Read Hmar JEREMIA 20 Bible Online

JEREMIA 20 - Hmar bible

JEREMIA 20

¹Tûn LALPA ina hotu lientak, Immer naupa thiempu Pashur chun hieng thuhai hi Jeremia chun a hril ti a lo hriet a.

²Pashur chun zâwlnei Jeremia chu a hrem a, LALPA ina Benjamin dai kawtkhâr chunghnung lema um, intângna ina chun a khum a.

³A zinga chun; Pashur chun Jeremia chu intângna ina inthawk chun a hung ṭhuoi suok a. Jeremia chun a kuomah, “LALPA chun i hming hi Pashur a ti naw che a, Magor-missabib a ti lem che a nih.

⁴LALPA chun hieng hin a ti si a: Ngai ta, i ruolhai le nangma ngei ta dingin ṭiumah ka siem ding che a nih; chun, an hmêlmahai kâwlhnâma ngei chun tlûng an ta, chu chu i mit ngeiin hmûng i tih; chun, Juda ram po po chu Babulon lal kutah pêng ka ta, ama chun Babulon tieng salah ṭhuoi a ta, kâwlhnâmin anni chu that a tih.

⁵Chu nawa khawm chun, hi khawpuia hausaknahai po po, chutaka a thil hlâwkhai po po, chutaka a thil hluhai po po, anih, Juda lalhai ro thilhai po po el chu an hmêlmahai, anni suksea, anni ṭhuoia, Babulona fepuitu dinghai kuta chun ka pêk ding a nih.

⁶Chun, nang Pashur le i ina chênghai po po chu sala ṭhuoiin um in ta; Babulona chun fêng i tih; chutaka chun thîng i ta, chutaka phûm chu nîng i ta, nang le i ruolhai po po an kuoma thu indik lotaka i lo hril hlakhai le chun,” tiin.

⁷Aw LALPA, nang chun i mi lo aikei ta a, ailâkin ka um ta a, nang chu keia nêkin i hrât lem a, i hne ta a, sûnnithlâkin nuizatbûr ka na, mi tin el chun an mi nuiêu a.

⁸Thu ka hril zâtin, ka khêk hlak si a; “Thawluina le suksietna” tiin; LALPA thu chu ka ta dingin sûnnithlâk thlâka hrilsietna le kâwkna an ni si a..

⁹Chun, ama chanchin hi hril nâwng ka ta, a hmingin thu hril naw ningah, ti ding ni lang, ka ruhai sûnga mei khâr nela chawk ang elin ka lungrila hin a um a, ka topui ṭawk ṭawk thei naw a, ka umpui thei naw a.

¹⁰Sîr tina ṭium le, mi tamtakhai hrilsietna chu ka hriet a. Ka ruol, hmêlhriettakhai, ka tlûk nghâktuhai chun, “Hril se ro, ama chu hrilsieng ei ta, ama chu ailâkin um a ta, ama chu hnêng ei ta, ama chunga chun ei phuba chu lâng ei tih,” an ti a.

¹¹Nisienlakhawm, LALPA chu mi huoisen, ṭium tak angin ka kuomah a um a; chuleiin, a mi sukrinumtuhai chu insui thlûng an ta, mi hne naw ni hai; muolphotakin um an ta, hlawtling naw ni haia, an kumkhuo hmingsietna chu theinghilin um naw nih.

¹²Nisienlakhawm, aw sipaihai LALPA, mifelhai fie hlaktu, lungril le ngaituonahai hmutu, an chunga i phuba lâk chu mîn hmutir la; nangma kuoma ngei chun ka chungthu chu kân kawltir ta si che a..

¹³LALPA kuoma chun hla sak unla, LALPA chu inpâk ro; thil suol thawtuhai kuta inthawk chun mi tlasam thlarau chu a sansuok si a.

¹⁴Ka piengna ni chu ṭawngsephurin um raw se: ka nuin a mi nei ni chu malsâwmin um naw raw se.

¹⁵Mi ka pa kuoma, “I ta dingin naupasal a pieng ie,” tia ama sukhlim a, a kuoma thu hung intluntu chu ṭawngsephurin um raw se.

¹⁶Chun, chu mi LALPAIN khawpuihai insîrna nei lova a sukchimhai ang chu ni raw se; zîngtieng chun khêkri inhriettir la, sûn huna chun ṭitrâwl inhriettir bawk la;

¹⁷ama chun sula chun a mi sukhlum ta naw leiin; chuong ni sien chu ka nu chu ka thlân lo ni tâng a ta, a sul chun mi vawn zing el ding bah.

¹⁸Ieng dinga sininrimna le lungngaina hi hmu dinga, ka nihai chu inzaknaa sukbohmanga um dinga hi sula hung suok am ka ni aw?