Read Hmar JEREMIA 3 Bible Online

JEREMIA 3 - Hmar bible

JEREMIA 3

¹“Mîn a nuhmei a mâk a, amanu chun a suoksan a, pasal dang nuhmei a hung ni ta chun, ama chu, chu nu kuoma chun a kîr nâwk ding am a nih? Chuong a ni chun chu ram chu nasataka sukpawrche a ni naw ding maw? Nang khawm chu, ngaizâwng tamtakhai le chun nawchizawr angin i lo khawsa ta a, ka kuomah i la hung kîr rawp ding a ni? LALPA chun a tih.

²Bâwlhmun tienghai khi i mithai khan hang thlîr la, en ta; an zâlpui nawna che khaw lai am a um a? Thlalêra Arabia mi ang elin, lampui sîra chun an ta dingin i ṭhung a; i rîtlona le i hurna chun ram chu i sukpawrche ta a nih.

³Chuleiin, raw sûrhai chu cheltâng an na, ruo nuhnung tieng chu a um ta naw a nih; Chuongsa khawm chun nawchizawr hmâichang i put a, inzak i tum dêr si naw a.

⁴Tuta inthawk hin, ‘Ka pa, nang chu ka tleirâwlna ṭhuoitu i nih,’ tiin ka kuomah i khêk naw dîm a nih?

⁵A lunginsenna chu a kawl zing dîm a nih? A tâwp chenin a kawl dîm a nih? Ngai ta, thil ṭha naw chu i hrilin i thaw ta a, i suol thei dân tâwpin i lo suol ta,” tiin.

⁶Chu nawa khawm chun lal Josia hun lai chun ka kuomah LALPA chun hieng ang hin a hril a, “Israel hnungtawlin a lo thaw ta hi i hmu am? Tlâng insâng tinahai hang fein le, thing hring tin hnuoia chun; chuongahai chun nawchizawr angin a lo khawsa ta a.

⁷Hieng thilhai po po hi a thaw zo hnung chun ka kuomah hung kîr nâwk ka lo ring a, nisienlakhawm, a hung kîr si naw a, a zuorpuinu rilotak Juda khawm chun ama chu a hmu a.

⁸Israel hnungtawl chun uiretna thil a lo thaw ka hmu lei tak chun ama chu ka mâk a, inmâkna lekha ka pêk tah ti a hmu sa khawmin a zuorpuinu rilotak Juda chun ṭitna châng a hriet chuong naw a, ama ngei khawm chu a fe a, nawchizawrah a khawsa ve ta a.

⁹A hurna inruina lei chun ram chu sukpawrchein a um ta a; thingbulhai le lunghai le chun a lo uire ta a.

¹⁰Hieng thil po pohai lei khawm hin a zuorpuinu hlêm hmang Juda chu a lungril po po leh a hung kîr naw ta rawp a, a hung kîr tehlêm ringawt a, LALPA chun a tih,” tiin.

¹¹Chun, LALPA chun ka kuomah, “Juda rilotak nêk chun Israel hnungtawl hin suolmaw a phur tlâwm lem hman hman a nih. .

¹²Fe la, hieng thuhai hi hmârtieng ramah va khêkpui rawh, ‘Hung kîr rawh, nang Israel hnungtawl, LALPA chun a tih; lungsenpumin en ta nâwng ka ti che, zângai theitak ka ni si a, LALPA chun a tih, lunginsenna chu kumkhuoin kawl zing naw ning.

¹³I suolna chu hre phawt phawt la, LALPA i Pathien chunga chun i lo bawsiet ta a, thing hring tin hnuoia chun hmêlmakhai kuomah i lo inphal ta a, ka thu khawm chu i zâwm bawk naw a, LALPA chun a tih.

¹⁴Hung kîr ro, hnungtawl thlahai, LALPA chun a tih; in pasal ka ni si a, chun, khawpuia pakhat le, pahnama pahni lâng ka ti cheu a, Ziona chun hung ṭhuoi ka ti cheu;

¹⁵chuongchun, ka lungril ang takin berâmpu ding pêng ka ti cheu a, ama chun hrietna le hrietthiemnain châwm a ti cheu.

¹⁶Chun, chu rama chun in hung pung a, in hung tam pha chun; chuong niahai chun, LALPA chun a tih, “LALPA thuthlungna bâwm hi,” ti ta ngai naw ni hai. An lungrilah hung lût ta naw ni a, anni hlaka hre zing ta naw ni hai a; va sir bawk naw ni hai a, thawa thaw khawm um ta naw ni,’ ti ta ngai naw ni hai.

¹⁷Chu pha chun Jerusalem chu LALPA lalṭhungpha tiin inbûk an ta, hnam po pohai chu chutaka chun kei khâwm nîng an ta, LALPA hmingin Jerusalema chun, an lungril rilo ngarna ang chun fe khâwm nâwk ta ngai naw ni hai.

¹⁸Chuong nihaia chun Juda sûngkuo chu Israel sûngkuo le chun intlawn an ta, hmâr tieng rama inthawk chun hung suok hmunkhat an ta, in thlatuhai kuoma rochan dinga ka pêk rama chun hung an tih.

¹⁹“Kei chun, ‘hnamhai laia chun sie cheuin, ram inhawitak chu pe cheuin, hnamhai sipai pâwlhai rochan ṭhataka chun sie cheu ka lo lungril hlak a; chun, nangin, Pa, mi hung tîng i ta, i mi zuinaa inthawk hin fe hmang ta naw ti ni’ ka lo ti hlak a.

²⁰Anachu, nuhmeiin a pasal chu khawhlotaka a ṭhe angin, chuong ang tak chun ka chungah khawhlotakin i lo thaw ta tlat el a; Aw Israel sûngkuo,” LALPA chun a tih.

²¹Bâwlhmun tlângahai chun râwl hriet a na; Israel nauhai ṭapna le hnina chu; chu chu lei chun an lampui chu an lo sukhran ta a, LALPA an Pathien chu an theinghil tah a nih.

²²“Hnungtawl thlahai, hung kîr ro; in hnungtawlnahai chu lo sukdampêk ka ti cheu.” “Ngai ta, i kuoma chun kan hung ie, nang chu LALPA kan Pathien chu i ni si a;

²³Indiktakin muolhaia ṭhangpuina beiseia umhai chu mipui inri mur murhai chu a thlâwn el a nih; indiktakin LALPA ei Pathiena chun Israelhai sandamna chu a um a nih.”

²⁴Nisienlakhawm, ei naupang laia inthawkin, ei thlatuhai sin inrimna chu thil inzâpui umhai chun a lo fâk zo ta a, an bâwng ruolhai, an berâm ruolhai, an naupasalhai le an naunuhmeihai leh;

²⁵inzakin zâl ei tiu khai, ei muolphona chun mîn khum raw se; LALPA ei Pathien chunga chun thil ei lo suksuol ta si a; ei tleirâwl laia inthawk tah vawisûn chen hin eini ni leh, ei thlatuhai ni leh; chuongchun, LALPA ei Pathien râwl chu ei lo awi ta naw a nih.