Read Hmar JEREMIA 47 Bible Online

JEREMIA 47 - Hmar bible

JEREMIA 47

¹Pharaoin Gaza a rûn hmaa, Philistin mihai chungthua zâwlnei Jeremia kuoma LALPA thu hung tlung chu.

²LALPA chun hieng hin a tih: Ngai ta u, hmârtienga inthawkin tuihai a hung lien a, vadung kuong lêt hung nîng a ta, ram le a sûnga umhai le khawpui le a sûnga umhai le chun hung lêtkhum a ta; mihai chu khêk an ta, ram hluotuhai po po ṭap inrûm an tih.

³A mi hrâthai ketin tet rîka le, a sakawr tawlailîrhai tlân rîka le, tawlailîr kehai innâwt rîka chun pahai chu an ṭi a, an nauhai enkai theilo lêkin an kuthai a zawi thla a;

⁴ṭhangpuitu la um taphawthai chu Tura le Zidona inthawka sât thlâk dingin, Philistin mihai po po suksietna dinga ni hung tlung chu a ni leiin, Kaphtor thlierkâra la umsunhai, Philistin mihai chu LALPA chun a sukbohmang ding a ni si a.

⁵Gazaa chun châtvaina a hung tlung a, an phairuom la um sun, Askelon hlak chu iengkhawm lova siem a ni ta a; chun, nang le nang ieng chen am în ât ding a na?

⁶Aw nang LALPA kâwlhnâm, i châwl ṭawk ṭawk hma po chu ieng chen am nîng a ta? nang chu i bâwma chun inthun nâwk el rawh, châwl la, um ṭawk ṭawk rawh.

⁷ LALPA chun thaw ding a pêk si che chun iengtin am châwl thei i ta? Askelon le tuisuoriet panga umhai thaw dingin a ruot che a nih.