Read Hmar JEREMIA 25 Bible Online

JEREMIA 25 - Hmar bible

JEREMIA 25

¹Juda ram lal Josia naupa Jehoiakim inlal kum linaa Juda mipui po po chungthua Jeremia kuoma thu hung tlung chu: chu kum ma chu Babulon lal Nebukadnezzar inlal kum khatna a na;

²chu chu zâwlnei Jeremia chun Juda mipui po po le Jerusalem hluotuhai po po kuoma chun a hril a,

³“Juda ram lal Amon naupa Josia inlal kum sâwmpathum kuma inthawka vawisûn ni chen hin, hi kum sâwmhni pathum sûng hin LALPA thu chu ka kuomah a hung tlung hlak a; chun, in kuoma chun ṭhahnemngaitakin ka lo hril hlak cheu a; amiruokchu, in awi ngai naw a.

⁴Chun, LALPA chun inhmataka thoa anni chu hung tirin a siehlaw zâwlneihai po po chu in kuomah a hung tir a, amiruokchu, in lo ngai naw a, in nahai khawm in sit bawk nawh.

⁵‘Mi tin el chu tuhin in thilthaw indik nawhaia inthawk le, mâni lampui suola inthawk chun kîr seng unla; nangni le in thlatuhai kuoma inhma le kumkhuoa dinga, LALPAIN ram a pêk cheua chun chêng ro;

⁶chun, pathien danghai chu an rawng bâwl ding le anni chibai bûk dingin zui naw unla, in kut sinthawhai chun mi suklungsen bawk naw ro; chuongchun, nangni khawm sukna naw ning cheu,’ an ti a.

⁷Ana chu, ka thu chu in ngai naw a, LALPA chun a tih; in insuknatna dinga in kut sinthawhai chun in mi suklungsen a.

⁸Chuleiin, sipaihai LALPA chun hieng hin a tih: Ka thuhai chu in ngai naw leiin,

⁹ngai ta u, mi tir ka ta, hmâr rama inthawk chun sûngkuohai po po chu ko ka tih, LALPA chun a tih; chun, ka siehlaw Babulon lal Nebukadnezzar kuoma chun mi tir ka ta; anni chu hi ram le, a hluotuhai le, a vêla hnamhai po po chunga do dingin hung ṭhuoi ka ta; chuongchun, anni chu sukse letdêr ka ta, makti ding le, inchekna ding le, kumkhaw rausanah ka siem ding a nih.

¹⁰Chu nawa khawm, anni laia inthawk chun, hlimna râwl dâm, lâwmna râwl dâm, mo neitu râwl dâm, mo râwl dâm, bu râwtna ri dâm, sathâu khâwnvar varna dâm chu sukbo vawng ka tih.

¹¹Chuongchun, hi ram pumpui hi rausan le maktiah um a ta; chun, hnamhai chun kum sâwmsari sûng Babulon lal rawng chu bâwl an tih.

¹²Chun, kum sâwmsari chu ân vawi pha chun, an suolna leiin, Babulon lal le, chu hnam le, Kaldaihai ram chu hrem ka ta; kumkhuoa rausanah siem ka tih, LALPA chun a tih.

¹³Chu ram chunga ka thuhai tlung dinga ka hril tah, hi lekhabua ziek ta ngeihai, Jeremia chun hnamhai chu dodala a lo hril tahai ngei chu hung intlungtir ka ta.

¹⁴Hnam tam takhai le lal ropuihai chun anni chu anni ngei chu, suokah siem an ta; chuongchun, anni chu an kuthai sinthaw ang pei le, an thilthawhai ang peiin ka thung ding a nih,”tiin.

¹⁵Israel Pathien, LALPA chun ka kuomah hieng hin a ti si a: “Hi lunginsenna no ka kuta hi la la, hnam an kuoma ka tirnahai po po che chu indâwntir tâwl rawh.

¹⁶Chun, dâwn an ta, hnungtieng hmatieng insâwn an ta, invêt an tih; anni laia kâwlhnâm ka tir ding lei chun,” tiin.

¹⁷Chun, LALPA kuta no chu ka lâk a, LALPAIN a mi tirna hnamhai po po kân dâwntir a;

¹⁸Chuong chu hieng Jerusalem le Juda khawpuihai le a sûnga lalhai le rorêltuhai chu, vawisûn ni anga hi, anni chu râusan le maktia le, incheknaa le, ṭawngsephura siem dingin;

¹⁹Aigupta lal Pharao le a siehlawhai, a lalhai le a mihai po po leh;

²⁰mi chilakhai po po, Uz rama lalhai po po, Philistin mihai rama lal po pohai, (Askelon, Gaza, Ekron le Asdoda la mahlahai leh);

²¹Edom, Moab le Ammon mihai leh;

²²Zidon lalhai po po, Tura lalhai po po, tuisuoriet khêla thlierkâra lalhai po po leh;

²³Dedan, Tema, Buz le an barêp hmul vâwtuhai po po leh;

²⁴Arabia lalhai po po le thlalêra chêng mi chilakhai lalhai po po leh;

²⁵Zimri lalhai po po, Elam lalhai po po, Media lalhai po po leh;

²⁶hmâr tienga lalhai a hla le hnaia mihai, pakhat khatin, hnuoi phêk chunga um khawvêla lalram po po hai leh: chun, Sesak lal chun anni zoa chun dâwn vêng a tih.

²⁷Chun, an kuoma chun hieng hin tîng i ta: Israel Pathien, LALPA chun hieng hin a tih: Dâwn unla, inrui unla, inluok unla, tlu unla, tho nâwk ta naw ro, nangni laia kâwlhnâm ka hung tir ding lei chun.

²⁸Chun, i kuta no chu dâwn dinga an lâk nuom naw chun, an kuoma chun hieng hin tîng i tih: “Sipaihai LALPA chun hieng hin a tih: In dâwn ngei ding a nih,” tiin.

²⁹Ngai ta, ka hming chawia khawpui inbûka uma chun thil ṭha naw ka thaw ṭan ta si a, hrem dêr lovin in um ding maw? Hrem lo ni naw ti niu; hnuoi hluotuhai po po chunga chun kâwlhnâm kân lêngtir ding a ni si a, sipaihai LALPA chun a tih.

³⁰Chuleiin, hieng thuhai po po hi anni kalin hril la, an kuoma chun, “LALPA chu chungtienga inthawkin hung inrûm a ta, a chêngna inthienga inthawk chun a râwl chu hung insuong a tih; a hlo petna hmuna chun thilthawtheitakin inrûm a ta; grêp sir sâwrtuhai ang chun ama chu hnuoi chung hluotuhai po po chunga chun khêk a tih.

³¹Ri chu hnuoi tâwp chenah hung tlung a ta; LALPA chun hnamhai le chun inkalna an nei si a; mi tin chu phût a ta; mi rilohai ruok chu kâwlhnâm pêng a tih, LALPA chun a tih,”tiin.

³²Sipaihai LALPA chun hieng hin a tih: Ngai ta u, thil ṭha naw chu hnam khata inthawkin hnam dang chunga chun fe pei a ta, hnuoi tâwptaka inthawk chun thlipui nasatak chu hung suok a tih.

³³Chun, chu nia chun LALPA sukhlumna chu hnuoi tâwp khing khata inthawka a tâwp khingtieng chen nîng a ta; chuonghai chu sûn ni naw ni hai a, lâk khâwm khawm ni naw ni hai a, phûm khawm ni bawk naw ni hai; leihnuoi chunga êk el ni lem an tih.

³⁴Nangni berâmpuhai, inrûm unla, khêk ro; nangni ran ruol hotuhai, vutah nangni le nangni intleng ro; that in nina ding ni chu a hung tlung ta a, nangni chu kei nâwi neng ka ti cheu a, bêl ditumtak angin tlûng in tih.

³⁵Chun, berâmpuhai chun tlânhmangna ding lampui nei naw ni hai a, ran ruol hotuhai khawm chun pumpelna ding nei bawk naw ni hai.

³⁶Berâmpuhai khêk râwl ri le ran ruol hotuhai inrûm ri chu! LALPA chun an ran tlatna hmunhai chu a suksiet ta si a.

³⁷Chun, LALPA lunginsenna ṭiumna lei chun ran in muongumtakhai dâm chu an to ṭawk ṭawk a.

³⁸Sakeibaknei angin a chîmbuk a mâksan a, a lunginsen ṭiumna lei le, nêksâwrna kâwlhnâm ṭiumna lei chun an ram chu a se zo ta si a.