Read Hmar JEREMIA 41 Bible Online

JEREMIA 41 - Hmar bible

JEREMIA 41

¹Chun, thla sarinaa chun lal chi Elisama naupa Nethania, chu naupa Ismael le, lal hotu lientak pakhat le, ama kuoma mi sâwmhai le chun, Mizpaa chun Ahikam naupa Gedalia kuoma chun an hung ta a; chutaka Mizpaa chun bei dâm an fâk hmunkhat tâwl a.

²Chun, Nethania naupa Ismael le a kuoma mi sâwm umhai chu an tho a, Saphan naupa, Ahikam naupa Gedalia, Babulon lalin chu rama rorêltu dinga a sie chu kâwlhnâm leh an thaw a, ama chu an that ta a.

³Ismael chun Gedalia kuoma Juda umhai po po Mizpaa umhai le, Kaldai mi, chutaka um, indo mihai khawm chu a that vawng a.

⁴Chun, Gedalia chu a thata mi tukhawma an hriet naw ni hnina hnunga chun hieng hi a hung na;

⁵Mi ṭhenkhat Sekema inthawk dâm, Siloa inthawk dâm, Samaria inthawk dâmin mi sâwmriet zet, an khâkhmul vawa, an puonhai keithlêra, anni le anni chu inât a, an kuta bu thilinhlânhai le riminhnikhai chawiin, LALPA ina hung inhlân dingin an hung ta a.

⁶Chun, Nethania naupa Ismael chu Mizpaa inthawk chun, a fe malama ṭap pei pumin anni chu tuok dingin a fe suok ta a; chun, anni chu ân tuokpui chun an kuoma chun, “Ahikam naupa Gedalia kuomah hung ro,” a ti a.

⁷Chun, chuong ang tak chun a hung na, khawpui sûnga an hung phing chun Nethania naupa Ismael chun anni chu a that ta a, ama le a kuoma mi umhai chun anni chu khur sûnga chun an pei thlâk ta a.

⁸Chun, anni laia chun mi sâwm Ismael kuoma, “Keini chu mi that naw rawh; rama chun bu dâm, buṭei dâm, hriek dâm, khuoizu dâm thuphmangna khur chu kan nei si a,” tituhai chu an um a. Chuongchun, anni chu a hla ta a, an unauhai laia chun a that ve ta naw a.

⁹Chun, chu khur, Ismaelin Gedalia sîra mi a thathai ruong po po a pei thlâkna chu (chu chu Israel lal Baasa a ṭi leia lal Asain a lo siem kha a nih) Nethania naupa Ismael chun chu chu mi thathai chun a suksip ta a.

¹⁰Chun, Ismael chun Mizpaa mi dam la umhai po: lal naunuhmeihai le vêngtu pâwl hotu Nebuzaradanin Ahikam naupa Gedalia ân kawltir, Mizpa khuoa la um po po leh chun salin a man ta vawng a; Nethania naupa Ismael chun chuonghai chu sala ṭhuoiin Ammon mihai ram fethleng dingin a fe suok ta a.

¹¹Nisienlakhawm, Karea naupa Johanan le, ama kuoma um sipai hotuhai po po chun Nethania naupa Ismaelin thil ṭhanaw a thawhai po po chu an lo hriet chun,

¹²mi po po chu an ṭhuoi a, Nethania naupa Ismael chu do dingin an fe suok ta a; ama chu Gibeona tuipuihai kâwla chun an va hmu a.

¹³Chun, Ismael kuoma mipui um po pohai chun Karea naupa Johanan le sipai hotuhai po po le a kuoma umhai po po chu an hmu chun an lâwm ta êm êm el a.

¹⁴Chuongchun, Mizpaa inthawka Ismael sal intâng dinga a ṭhuoihai po po chu an inlêt a, an hung kîr a, Karea naupa Johanan kuoma chun an fe tâwl ta a.

¹⁵Amiruokchu, Nethania naupa Ismael chu mi pariet leh Johanana inthawk chun a suokthleng a, Ammon mihai kuoma chun a fe ta a.

¹⁶Chun, Karea naupa Johanan le, a kuoma sipai hotu umhai po po chun, Nethania naupa Ismaela inthawka mipui la um sun an lâk dawkhai po po chu, Ahikam naupa Gedalia le, indo mihai, nuhmeihai, naupanghai le, mitillâkhai, Gibeona inthawka a hung ṭhuoi nâwkhai a that hnunga, a lâk suokhai chu Mizpaa inthawk chun an ṭhuoi ta a.

¹⁷Chuongchun, an fe a, Kaldaihai leia Aiguptaa lût dinga fe dingin Bethlehem kâwla Geruth-kimhama[3] chun an chêng ta a;

¹⁸Ahikam naupa Gedalia Babulon lalin chu ram chunga rorêltu dinga a sie kha Nethania naupa Ismael khan a that leiin anni chu an ṭi êm êm a.