Read Hmar JEREMIA 21 Bible Online

JEREMIA 21 - Hmar bible

JEREMIA 21

¹Lal Zedekiain a kuoma Malkija naupa Pashur le thiempu Maaseia naupa Zephania hieng thu hril dinga a tir laia Jeremia kuoma LALPA thu hung tlung chu:

²anni chun, “Kan ngên che, kan ta dingin LALPA chu thu mîn dawnpêk rawh; Nebukadnezzar Babulon lal chun keini hi a mi hung do a; keinia inthawka a kîr theina dingin, a thilthaw maktakhai ang po po khan LALPA chun keini a mi thawpêk ding âwm am” an ta.

³Jeremia chun an kuomah, “Zedekia kuoma chun hieng hin hril ro:

⁴Israel Pathien, LALPA chun hieng hin a tih. Ngai ta, in kuta indona hriemhrei kul puoa, nangni hung inhuoltuhai cheu, Babulon lal le Kaldaihai i donahai chu inherkîrtir ka ta, hi khawpui sûnga hin anni chu kei khâwm ka tih.

⁵Keima ngeiin bân phar le kut hrâtin, lunginsenna le, ṭitumna le nasataka lunginthakna leh do ka ti che a.

⁶Chuongchun, hi khawpui hluotuhai ramsa le mihriemhai ngei chu hrem ka ta, hripui nasataka chun thîng an tih.

⁷Chu hnunga chun, LALPA chun a tih: Juda lal Zedekia le, a siehlawhai le, mipuihai, hi khawpuia hripuia inthawka hlaa la umhai, kâwlhnâm le ṭâma inthawka la hlaa umhai chu Babulon lal Nebukadnezzar kuta dâm, an hmêlmahai kuta dâm, an hringna lâk tumtuhai kuta dâm chun pêng ka tih; chun, ama chun kâwlhnâm ngeiin that a ta; anni chu hla naw ni a, lunginsiet bawk naw ni a, zângaina nei bawk naw ni.

⁸Chun, hi hnam kuoma hin hieng hin hril rawh: LALPA chun hieng hin a tih: Ngai ta, i hmaa chun hringna lampui le thina lampui chu ka sie a.

⁹Tukhawm hi khawpui sûnga um chu kâwlhnâmin, ṭâmin, hripuiin thîng a ta, amiruokchu, fe suok a, mi ân huoltuhai cheu Kaldaihai kuoma vân pe chu hring a ta, a hringna chu indona Lâwmman angin nei a tih.

¹⁰Thil ṭha tiengah ni lovin, thil ṭha naw tiengah hi khawpui chunga hin ka hmai kân nghat ta si a, LALPA chun a tih: Babulon lal kuta pêk nîng a ta, ama chun meiin râwng a tih.

¹¹Juda lal sûngkaw chungthua chun LALPA thu chu lo ngai ta u:

¹²Aw David sûngkuo, LALPA chun hieng hin a tih: Zîngtieng chun rorêlna chu tirsuok la, nêksâwrtu kuta inthawk chun suksieta um chu sansuok la; chuong naw chun, in thilthawhai rîtlo leiin, mei angin ka lunginsenna chu fe suok a ta, tukhawm ṭhel ruol lovin chawk a tih.

¹³Aw phairuom le, phaia lungpui hmun hluotuhai, ngai ta u, nangni ka dodâl cheu a nih, LALPA chun a tih: nangni chun, “Ei chungah tu am hung thlâng a ta? Tu am ei chêngnaa hin hung lût a ta?” in ti a;

¹⁴in thilthaw ra ang peiin ka hrem ding cheu a nih, LALPA chun a tih; a rampui hnuoia chun mei sêm ka ta, a sîra um po pohai chu kâng hmang vawng a tih.