Read Hmar JEREMIA 31 Bible Online

JEREMIA 31 - Hmar bible

JEREMIA 31

¹LALPA chun, “Chu pha chun Israel pahnam po pohai Pathien chu nîng ka ta, anni chu ka mihai nîng an tih,” a tih.

²LALPA chun hieng hin a tih, “Mipui kâwlhnâma inthawka suokhai chu thlalêra khan lunginsietna an hmu a; Israelin châwlna a zawng lai chun,

³LALPA chu hlataka inthawkin a kuomah a hung inlâr a. Kumkhaw hmangaina chun ka hmangai che a, chuleiin, lunginsietna ngilneina chun ka hîp che a.

⁴Bâwl nâwk ka ti che a, bâwlin um i tih, Aw Israel nunghâk inthieng. Khuong têhai leh inthuom nâwk i ta, hlimna siema lâmtuhai lai chun fe suok i tih.

⁵Samaria tlâng chungahai chun grêp huonhai chu siem nâwk i ta; a phuntuhai chun phun an ta, a ra chu chên an tih.

⁶Ephraim muolhaia vêngtuhai chun, ‘Tho unla, LALPA ei Pathien kuomah Ziona chun fêng ei tiu,’ tia an khêkna nihai chu a la hung tlung ding a ni si a,” tiin.

⁷LALPA chun hieng hin a ti si a; Jakob ta ding chun lâwmin hla sak unla, hnamhai lua um ta ding chun khêk bawk ro, puong dar unla, inpâk unla, “Aw LALPA, Israel hla bîkhai, i mihai hi sandam rawh,” ti ro.

⁸Ngai ta u, hmârtieng rama inthawk chun anni chu hung ṭhuoi ka ta, chun, hnuoi hmun hlatakhaia inthawk chun, anni le mitdel dâm, ke inbai dâm, nuhmei nau pawmlai dâm, nauhase nat tuor lai dâm chu hung ṭhuoi khâwm ka tih; chuongchun, pâwl ropuitak chu hitieng hin hung kîr an tih.

⁹Ṭap pumin hung an ta, thlamuongtakin anni chu ṭhuoi ka ta, tuihai vadungpuihai sîra chun, lampui tlûnah an insui nawna dinga chun anni chu infetir ka ta, Israel pa chu ka na, Ephraim chu ka nau lutîrtak a ni si a.

¹⁰Aw nangni hnamhai, LALPA thu chu ngai unla, thlierkâr hlatakahai chun phuong ro; chun, “Israel sukdartu ngei chun, ama chu kei khâwm nâwk a ta, berâmpuin a berâm ruol a kawl ang chun ama chu kawl a tih,” tiin hril ro.

¹¹LALPA chun Jakob chu ama nêka hrât lem kuta inthawk chun ân tlansuokin a sansuok ta si a.

¹²Chun, hung an ta, Zion tlâng insângna laiahai chun hla hung sak an ta; LALPA ṭhatnaa chun bua leh, uoina leh, hrieka leh, berâm le bâwng ruol têhaiah lâwm an tih; an thla chu tuihnâwngtak huon ang nîng a ta, lungngai nâwk ta hrim hrim naw ni hai.

¹³Chun, nunghâk inthienghai chu, tlangvâlhai le, upahai le chun lâmnaa chun hlim an ta; an lusûnna chu hlimnaah kân changtir ding a ni si a; chun, anni chu thlamuon ka ta, an lungngainaa inthawk chun sukhlim tâng ka tih.

¹⁴Thiempuhai thlarau chu thâuin sukkhawp ka ta, ka mihai chu ka ṭhatnain tlai an tih, LALPA chun a tih.

¹⁵ LALPA chun hieng hin a tih: Rama khuoah khêkri an hriet a, ṭap dâm, mithi ngaia khêk rawng rawng dâm, Rakil chun a nauhai a ṭa a, an um ta naw leiin thlamuon thei a ni nawh.

¹⁶LALPA chun hieng hin a tih: I râwl chu ṭapnaa inthawk le, i mithai chu mitthlihaia inthawkin insûm rawh; i sinthaw chu lâwmman pêk a ni ding a ni si a, LALPA chun a tih; chun, anni chu hmêlma rama inthawk chun hung kîr nâwk an tih.

¹⁷I hihnung tâwpna tienga ding chun beiseina a um a nih, LALPA chun a tih: i thlahai chu an ramri sûnga ngei chun hung nâwk an tih.

¹⁸Ephraim chu hieng ang lusûn hin ka hriet ngei a nih: “Bâwngtê rîngkawl la bât ṭhang lo angin nangin i mi thununa, thununin ka um a; nangin mîn hertir la, chuongchun, inher ka tih: nang chu LALPA ka Pathien i ni si a,” tiin.

¹⁹Matheilovin, chu hnunga chun kân let a, kei khawm ka lamlêt ta a; chun, chu hnunga chun inchûktirin ka uma, ka êlpui chu ka ben a; kân zak a, anih, ka tleirâwl lai hmingsietna chu ka phur leiin, ka hamhai nghe nghe a.

²⁰Ephraim hi ka naupa dittak am a nih? Ama hi naupang tiawi am a nih? Ama ka thunun pha, ama chu ka hriet zing tlat el hi? Chuleiin, ka lungril chun ama ka lainat a; matheilovin, ama chunga chun zângaina nei ngei ka tih, LALPA chun a tih.

²¹Lampui inchiknahai siem la, zui ding hmawlphunhai siem rawh, tlânglam tiengah, i fena lampui chu ngaituo la, kîr nâwk rawh. Aw nunghâk inthieng Israel, hieng i khawpuihai tienga hin kîr nâwk rawh.

²²Aw nang naunu hnungtawl, ieng chen am hitieng sawtieng i fe lawn ding a na? Hnuoia chun LALPA chun thil thar a siemsuok a, “Nuhmeiin pasal a hum ta lem,” ti hi.

²³Sipaihai LALPA, Israel Pathien chun hieng hin a tih: An sal intângna ka hung lâk kîr nâwk pha chun Juda rama le chutaka khawpuihaia chun hi ṭawngbau hi la hmang nâwk an tih: “Aw indikna chêngna, LALPA chun mal sâwm raw se che,” ti dâm le, “Aw inthiengna tlâng,” ti dâm hi.

²⁴Chun, Juda le chutaka khawpuihai po po chu um hmunkhat tâng an ta; loneituhai le, berâm ruol le invâk vêlhai khawm chu.

²⁵Mi chauhai chu ka suktlai a, mi lungngai tinhai khawm chu ka sukhar bawk a.

²⁶Hi lei hin ka tho a, ka en a, ka imu chu inhnik ka ti êm êm a.

²⁷Ngai ta u, nihai chu a hung tlung, LALPA chun a tih: Juda sûngkuo le Israel sûngkuo chu ramsa chi le mihriem chiin tûng ka ta.

²⁸Chun, anni chu hmalthla ding le, sukchim ding le, peithla ding le, sukse ding le, sukrinum dinga ka enkai zing ang khan, chuong ang bawk chun, anni chu bâwl ding le phun dingin enkai zing ka tih, LALPA chun a tih.

²⁹Chuong niahai chun, “Thlatuhai chu grêp thûr an fâk leiin, an thlahai hahai chu a ṭim,” ti ta ngai naw ni hai.

³⁰Nisienlakhawm, mi tin chu mâni suolnaa ngei chun thîng a ta, mi tin grêp thûr fatu chu, ama hahai ngei chu ṭim a tih.

³¹Ngai ta u, nihai chu a hung tlung, LALPA chun a tih, Juda sûngkuo le Israel sûngkuo le chun thuthlung thar siem ka ta;

³²Aigupta rama inthawka hung ṭhuoi suok dinga kuta anni ka chel nia an thlatuhai kuoma thuthlung ka siem ang dungzui kha ni lovin, an ta dingin pasal ka ni dea chu, chu ka thuthlung chu an bawsiet a, LALPA chun a tih.

³³Amiruokchu, chuong nihai hnunga Israel sûngkuo le thuthlung ka siem ding chu hi hi nîng a tih, LALPA chun a tih: an sûngrilahai chun ka dân chu sieng ka ta, an lungrilahai chun ziek bawk ka tih; chun, an Pathien nîng ka ta, anni chu ka mihai nîng an tih,

³⁴chun, mi tinin mâni tuolbâwmhai chu inchûktir ta naw ni hai a, mâni unauhai seng leh; “LALPA chu hre ro,” tiin inchûktir ta naw ni hai, anni a chîn taka inthawka a lien tak chenin kei an mi hriet vawng ta ding a nih, LALPA chun a tih: an bawsietnahai chu ngaidam ka ta, an suolna khawm hre zing ta naw ning.

³⁵Sûna nisa chu var dinga pea, zâna arasihai le thla var dinga ruotna petu, tuisuoriet chu chawkthoa, tuifâwnhai inrûmtirtu LALPA chun hieng hin a tih: ama chu sipaihai LALPA chu a hming a na;

³⁶Hieng thil ruothai hi ka hmaa inthawka an lo fe hmang chun, Israel khawm chu kumkhuoa dingin ka hmaa chun hnam an ni chu bo ve bawk a tih.

³⁷LALPA chun hieng hin a tih: Chunga vân khi inkhi thei a na, hnuoia leihnuoi lungphûm chu zawng suok thei a ni chun, thil an lo thaw tahai po po lei khan Israel chi chu pei hmang vêng ka tih: LALPA chun a tih.

³⁸Ngai ta u, nihai chu a hung tlung, LALPA chun a tih: Hananel in insânga inthawka a kia dai kawtkhâr chenin, LALPA ta dingin khawpui chu bâwl nîng a tih.

³⁹Chun, ân khina hmawl chu Gareb tlâng chenin fe tluon suok a ta, Goaa chun va kâwi a tih.

⁴⁰Chun, mithi ruong phairuom pumpui le, vut phairuom le Kidron vadungtê chen, saktienga sakawr dai kawtkhâr chen ram po po kha, LALPA chanpuol nîng a tih, sukdar ni naw ni a, kumkhuoin pei thlâk khawm ni bawk naw nih.