Read Hmar JEREMIA 24 Bible Online

JEREMIA 24 - Hmar bible

JEREMIA 24

¹Chun, ngai ta, LALPA biekin hmaha sie theichang leikhawr pahni LALPA chun a mîn entir a; Babulon lal Nebukadnezzarin Juda lal Jehoiakim naupa Jekonia le Juda rama lalhai le, mi themthiemhai le, thîrsuhai chu Jerusalema inthawka salah a ṭhuoi a, Babulona a hung ṭhuoi tâwl hnung khan.

²Leikhâwr pakhata chun theichang ṭhatak tak el, theichang hmin hmasa ang kha a um a; leikhâwr danga chun theichang setak tak el, fâk thei lo khawpa sie chu a um a.

³Chun, LALPA chun ka kuomah, “Jeremia, ieng am i hmu a?” a mi ta. Kei chun, “Theichanghai, theichang ṭha, ṭha êm êm le, a ṭha naw, ṭha naw takmeu el, fâk thei lo khawpa sie,” ka ti a.

⁴Chun, LALPA thu chu ka kuomah a hung tlung a.

⁵“LALPA Israel Pathien chun hieng hin a tih: An ṭhatna dinga, Juda sal intâng, hi hmuna inthawka Kaldai rama ka tirhai chu hi theichang ṭhahai ang hin ngai ka ta.

⁶An ṭhatna dingin an chungah ka mit inlên ka ta; chuongchun, hi rama ma hin hung ṭhuoi nâwk ka tih; chun, anni chu tungding ka ta, keihnuoi naw ningah; anni chu phun ka ta, phawi naw ningah.

⁷An kuoma chun, LALPA ka nih ti mi hre dingin lungril pêng ka ta; chuongchun, ka mihai nîng an ta, kei khawm an Pathien nîng ka tih; an lungril po po leh ka kuomah an hung kîr nâwk ding a ni si a.

⁸Chun, theichang ṭha nawhai, fâk thei lo khawp hiela siehai ang chun, Juda ram lal Zedekia le, a lalhai le, Jerusalema la mahlahai, hi rama la chênghai le chun, Aigupta rama chênghai po po le chun nghatsan ka tih, LALPA chun a tih;

⁹anni chu thil ṭha nawa hnungtieng hmatienga sukṭita um dingin hnuoia lalram po pohai lai chun pe suok ka tih; ṭawngsekawk le, thuvara le hrânghla le inkhâmna ni dingin, anni ka hnawt suokna ding hmun po poahai chun pe suok ka tih.

¹⁰Chun, anni le an thlatuhai kuoma ram ka pêka inthawka an rênga an bohmang vawng hmakhat chun an hnunga chun kâwlhnâm dâm, hripui dâm, ṭâm dâm tir bawk ka tih,” tiin.