Read Hmar JEREMIA 26 Bible Online

JEREMIA 26 - Hmar bible

JEREMIA 26

¹Juda lal Josia naupa Jehoiakim rorêl ṭantir laiin hi thu hi LALPA kuoma inthawkin a hung tlung a:

²“LALPA chun hieng hin a tih: LALPA in huon tuollaia chun ngîr la, an kuoma thuhril ding ka thupêk po po che chu, LALPA ina Pathien be dinga hung khâwm, Juda khawpuihai po po kuoma chun hril rawh; thu khat chau khawm ip naw rawh.

³Anni chun ngai an ta, mi tin chu mâni lampui suola inthawk chun an kîr el thei a nih; chuongchun, an thilthawhai suol leia an chunga thil ṭhalo thaw dinga ka tumhai khawm chu kân sîr el thei a nih.

⁴Chun, an kuoma chun hieng hin tîng i ta: LALPA chun hieng hin a tih: in hmaa ka sie ka dân chu hraw dinga ka thu in ngai naw chun,

⁵inhmataka thoa anni hung tira, ka siehlaw zâwlneihai in kuoma ka hung tirhai thuhai in ngai dinghai chu, in ngai ta naw a;

⁶chuongchun, hi in hi Silo angah siem ka ta, hi khawpui hi hnuoia hnam po pohai ṭawngse hnâwknaah siem bawk ka tih,” tiin.

⁷Chun, thiempuhai, zâwlneihai le mi po po chun hieng thuhai hi LALPA ina Jeremia chun a hril chu an hriet a.

⁸Chun, LALPAIN hril dinga thu a pêk po po mipuihai po po kuoma Jeremia chun a hril zo chun, thiempuhai le, zâwlneihai le mipui po po chun ama chu an man a, “I thi ngei ngei ding a nih.

⁹Iengdinga LALPA hminga thu hrila, ‘Hi in hi Silo ang nîng a ta, hi khawpui hi hluotu um lova rausan nîng a tih,’ i ti am a na?” an ti a. Chuongchun, LALPA ina chun Jeremia chu mipui po po chun an bâwr ta hut hut a.

¹⁰Juda ram lalhai chu chuong thuhai chu an lo hriet chun, lal ina inthawk chun LALPA ina chun an hung tâwl a; chuongchun, LALPA in dai kawtkhâr thar lûtnaa chun an ṭhung tâwl a.

¹¹Chun, thiempuhai le zâwlneihai chun lalhai le mipuihai po po kuoma chun, “Hi mipa hi thi tlâk a nih, in nahaia in hriet ta ang ngei khan hi khawpui siet ding thu a hril a nih,” tiin an hril a.

¹²Chun, Jeremia chun lalhai po po le mipuihai po po kuoma chun thu a hril ta a, “LALPA chun thu in lo hriet ta ang po po khan hi khawpui le hi in siet ding thu hril dingin a mi hung tir a nih.

¹³Chuleiin, tuhin in thilthawhai le in umdânhai chu siemṭha unla, LALPA in Pathien râwl chu awi ro; chuongchun, nangni dodâla LALPAIN thil ṭha naw a lo hril ta khawm chu lamlêt a tih.

¹⁴Chun, keia chungchâng thua chun, in kutah ka um a nih, in mithmua ṭha le ân dik ang chun ka chungah thaw el ro.

¹⁵Hi hi hre ngei unla, kei in mi sukhlum chun, nangni chunga le, hi khawpui chunga le, chu chu hluotuhai chunga chun mi thiem thisen chu in intlungtir ngei ding a nih; thil dikah, LALPA chun in na hrieta hieng thuhai po po hi hril dingin in kuomah a mi hung tir a ni si a,” tiin.

¹⁶Chun, lalhai le mipuihai po po chun zâwlneihai le thiempuhai kuoma chun, “Hi mipa hi thi tlâk a ni naw ie; ama hi LALPA ei Pathien hmingin thu a hril a ni si a,” an ti a.

¹⁷Chun, chu rama upa ṭhenkhathai chu an tho a, mipui inkhâwmhai po po kuoma chun thu an hril ta a,

¹⁸“Moras mi Mikaia khan Juda ram lal Hezekia inlal laiin thu a hril a; Juda rama mi po pohai kuoma chun ‘Sipaihai LALPA chun hieng hin a tih: Zion chu lo anga inlet nîng a ta; Jerusalem chu hmunhnawk sienkhâwm nîng a ta, in hmun tlâng chu ramhnuoia bâwlhmun tlâng ang nîng a tih,’ tiin.

¹⁹Juda ram lal Hezekia le, Juda mihai po po chun ama chu an that el am a nih? LALPA chu a ṭi a, LALPA ditsakna chu a hni a; chuongchun, LALPA chun an chunga thil ṭha naw a lo hril ta kha a lamlêt a ni nâwm a ni kha? Chuong a ni chun eini thlatuhai ta ding ngeiin thil ṭha nawtak ei thaw a ni ding a nih,” an ti a.

²⁰Chun, mi pakhat, LALPA hminga thuhriltu, Kiriath-Jearima Semaia naupa Uria chu a um a, ama khawm chun Jeremia thu ang tak pei chun hi ram le hi khawpui siet ding thu a hril ve a;

²¹chun, lal Jehoiakim le, a mi hrâthai po po le, lalhai po poin a hril an hriet chun lal chun ama chu sukhlum a tum ta a; nisienlakhawm, Uria chun a lo hriet chun a ṭi a, a tlân a, Aigupta rama chun a fe ta a;

²²chun, lal Jehoiakim chun Aigupta rama chun mihai a tir a, Akbor naupa Elnathan le mi ṭhenkhat chu Aiguptaa chun a tir a;

²³Aigupta rama inthawk chun Uria chu an hung ṭhuoi a, lal Jehoiakim kuoma chun an hung ṭhuoi ta a, chun, ama chun kâwlhnâmin a that a, a ruong chu mi narânhai thlâna chun a pei lût a.

²⁴Nisienlakhawm, Saphan naupa Ahikam kut chu Jeremia kuoma chun a um a, ama chu that dinga mipui kuoma an pêk nawna dingin.