Read Hmar JEREMIA 23 Bible Online

JEREMIA 23 - Hmar bible

JEREMIA 23

¹Ka hlo petna hmuna berâmhai sukdara sukbohmanghai berâmpuhai chu an chung a rik! LALPA chun a tih.

²Chuleiin, Lalpa Israelhai Pathien chun, ka mihai châwmtu berâmpuhai chungthua chun hieng hin a hril: Ka berâm ruolhai chu in hnawt dar a, in khal hmang tâwl ta a, anni chu in va sir ngai bawk naw a; ngai ta u, in thilthaw rilohai chun ka hung sir ding cheu a nih, LALPA chun a tih.

³Ka berâm ruol laia hlâbîkhai chu, ram anni ka hnawt hmangna po poa inthawk chun hung ṭhuoi khâwm ka ta, an huonhaia chun hung ṭhuoi nâwk ka tih; chun, hung pung an ta, hung rahlâwk an tih.

⁴Anni châwmtu ding berâmpu an chunga chun sieng ka ta; ṭit khawm ṭi ta naw ni hai a, beidawng ngai ta bawk naw ni hai a, tlâksam hrim khawm um ta naw ni, LALPA chun a tih.

⁵Ngai ta, nihai chu a hung tlung mêk; LALPA chun a tih: David-a hin kau feltak chu hung inṭotir ka ta, ama chun lal angin rorêl a ta, vartakin thâwng a ta; rama chun rorêlna le felna chu suksuok a tih.

⁶Ama dam sûng chun Juda chu sandam nîng a ta, Israel khawm chu himtakin chêng a tih, chun, hi hi hming ama kona ding chu nîng a ta, “LALPA chu ei felna a nih,” ti hi.

⁷Chuleiin, ngai ta, nihai chu a hung tlung mêk, LALPA chun a tih; Aigupta rama inthawka Israel mipuihai ṭhuoi suoktu LALPA chu a hring zing angin, ṭi ta naw ni hai a,

⁸Hmâr rama inthawk le anni ka hnawt hmangna ram po pohaia inthawka Israel sûngkuo chu enkawla ṭhuoitu LALPA ti ni lem tâng a tih: chuongchun, anni ram ngeia chun chêng tâng an tih.

⁹Zâwlneihai chungthua chun; ka lungril chu ka sûnga chun a kawise a, ka ruhai po po khawm ân hnîng a; zu inrui mi, mi uoinin a hne zet ang el chu ka nih; LALPA lei le, LALPA thu inthienghai lei chun.

¹⁰Ram chu uirehaiin an sip a, ṭawngsie lei chun ram chun a sûn a; thlalêra hlo petna hmunhai khawm chu a ṭâwl zo a; an lampuihai chu a ṭha naw a, an hrâtna khawm chu ân dik nawh.

¹¹Thiempu le zâwlnei chu sukpawrche an ni ve ve si a; anih, ka ina chun an khawhlona chu ka hmu a nih, LALPA chun a tih.

¹²Chuleiin, an lampui chu an ta dingin inthim laia hmun innâltak ang chu nîng a ta; hnawtin um an ta, chutaka chun tlûng an tih, an chunga chun thil ṭha naw, anni hremna kum ngei chu ka hung intlungtir ding a ni si a, LALPA chun a tih.

¹³Samaria zâwlneihaia chun invêtna ka hmu a, anni chun Baal hmangin thu an hril a, ka mi Israelhai chu an insuksuoltir a.

¹⁴Jerusalema zâwlneihaia khawm thil râpthlâktak ka hmu a; anni chun uiretna thil an thaw a, thukhêlah an fe a, thilsuol thawtu kut chu an sukhrât a, chuongchun, tukhawm an khawhlonaa inthawkin an kîr nawh; an rêng el chun ka ta ding chun Sodom ang an na, chutaka a hluotuhai chu Gomorra ang an nih.

¹⁵Chuleiin, zâwlneihai chungthua chun sipaihai LALPA chun hieng hin a tih; Ngai ta, anni chu sairamkhain châwm ka ta, mîtkhâ tui indâwntir ka tih; Jerusalem zâwlneihaia inthawk chun ram po poa chun sukpawrchena chu a fe suok si a.

¹⁶Sipaihai LALPA chun hieng hin a tih: “In kuoma thuhriltu zâwlneihai thuhai chu ngai naw unla, anni chun teplo mei mei an inchûktir cheu a nih, an lungrila thil hmulâwk chu an hril a, LALPA baua inthawka mi chu ni lovin.

¹⁷LALPA thuhai hmusittuhai kuoma chun, LALPA chun, ‘Thlamuongna nei in tih, a tih,’ an ti zing zing hlak a, chun, mi mâni lungril ngarzie ang peia um hlaktu kuoma khawm chun, ‘In chungah thil ṭha naw hung tlung naw nih,’ an ti bawk hlak a.

¹⁸ LALPA rorêlnaa chun tu am a thu chu hrea pawm dinga ngîr hlak? Tuin am a thuhai chu ân chikin a hriet hlak a?

¹⁹Ngai ta u, LALPA thlipui chu, a lunginsenna chu, a fe suok a, anih, thlivir thlipui chu, mi khawhlo lu chunga chun hung nuoi a tih.

²⁰Thawa a um hmakhat chun LALPA lunginsenna chu hung kîr nâwk naw ni, a lungrila a thiltum a thaw hmakhat chun: hi hnung tienga chun la hung hre chieng hlêng in tih.

²¹Hieng zâwlneihai hi ka tir naw a, anachu, an tlân si a; an kuoma chun thu khawm ka hril naw a, anachu, anni chun thu an hril si a.

²²Nisienlakhawm, ka rorêlnaa lo ngîr ta chu ni hai sienla, ka mihai chu ka thuhai chu inhriettir an ta, an thilthaw suolhaia inthawk le, an lampui suolhaia inthawk chun inkîrtir tâng an tih.

²³ LALPA chun, ‘Hlataka Pathien um ni lovin, hnaitaka Pathien ka ni maw?’ a tih.

²⁴LALPA chun, ‘Mi tukhawm ka hmu lo dingah hmun fienrielahai ân bihmang thei am a nih?’ a tih. ‘Hnuoi le vân chu keia suksip a ni naw am a nih?’ LALPA chun a tih.

²⁵‘Mang ka nei, mang ka nei,’ tia ka hminga thukhêla thuhriltuhai, zâwlneihaiin an hril chu ka hriet a.

²⁶Zâwlnei thukhêl hriltuhai, anni lungril inhlêmnaa zâwlneihai chu, chuonghai lungrila chun hi hi iengchen am a um ding a na?

²⁷an thlatuhaiin Baal leia ka hming an theinghil anga, mi tinin mâni tuolbâwmhai kuomah an manghai an hrilin ka mihai chu ka hming intheinghiltir dingin an ngaituo a.

²⁸Zâwlnei mang nei chun a mang chu hril sienla, keima thu hretu chun keia thu chu ringumtakin hril bawk raw se. Bu le a kûng chun ieng am inangna an nei a? LALPA chun a tih.

²⁹Ka thu chu mei ang a ni nâwm a nih, lungpui khawm suknawitu tubau ang chu? LALPA chun a tih.

³⁰“Chuleichun, ngai ta u, zâwlneihai mâni tuolbâwmhaia inthawka ka thu inrutuhai chu ka kal a nih, LALPA chun a tih.

³¹Ngai ta u, an leihai hmanga, ‘LALPAIN a hril,’ titu zâwlneihai chu ka kal a nih, LALPA chun a tih:

³²Ngai ta u, mang indik lohai hrila, anni kuoma khawm hrila, an khêlhrilhai le, an uongna teplohaia ka mihai insuksuoltirtu zâwlneihai chu ka kal a nih, LALPA chun a tih; anni chu ka tir naw a, thu khawm ka pêk naw a; hi hnam hi suksâwt chuong dêr bawk naw ni hai, LALPA chun a tih.”

³³Hi mihai laia pakhatin amanih, zâwlneiin amanih, thiempuin amanih, “LALPA rikphur chu ieng am a na?” ti an indawn che chun, an kuoma chun, “Nangni hi phurrik chu in nih, ka peihâwn ding cheu a nih, LALPA chun a tih,” tiin hril rawh.

³⁴Chun, zâwlnei amanih, thiempu amanih, chu mi laia pakhat, “LALPA phurrik chu” titu chu kei khawma chu mi le a sûngkuo chu hrem ka tih.

³⁵Chuongchun, mi tinin mâni tuolbâwmhai kuoma le mâni unaupahai kuomah, “LALPA chun ieng am a dawn a? LALPA chun ieng am a hril a?” tiin hril in tih.

³⁶Chuongchun, LALPA phurrik chu hril ta ngai naw ti niu a, mi tin ta dingin ama thu ngei chu a phurrik a ni ding leiin; Pathien hring thuhai chu in lo fe kawipui ta si a, ei Pathien sipaihai LALPA thu chu.

³⁷Chuongchun, zâwlnei kuoma chun, “LALPA chun iengin am a dawn che a? LALPA chun ieng am a hril a?” tîng in ta.

³⁸Amiruokchu, “LALPA phurrik chu,” in ti chun, LALPA chun hieng ang hin a tih: Hi thu “LALPA phurrik chu,” in ti leiin, “LALPA phurrik chu, in ti ding a ni nawh,” ti dingin in kuomah mi ka hung tir a;

³⁹chuleiin, ngai ta u, nangni chu theinghil letdêr ka ti cheu a, khawpui nangni kuoma le in thlatuhai kuoma ka ipêk le hin ka hmaihmaa inthawkin ka peihâwn ding cheu a nih;

⁴⁰chun, in chunga chun kumkhuoa um ding ṭawngsekawk chu hung intlun ka ta, inzakna re lo leh, chuong chu theinghil ni ta ngai naw ni hai.