Read Hmar JEREMIA 36 Bible Online

JEREMIA 36 - Hmar bible

JEREMIA 36

¹Juda ram lal Josia naupa Jehoiakim inlal kum linaa chun hi thu hi LALPA kuoma inthawk chun Jeremia kuomah a hung tlung ta a:

²“Lekhabu zuol la la, chutaka chun Israel ram chungthu le, Juda ram chungthu le, hnam po pohai chungthu, Josia hun laia inthawka i kuoma thu ka hril nia inthawka vawisûn ni chena mi hi, thu ka hrilhai po po chu ziek rawh.

³An chunga thil ṭha naw thaw ka tum chu Juda sûngkuohai chun an hrietin, an suolna chu ka ngaidam theina dingin mi tin chu mâni um dân suola inthawk chun an hung kîr rawi mawh,” tiin.

⁴Chun, Jeremia chun Neria naupa Baruk chu a ko a; Baruk chun LALPAIN a kuoma thu a hrilhai po po chu lekhabu zuola chun Jeremia baua inthawk chun a ziek ta a.

⁵Jeremia chun Baruk chu thu a pêk a, “Kei chu khum ka na, LALPA ina chun ka fe thei naw a;

⁶chuleiin, nang va fe la, lekhabu zuola ka baua inthawka LALPA thuhai i ziekhai kha bunghei niin LALPA inah mipui na hrieta chun va tiem rawh; chun, Juda mi an khawpuihaia inthawka hung suokhai po po na hrieta chun tiem bawk rawh.

⁷An hnina chu LALPA hmaa pein, mi tin chu mâni um dân suola inthawk chun an hung kîr rawi mawh: hi mihai chunga lunginsenna le ṭitumna LALPAIN a hril chu a nasa hle si a,” tiin.

⁸Chun, Neria naupa Baruk chun, LALPA ina chun LALPA thuhai chu lekhabua chun tiemin zâwlnei Jeremia thupêk po po angtak chun a thaw ta a.

⁹Chun, Juda ram lal Josia naupa Jehoiakim inlal kum ngana, thla kuonaa chun Jerusalema mi po pohai, Juda ram khawpuihaia inthawka Jerusalema mipui hung po pohai chun LALPA hmaa bunghei chu an phuong ta a.

¹⁰Chun, mipui po po na hrieta chun, LALPA in dai kawtkhâr thar lûtnaa, huong sûng tuollai chunghnung lema um, lekhaziektu Saphan naupa Gemaria pindanah, LALPA ina chun Baruk chun Jeremia thuhai chu a tiem ta a.

¹¹Chun, Saphan naupa, Gemaria naupa Mikaia chun lekhabua LALPA thu po pohai chu a hriet chun,

¹²lekhaziektuhai pindanah lal ina chun a zu fe thla ta a; chun, ngai ta, chutaka chun lalhai po po, lekhaziektu Elisama, Semaia naupa Delaia, Akbor naupa Elnathan, Saphan naupa Gemaria, Hanania naupa Zedekia le lalhai po po chu an inṭhung a.

¹³Chun, Mikaia chun mipui na hrieta Barukin lekhabu chu a tiem laia a lo hriet thuhai po po chu anni kuoma chun a hrilfie ta a.

¹⁴Chuleiin, lalhai po po chun Kusi naupa Selemia, chu naupa Nethania naupa Jehudi chu Baruk kâwlah an tir a, “Mipuihai na hrieta lekha zuol i tiemna kha la la, hung chawi la, hung rawh,” tiin. Chuongchun, Neria naupa Baruk chun Lekhabu zuol chu a kutin a lâk a, an kuoma chun a hung ta a.

¹⁵Chun, anni chun a kuomah, “Tuhin ṭhung la, kan na hrieta hin tiem ta,” an ti a. Chuongchun, Baruk chun an na hrieta chun a tiem ta a.

¹⁶Chun, chuong thuhai po po chu an hriet chun, anni le anni chu an inṭi tuo seng ta a, chuongchun, Baruk kuoma chun, “Hieng thuhai po po hi lal chu hril ngei ngei kan tih,” an ti a.

¹⁷Chun, Baruk kuoma chun, “A baua inthawk chun hieng thuhai po po hi ieng tiziea ziek am i na, mi hril rawh,” tiin an indawn a.

¹⁸Baruk chun anni chu a dawn a, “A bauin hieng thuhai po po hi ka kuomah a hung hril a, kei chun lekhabua chun lekhatuiin ka lo ziek el a nih,” tiin.

¹⁹Chuongchun, lalhai chun Baruk kuoma chun, “Fe la, Jeremia le nang chu inbihmang ro, khaw lai am in um ti tukhawm inhriettir naw ro,” an ti a.

²⁰Chun, anni chu huong sûng tuollaia chun lal kuomah an va fe a; amiruokchu, lekhabu zuol chu lekhaziektu Elisama pindana khan an mâksan a; chuongchun, lal na hrieta chun thuhai po po chu an hril ta a.

²¹Chuongchun, lal chun Jehudi chu lekhabu zuol chu hung la dingin a tir a; ama chun lekhaziektu Elisama pindana inthawk chun a lâk suok a. Jehudi chun lal na hrieta le, a sîra ngîrhai lalhai po po na hrieta chun a tiem ta a.

²²Thla kuona a na, lal chu thlasik ina chun a ṭhung a, a hmaa chun meithuk chawklai hi a um a.

²³Chun, Jehudi chun phêk thum amanih, phêk li amanih a tiem phing chun lal chun chemtê hin a ât thlâk a, meithuka meiin lekhabu zuol chu a kâng zo vawng chenin, meithuka meia chun a pei lût pei ta a.

²⁴Anni chu an ṭi naw a, an silfênhai khawm an keithlêr bawk naw a, hieng thuhai hretu lal le a siehlawhai hrim hrim khawm chun.

²⁵Chu naw khawm Elnathan le Delaia le Gemaria chun lal kuoma chun lekhabu zuol chu raw lo dingin hnina an siem a, nisienlakhawm, anni chu a ngai naw a.

²⁶Chun, lal chun lal naupa Jerahmeel le, Azriel naupa Seraia le, Abdeel naupa Selemia chu lekhaziektu Baruk le zâwlnei Jeremia chu man dingin thu a pêk a; nisienlakhawm, LALPA chun anni chu a thup a.

²⁷Chun, Jeremia baua inthawka Barukin thu a ziekhai le, lekhabu zuol chu lal chun a raw zo vawng chun Jeremia kuomah LALPA thu chu a hung tlung a:

²⁸“Lekhabu zuol dang la nâwk la, Juda ram lal Jehoiakimin a raw tah, lekhabu zuol hmasaa um thu hmasahai po po kha ziek rawh.

²⁹Chun, Juda ram lal Jehoiakim chungthua chun hieng ang hin hril i tih; ‘LALPA chun hieng hin a tih: Babulon lal chu hung a ta, hi ram hi hung sukse ngei a ta, chutaka inthawk chun ramsa le mihriem khawm sukchavai a tih, tia, iengdinga hitaka hi ziek am in ni a?’ tiin, hi lekhabu zuol hi i raw ta chu a na.

³⁰Chuleiin, Juda ram lal Jehoiakim chungthua chun LALPA chun hieng hin a tih: David lalṭhungpha chunga ṭhung ding tukhawm nei naw ni a; chun, a taksa thi chu sûnah lumah, zânah zildeiah peihâwn nîng a tih.

³¹Chun, ama le a thla le siehlawhai chu an suolna leiin hrem ka ta, chun, an chunga le, Jerusalem hluotuhai chunga le, Juda rama mihai chunga chun, an chunga tlung dinga ka hril, thil ṭha nawhai po po kha intlungtir ka tih; nisienlakhawm, an la ngai naw rawp a,” tiin.

³²Chun, Jeremia chun lekhabu zuol dang chu a lâk a, Neria naupa Baruk, lekhaziektu kuoma chun a pêk ta a; ama chun Juda ram lal Jehoiakimin a lo raw tah lekhabua thuhai po po chu Jeremia baua inthawk chun a ziek ta a; chu naw khawm chu thu angkhat tamtakhai chu an kuoma belsain a um a.