Read Hmar JEREMIA 43 Bible Online

JEREMIA 43 - Hmar bible

JEREMIA 43

¹Chun, hieng thuhai po po, LALPA an Pathienin an kuoma ama a tirna, LALPA an Pathien thuhai po po chu mipuihai po po kuoma Jeremia chun a hril zo chun,

²Hossia naupa Azaria hai, Karea naupa Johanan hai, mi chapo po pohai chun Jeremia kuomah thu an hril a “Thukhêl i hril dêr a nih: ‘Chutaka va mikhuol dingin, Aigupta rama chun in fe ding a ni nawh,’ ti dingin LALPA kan Pathien chun a hung tir naw che a;

³Neria naupa Baruk chun an mi that theina ding le, Babulona sala an mi ṭhuoi theina dingin Kaldaihai kuta mîn hlân dingin, nang hi kan chunga chun a hung tir che a ni hi,” tiin.

⁴Chuongchun, Karea naupa Johanan hai, sipai hotuhai po po le mipuihai po po chun Juda rama chêng zing ding thu LALPA râwl chu an awi naw a.

⁵Chuongchun, Karea naupa Johanan le, sipai hotuhai po po chun Juda rama la um sunhai, Juda rama hnawthmang an nina hnamhaia inthawka hung kîr nâwkhai,

⁶pasalhai, nuhmeihai, naupanghai, lal naunuhmeihai le, mi tin Nebuzaradanin Saphan naupa Ahikam, chu naupa Gedalia le zâwlnei Jeremia le, Neria naupa Baruk kuoma a mâksanhai chu an ṭhuoi a;

⁷Aigupta rama chun an fe ta a; LALPA râwl chu an awi si naw a; chuongchun, Tahpanhes chenin an fe ta a.

⁸Chun, Tahpanhesa chun Jeremia kuomah LALPA kuoma inthawka thu chu a hung tlung a;

⁹“Lung lientak takhai i kutin la la, Juda mihai mithmua chun, Tahpanhesa Pharao in lûtna bula um, ṭêklei siemna hmuna a chârna chira chun phûm rawh;

¹⁰chun, an kuoma chun, ‘Sipaihai LALPA, Israel Pathien chun hieng hin a tih: Ngai ta u, mi tir ka ta, ka siehlaw Nebukadnezzar Babulon lal chu hung ṭhuoi ka ta, kha lung ka phûmhai chunga khan a lalṭhungpha chu innghat a tih; chuong chunga chun a lal puon in chu zar a tih.

¹¹Ama chu hung a ta, Aigupta rama chu hung hrem a ta, thinaa pêk dinghai chu thinaah, sala intâng dinghai chu salah, kâwlhnâma dinghai chu kâwlhnâm kuoma pêk nîng an tih.

¹²Chun, Aigupta pathienhai ina chun mei sêm a ta; ama chun râwng a ta, salah ṭhuoi hmang a tih; berâmpu chu ama silfêna ân chei angin, ama chu Aigupta ram chun inchei a tih; chutaka inthawk chun thlamuongtakin fe suok tâng a tih.

¹³Chun, Beth-semes sûtpuihai Aigupta rama um khawm chu sukthliek bawk a ta, Aigupta ram pathienhai inhai khawm chu meia raw ni bawk an tih,’ a tih, ti rawh,” tiin.