chu ân zakin a hamhai a; chun, anni a la mahlahai chu an hmêlmahai kuomah kâwlhnâmah pêng ka tih,” LALPA chun a tih.

¹⁰Nu, ka chung a va rik de! hnuoi chung po poa insêl mi le inkhing mia i mi lo nei hi chu! a pung umin kân pûktir ngai naw a, kei khawm tukhawma a pung umin an mîn pûktir bawk nawh; amiruokchu, an rêng elin ṭawngsie an mi lân phur ta rawp hi.

¹¹LALPA chun, “Titakzetin, thil ṭhaa dingin sukdet ka ti che a; titakzetin, tuor lai huna le thil ṭha naw hung tlung huna chun i hmêlmahai chun i kuoma hnina siem dingin inumtir ka tih,” a tih.

¹²Miin thîr, hmârtienga thîr le dârsen chu a sukthliek thei ding am a nih?

¹³I ramrihai po poa chun, i suolhai po poa ding chun, i thuomhnaw le i rohai chu man boa râllâk sum dingin pêng ka tih.

¹⁴Chun, i hmêlmahai le ram i hriet ngai nawa chun infetir ka ti che a, ka lunginsen chun mei chu sêm a na, i chungah chawk kumkhuong a tih.

¹⁵Aw LALPA, nang chun i hriet a; mi hre zing la, mi hung sir la, a mi hremtuhai chu phuba hung la rawh; i teireingaitheina chun mi la hmang naw la, nangma lei chun kâwkna ka tuor a ni ti hre rawh.

¹⁶I thuhai chu hmu suok a ni ta a; chuong chu ka fâk a; chuongchun, i thuhai chu ka lungrila hlimna le, ka ta dinga lâwmna a nih; Aw LALPA sipaihai Pathien, i hming chawia ko ka ni si a.

¹⁷Hlimna siema inkhâwmhai laia chun ka ṭhung naw a, ka hlim bawk naw a; i kut lei chun makhât chauin ka ṭhung a; lunginzîngna nasatak chun i mi suksip ta si a.

¹⁸Iengleiin am ka natna hi a re hlek naw a, sukdam nuom dêr lo ang ela ka hliemna hi sukdam thei lova um am an ni a? Ka ta ding hin vadungte hlêmhmang, tuihai kang hlak ang chu in ni tak tak ding am a nih?

¹⁹Chuleichun, LALPA chun hieng hin a tih: I hung kîr chun, ka hmaa i ngîr theina dingin hung ṭhuoi nâwk ka ti che; mi suolhaia inthawka thil hluhai i lâk suok chun, ka bau ang nîng i ta; anni chu i kuomah hung kîr an ta, nang ruok chu an kuom tieng kîr naw ti nih.

²⁰Chun, hi hnam ta ding hin dârsen bang kulah siem ka ti che a; nang chu hung do hlak an ti che a, nisienlakhawm, hne ngai naw ni hai che; sandam ding le sansuok ding chein i kuomah ka um zing si a, LALPA chun a tih.

²¹Mi rilohai kuta inthawk chun sansuok ka ti che a, thil ṭium kuta inthawk chun intlansuok bawk ka ti che.