Read Hmar JEREMIA 37 Bible Online

JEREMIA 37 - Hmar bible

JEREMIA 37

¹Chun, Jehoiakim naupa Konia aia Babulon lal Nebukadnezzarin Juda ram lala a lo siem Josia naupa Zedekia chun ro a rêl ta a.

²Nisienlakhawm, amain amanih, a siehlawhaiin amanih, chu rama mipuihai chun amani khawm, zâwlnei Jeremia hmanga a hril LALPA thuhai chu an ngai naw a.

³Chun, lal Zedekia chun Selemaia naupa Jehukal le, thiempu Maaseia naupa Zephania chu zâwlnei Jeremia kuomah, “Tuhin keini ta dingin, LALPA kan Pathien kuoma chun ṭawngṭai rawh”, ti dingin a tir ta a.

⁴Chuonglai chun Jeremia chu lung ina an sie ta naw leiin, mipuihai lai chun a lûtin a suok hlak a.

⁵Aigupta rama inthawk chun Pharao sipaihai chu an hung a; chun, Jerusalem inhuoltu Kaldaihai chun anni chanchin chu an lo hriet phing chun, Jerusalema inthawk chun an indar ta a.

⁶Chuongchun, LALPA thu chu zâwlnei Jeremia kuoma chun a hung tlung a;

⁷“LALPA Israel Pathien chun hieng hin a tih: Ka kuoma thu indawn dinga nang ka kuoma tirtu che, Juda ram lal kuoma chun hieng hin hril rawh: Ngai ta, Pharao sipaihai nangma ṭhangpui dinga hunghai chu, an ramah Aiguptaa bawk chun kîr nâwk an tih.

⁸Chuongchun, Kaldaihai hung nâwk an ta, hi khawpui hi hung do an ta, lâng an ta, meiin râwng an tih.

⁹LALPA chun hieng hin a tih: ‘Kaldaihai chun mi mâksan ta ngei an tih,’ tiin nang le nang inhlêm naw rawh; an fe hmang âwm si naw a.

¹⁰Nangma hung dotu che Kaldai sipaihai po po khawm chu lo that ta la khawm, anni laia chun mi hliemhai chau chu la umin, chuong khawm chun, mi tin chu mâni puon inhaia chun tho an ta, hi khawpui hi meiin râwng an tih,” tiin.

¹¹Chun, Pharao sipaihai ṭi leia Kaldai sipaihai chu Jerusalema inthawka an indar hnung chun,

¹²Jeremia chu Benjamin ramah va fea, chu hnam laia a chanvo chu la dingin, Jerusalema inthawk chun a suok ta a.

¹³Ama chu Benjamin dai kawtkhâra a um lai chun, vêngtu sipai hotu chutaka chun a lo um a, a hming chu Hanania naupa Selemia naupa Irija a nih; ama chun, “Kaldaihai kuomah în pe a nih,” tiin zâwlnei Jeremia chu a man ta a.

¹⁴Jeremia chun, “Thukhêl a nih; Kaldaihai kuomah kân pêk nawh,” a ta; nisienlakhawm, ama chun a ngai naw a; chuongchun, Irija chun Jeremia chu a man a, rorêltuhai kuoma chun a hung ṭhuoi ta a.

¹⁵Chun, rorêltuhai chu Jeremia chunga chun an lunginsen a, ama chu an vuok a, lekhaziektu Jonathan ina chun an khum ta a; chu chu lung inah an siem ta si a.

¹⁶Jeremia chu khur thima le kulbîngahai chun a hung chun, chutaka chun Jeremia chu ni tamtak a um a;

¹⁷chun, lal Zedekia chun mi a tir a, a hung ṭhuoi a, a ina chun lal chun a rûkin ân dawn a, a kuomah, “LALPA kuoma inthawkin thu a um?” a ti a. Chun, Jeremia chun “A um”, a ti a. “Babulon lal kutah pêkin i um ding a nih,” a ti bawk a.

¹⁸Chu nawa khawm lal Zedekia kuomah Jeremia chun, “Nanga chunga amanih, i siehlawhai chunga amanih, hi hnam chunga hin amanih khaw lai am ka suksuola lung ina i mi khum a na?

¹⁹I zâwlneihai, ‘Babulon lal chun hi ram amanih, nang amani khawm hung do naw ni,’ tituhai kha khaw lai am an um a?

²⁰Chun, tuhin lo hre ta, aw ka pu lal, ka hni che, ka hnina hi, ka ngên che, i hmaa hin pawm ni raw se: lekhaziektu Jonathan ina khan mîn kîr tir nâwk ta naw rawh, chuong naw chun thi rawi ka tih,” a ta.

²¹Chun, lal Zedekia chun thu a pêk a; Jeremia chu vêngtuhai kula chun an sie a, khawpui sûnga bei po po chu hmang vawng a ni chenin bei siemtuhai kawtthlêra inthawkin ni tin bei an pêk a. Chuongchun, Jeremia chu vêngtuhai kula chun a um zing ta a.