Read Hmar JEREMIA 2 Bible Online

JEREMIA 2 - Hmar bible

JEREMIA 2

¹Chun, LALPA thu chu ka kuomah a hung tlung a,

²“Fe la, Jerusalem na bula chun khêk la, hieng hin hril rawh, LALPA chun hieng hin a tih; mo anga i hmangaina le, i tleirâwl lai lunginsietna; khânga ram chi thea um nawna hmuna, thlalêra ka hnung i hung zui kha ka hriet zing a.

³Israel hi LALPA ta dinga inthieng, a hlâwkna ra hmasa tak chu a na; ama fa zotuhai po po chu suola ngai nîng an ta, an chunga chun thil ṭha naw tlung a tih, LALPA chun a tih.”

⁴Aw Jakob sûngkuo le, Israel sûngkaw pahnamhai po po, LALPA thu chu ngai ta u;

⁵LALPA chun hieng hin a tih: “In thlatuhai khan keimaa hin ieng felnawna am an hmu a, keimaa inthawka hlataka khan an fe hmang a, teplo khata chun an fe a, teplo an hung chang el a ni a?

⁶Anni chun, ‘Aigupta rama inthawka eini mi hung ṭhuoi suok a, thlalêra le, ram thlalêr le khur hmun le, ram ṭâwltak le thina hlim ram le, ram mi tûkhawm an fethleng ngai nawna le, mi tukhawm chêng nawna rama mi ṭhuoitu LALPA kha khaw lai am a um a? khawm an ti nawh.

⁷Chun, ram chênghnâwngtak, chutaka ra le a ṭhatna chu fa dingin ka ṭhuoi lût cheu a; amiruokchu, in lût chun, ka ram chu in sukpawrche a, ka rochan chu tirdakumah in siem ta a ni kha.

⁸Thiempuhai khawm chun, “LALPA kha khaw lai am a um a?” khawm an ti naw a; dân hmangtuhai hlak chun an mi hriet bawk nawh: rorêltuhai khawm chun ka chungah an bawsiet a, zâwlneihai khawm chun Baal hmangin thu an hril a, thil a hlâwkna um dêr lohai chu an hnawt ta lem a.

⁹“Chuleiin, LALPA chun, nangnia chun hung phût ka ta, in nauhai nauhai chunga chen chun ka hung phût ding a nih, a tih.

¹⁰Kittim thlierkârhai chu kai unla, va en ta u; Kedara khawm chun mî tir unla, nguntakin ngaituo ta u; chuong ang thil chu a um hrim am en fie ta u.

¹¹Hnamhai chun an pathienhai, pathien tak ni lohai hnam chu an thleng am a nih? amiruokchu, ka mihai chun, ienga khawm ṭhahnem lo le chun an ropuina chu an thleng a ni hi.

¹²Aw nangni vânhai, hi chunga hin makti unla, a ṭitin ṭi unla, nasataka râusanin um ro, LALPA chun a tih.

¹³Ka mihai chun thil ṭha naw pahni chu an thaw ta si a; kei tui hringhai tuikhur chu an mi mâksan a, tuisunsuohai an cho a, tuisunsuo ṭehai, tui intling thei lohai chu.

¹⁴Israel hi siehlaw a nîm a nih? Sal pu ina pieng am a nih? Iengdinga tawktar chau a ni el am a ni aw?

¹⁵Sakeibaknei tuoihai chun an inrûm khum a, an inhûk a: a ram chu an suksiet a; a khawpuihai khawm a hluotuhai um lovin a kâng zo ta a.

¹⁶Noph le Tahpanhes thlahai el khawm chun i lua lallukhum chu an sukṭiek el a ni ta hi.

¹⁷Lampuia chun a ṭhuoi lai chea, LALPA i Pathien i nghatsan khan, hi hi nang chun i nei tlat ni lo am a nih?

¹⁸Chuongchun, tuhin, Aigupta fena lampuia chun Sihor tuihai chu dâwn dingin ieng am thâwng i ta? Annawleh, Assuria fêna lampuia Vadungpui tuihai chu dâwn dingin ieng am thâwng i ta?

¹⁹Nangma rîtlona ngei chun sukdik a ti che a, i hnungtawlnahai chun nang chu kâwk a ti che; chuleiin, LALPA i Pathien chu i nghatsan a, keima ṭina chu nangmaa hrim a um naw hi, thil rilotak le, thil kha a nih ti hi hmu la, hre rawh, LALPA, sipaihai LALPA chun a tih.

²⁰Inhmâta inthawk khan i rîngkawl chu i sukthliek a, i khuopnahai chu i suktan a, chun, nang chun, ‘Bawse ta naw ningah,’ i ta; muol insâng tinahai le thing hring hnuoi tinahai chun, nawchizawr anga khawsain nang chu i kûn ta si a.

²¹Grêp hrui ṭha mi, a chi indik tak ela ka phun vei che leh, iengtiziea ka ta dinga grêphrui danglam kûng suoka hung inchang el am i ni leh?

²²Changalin în sâwp a, sâbawn tamtak i hmanga chu, i suolna chu ka hmaa chun a la chieng rawp a nih, Lalpa PATHIEN chun a tih.

²³Iengtin am ‘Sukpawrchein ka um naw a, Baal khawm chu ka zui naw a,’ ti thei i ta? Phairuoma i lampui chu en la, i thaw tahai chu hre bawk rawh; sanghâwngsei tuoi hrâttak a lampuihai thlep kawi kawi le;

²⁴thlalêra sabengtung hel, a châkna anga hnâr inlên ruoi ang chu i nih; ama châkna chu tuin am her hmang thei an ta? Ama zawngtuhai po po chu anni insuksâwl naw raw hai se, ama chu a huna chun hmusuok el an tih.

²⁵I keah kekawk bun lovin um naw la, i hnuk khawm dangchârin sie naw rawh; nang ruok chun, ‘Beiseina a um ta nawh, mi hmêlmakhai chu ka hmangai a, anni hnung chu zui el ka tih’ i ti a.

²⁶“Inru chu hmusuok a ni pha chun ân zak angin, Israel sûngkuo khawm chu chuong ang chun ân zak a nih; anni le an lalhai, an rorêltuhai, an thiempuhai, an zâwlneihai chun,

²⁷thingbul kuoma chun, ‘Nang hi ka pa i nih,’ an ta, lung kuoma chun, ‘Nang hin i mi nei a,’ an ti a, an hmai tieng ni lovin, an hnung an mîn nghat ta si a; an buoi lai huna ruok chun, ‘Hung tho la, mi sanhim rawh,’ an ta.

²⁸Anleh, i pathienhai i ta dinga i siemhai kha khaw lai am an um a? I buoi lai huna an sanhim thei che chun inthotir ta la; i khawpuihai tamzie ang peiin i pathienhai chu an tam si a, Aw Juda.

²⁹“Iengdingin am kei chu mi phût in ta? ka chungah in lo bawsiet vawng ta si a, LALPA chun a tih.

³⁰A thlâwn elin in thlahai chu ka lo vuok ta a; ṭhat phanain an hmang si nawh; sakeibaknei hnukinrâwl ang elin nangni kâwlhnâm ngei chun in zâwlneihai a fâk zo a ni hi.

³¹Aw nangni suon hai, LALPA thu chu en ta u, ka mihai chun, ‘Kan suok fel ta a, nangma kuoma chu hung ta naw ning ung,’ an tina dingin, Israelhai kuoma chun thlalêr amanih, ram inthim sâmup am ka lo nih a ni?

³²Nunghâk chun ân cheina thuomhnaw chu a theinghilin, mo chun a mo puon chu a theinghil thei am a nih? Ka mihai ruok chun nihai tiem sêng lova inthawk tah an mi theinghil a nih.

³³Hmangaina zawng dingin i lampui chu ieng ang lâwmin am i uluk a! nuhmei rilohai ngei khawm chu i lampuihai chu în chûktir hiel el a.

³⁴I fênthuoa khawm mi rimsi, pawitâwklohai thisen chu hmu a ni si a; an rawk laitaka man si lovin. Hieng po po bâka hin nang chun,

³⁵‘Pawitâwklo ka nih; matheilovin i lunginsenna chu keimaa inthawkin inkieng ngei a tih,’ i ti a. Ngai ta, ‘Ka suksuol nawh’ i ti lei chun i chungah ro ka rêl ding a nih.

³⁶I lampuihai chu thleng dingin ieng dinga în vâkvêl ruoi am a na? Assuriain a sukmuolpho che ang bawkin Aigupta khawma la hung sukmuolpho a ti che.

³⁷Amaa inthawk khawm chun fe suok i ta, i kuthai chu i lu chunga siein; LALPA chun i ringhai chu a pawmpêk ta si naw che a, chuongahai chun hlawtling ta ngai naw ti nih.