Read Hmar JEREMIA 48 Bible Online

JEREMIA 48 - Hmar bible

JEREMIA 48

¹Moab chungthu chu, Sipaihai LALPA, Israel Pathien chun hieng hin a tih “Nebo chu a chung a rik! suksiet a ni ta si a; Kiriathaim chu sukzakin a um a, lâkin a um ta a; Misgab[4] chu sukzakin a um a, sukchimin a um ta bawk a.

²Moab inpâkna chu a um ta naw a; Hesbona chun a chungah thil ṭhanaw chu an rawt a, ‘Thaw ro, hnam ninaa inthawkin ama chu tuithlâr ei tiu,’ tiin. Nang khawm Aw Madmen, sukto ṭawk la nîng i tih; kâwlhnâmin hung hnawt bawk a ti che.

³Horonaima inthawka khêkri chu, suksietna le sukbohmangna nasatak a ni a!

⁴Moab chu suksiet a ni ta a, a têhai chun khêkri hriet dingin an hung thaw a.

⁵Luhith hang fenaa chun ṭap pum zing zingin an hang fe hlak ding a ni si a; Horonaim zuk fenaa chun sukbohmangna khêkri rinum tuor ri chu an hriet si a.

⁶Tlân hmang unla, in hringnahai chu sanhim unla, thlalêra sabengtung ang chu ni unla.

⁷I sinthawhaia le i roa chun i ringna în nghat leiin, nang khawm man nîng i ta; Kemos khawm chu sala intâng dingin fêng a ta, a thiempuhai le a rorêltuhai leh.

⁸Khawpui tina chun suksetu hung tlung a ta, khawpui ieng khawm suokthleng naw ni, phairuomhai khawm chu suksiet nîng a ta, phaizâwl khawm chu sukbohmang nîng a tih; LALPAIN a hril ta angin.

⁹Moab kuoma chun a vuong hmang theina dingin thlahai pe la: a khawpuihai chu râusan a ni ding a na, mi a chêng hrim hrim um lovin.

¹⁰LALPA sin hmusittaka thawtu chu ṭawngsephurin um raw se; thisen insuo dinga a kâwlhnâm la kîrtu chu ṭawngsephurin um bawk raw se.

¹¹Moab chu a tleirâwl laia inthawk ta khan nuomtâwla um hlak a ni a, uoin nawng ang elin dettakin a um zing a, bêl pakhata inthawka bêl dangah bun ruokin a la um ngai naw a, sala khawm a lân tâng bawk nawh; chuleiin, amaa rim inhnikna chu a la um zing a, a rim inhnikna chu suksiet a la ni nawh.

¹²“Chuleiin, ngai ta u, nihai chu a hung tlung mêk, LALPA chun a tih; ama kuoma chun bunthlatuhai chu tir ka ta, anni chun ama chu bunthlâng an tih, a bûrhai chu sukruok an ta, a bûrhai chu suknawi dar an tih.

¹³An ringtak Bethel chu Israel sûngkaw ta dinga inzapuium a ni ang khan, Moab chu Kemos chun inzapui a tih.

¹⁴‘Mi thilthawthei, indonaa mi hrât khawkhênghai ei nih,’ ieng tin am in ti thei a?

¹⁵Moab chu suksietin a um a, a khawpuihai hlak chu meiin a khu a, a tlangvâlhai hlak chu that thlâk zo an ni ta a, Laltak, a hming sipaihai LALPA chun a tih.

¹⁶Moab lunginzîngna ding chu a hung tlung vâng vâng ta a, sukrinuma a umna ding khawm chu a hung inhmaw tah.

¹⁷Nangni a vêla um po pohai, ama chu ṭa unla, a hming hretuhai po po chun, ‘Lalhmawl ngartak el, hmawl mawitak el chu iengtiziea tliek el am a na?’ ti ro.

¹⁸“Aw nang Dibona chêng naunuhmei, i ropuinaa inthawkin hung thla la, dangchârin ṭhung rawh; Moab suksetu chu i chungah a hung tlung a, i kul nghethai chu a suksiet ta si a.

¹⁹Aw Aroer hluotuhai, lampui sîrah ngîr unla, enthlit ro; a suokthleng ta le, a tlân hmanghai kha indawn unla, ‘Ieng am thaw a ni ta leh?’ ti ro.

²⁰Moab chu sukzakin a um a; suksiet a ni ta si a; ṭap inrûm unla, ṭap ro; Arnona chun va hril unla, Moab suksieta a um tâk thu chu.

²¹“Phaizâwl ram chunga chun rorêlna a hung tlung a; Holon chunga dâm, Jahza chunga dâm, Mephaath chunga dâm;

²²Dibon chunga dâm, Nebo chunga dâm, Beth-diblathaim chunga dâm;

²³Kiriathaim chunga dâm, Bethgamul chunga dâm, Beth-meon chunga dâm;

²⁴Kerioth chunga dâm, Bozra chunga dâm; Moab rama khawpui hla le hnaiahai po po chunga dâm chun.

²⁵Moab ki chu sât thlâk a ni a, a bân khawm chu suktliek a ni tah, LALPA chun a tih.

²⁶“Ama chu vairui ta u, LALPA chu dodâlin ama le ama ân chawimawi si a; Moab chu ama luoka ngei chun inbuol a ta, ama chu mi hrilsîm hung ni bawk a tih.

²⁷Nanga ta ding chun Israel chu hrilsîm a ni naw am a nih? Inruhai lai hmu a ni am a nih? Ama thu chu i hril poleh, lu i lei el si a.

²⁸“Aw Moab hluotuhai, khawpuihai chu mâksan unla, râwlahai chun va chêng ro; pûk bau sîra a bu septu vâṭhu ang chu ni ro.

²⁹Moab chapona chu kan hriet a, a chapo êm êm el a; ân suksângna le, a chapona le, a uongna le, a lungrila uongthuongna le chun.

³⁰A lunginsenna chu ka hriet a, LALPA chun a tih; iengkhawm a ni naw a; a chapona chun iengkhawm a thawdawk nawh.

³¹Chuleiin, Moab ta ding chun ka ṭap inrûm ding a nih; anih, Moab po po ta ding chun khêk ka tih; Kir-heres mihai chu ka ṭa ding a ni si a.

³²Aw Sibmaa grêphrui, Jazer ta dinga ṭap nêk hmana nasa khan i ta dingin ṭap ka ta; i kauhai chun tuipui râl an kai a, Jazer chu an va tlung hiel a; i nipui theihai chunga le i grêp rahai chunga chun suksetu a tlung ta a.

³³Moab rama inthawk le lo rahlâwkna hmunhaia inthawk chun hlimna le lâwmna dâm chu lâk hmang a ni ta a; uoin sâwrna khurhaia inthawk chu uoin chu kân kangtir ta a; tukhawma khêk pumin sirsâwr naw ni hai a; khêk ri khawm chu lâwmna khêk ri ni naw ni.

³⁴“Hesbona inthawka Elea chen le, Jahaz chen rauin khêkria inthawk chun an râwl an insuo a, Zoara inthawka Horonaim chen, Eglath-selesia chenin; Nimrim vadunghai khawm chu râusanin a um ding a ni si a.

³⁵Chu nawa khawm, Moaba chun bâwlhmuna thilinhlân le, ama pathien kuoma riminhnik râwtu chu suktâwp ka tih, LALPA chun a tih.

³⁶Chuleiin, Moab ta dingin ka lung chu theihle angin ân ri a, Kirheresa mihai ta dingin ka lung chu theihle angin ân ri a nih; chuleiin, tamtak a ihmu tahai khawm chu a bohmang tah a nih.

³⁷“Lu tin chu a kâwk a, khâkhmul tin kildein a um a; kut po pohai chun thil chepnawi an chawi a; kâwnghai chunga chun saiip puonhai a um bawk a.

³⁸Moab in chungsâng tinahai le, kawtthlêrahai hmun tinah ṭap ri a um a; Moab chu bêl ditna umlo ang chun ka sukkhawi ta a, LALPA chun a tih.

³⁹Ieng anga sukkhawi am a na? Ieng angin am an ṭap inrûm a? Moab chun inzak leiin iengtin am a hnunginnghat el a; chuongchun, Moab chu a vêla umhai ta ding chun lungsukzîngna le hrilsîm nîng a tih.

⁴⁰“LALPA chun hieng hin a ti si a: Ngai ta u, mupui angin vuong a ta, Moab chunga chun a thlahai zâr a tih.

⁴¹Kerioth chu lâkin a um a, kul dethai chu maktiin an um a; chu ni chun Moab mi thilthawthei lungril chu nuhmei na tuor lai lungril ang nîng a tih.

⁴²Chun, Moab chu LALPA dodâla ân chawimawi leiin, hnam ninaa inthawka sukbohmang nîng a tih.

⁴³Ṭitna le, khurthim le, châng chu i chungah a um, Aw Moab ram hluotu, LALPA chun a tih.

⁴⁴Ṭitnaa inthawka tlân chu khurthima chun tlâng a ta, khurthima inthawka suok chu chânga chun âwk a tih; anni hremna kum chu ama chungah, Moab chunga ngei chun, kân tlungtir ding a nih, LALPA chun a tih.

⁴⁵Chuong a tlân hmanghai chu hrâtna nei lovin, Hesbon hlima chun an ngîr a, mei chu Hesbona inthawk chun a fe suok a, meichawk chu Sihona inthawkin a fe suok a, Moab ram sîr le, chawkbuoituhai lua lallukhum chu a kâng hmang ta a.

⁴⁶Aw Moab, i chung a va rik de! Kemosa mihai chu hmanglo an nih, i naupasalhai chu sala ṭhuoiin an um a, i naunuhmeihai khawm chu salah an intâng si a.

⁴⁷Nisienlakhawm, Moab sal intângna chu nakie tieng niahai chun la hung la kîr nâwk ka tih, LALPA chun a tih”tiin. Moab chunga rorêlna chu chuong chen chu a nih.