Read Hmar JEREMIA 49 Bible Online

JEREMIA 49 - Hmar bible

JEREMIA 49

¹Ammon mihai chungchâng thu chu: LALPA chun hieng hin a tih: “Israel hin naupasal a nei naw a ni maw? Rohluotu ding a nei naw maw? Chuong a ni si chun ieng dinga Milkom hin Gad hi a nei a, a mihai chu khawpuia hai chun chêng am an ni a?

²Chuleiin, ngai ta u, nihai chu a hung tlung mêk, LALPA chun a tih: Ammon thlahai Rabba chunga chun indona ṭhâwnglâwk ri chu hriet ngei dingin inumtir ka ta; chuongchun, râusan hmun pâwng el hung nîng a ta; a naunuhmeihai chu meiin kâng an tih; chuongchun, ama lo neitu chu Israel chun nei ve thung a ta, LALPA chun a tih.

³Aw Hesbon ṭap inrûm rawh, Ai chu suksiet a ni ta si a; nangni Rabba naunuhai, khêk unla, saiip puon inbel unla, ṭap unla, a daihai laia chun hnungtieng hmatieng tlân inlawn ro; Milkom chu a thiempuhai leh a rorêltuhai leh sala intâng dingin a fe ding a ni si a.

⁴Iengdinga phairuomhaia chun în chawimawi am a na? I phairuomhai chu an luonghmang zo tah, Aw nang naunu hnungtawl, ‘Tu am ka kuomah hung a ta?’ tia mâni rohai ringtu.

⁵Ngai ta, i chunga chun ṭitna ka hung intlungtir ding a nih, sipaihai PATHIEN, Lalpa chun a tih: i vêla umhai po poa inthawk chun inumtir ka ta; mi tin chu hnawt suok letdêr an ti cheu a, ân vâkhmang tahai chu kei khâwmtu ding tukhawm um naw ni hai.

⁶Nisienlakhawm, Ammon mihai sal intângna chu hung la kîr nâwk ka tih, LALPA chun a tih”tiin.

⁷Edom chungthu, Sipaihai LALPA chun hieng hin a tih: “Temana chun varna a um ta naw a ni maw? Mi vara inthawka thurâwn an bohmang ta a ni maw? An varna chu a bohmang a ni ta maw?

⁸Tlân hmang unla, hnung kîr unla, chêng inthûk unla, Aw Dedan hluotuhai, ama chunga chun Esau lunginzîngna chu ka hung intlungtir ding a ni si a, ama ka hrem hun ngei chu.

⁹Grêp ra lotuhai chu i kuomah hung hai sienla, grêp hmu ṭhel ṭhenkhat an mâksan naw ding maw? Zânah inru hung sienla, an dittâwk an nei hmakhat chu an suksiet naw ding maw?

¹⁰Esau chu ruoka ka sie a na, ân bîkna hmunhai chu ka suklangpêk a, ama le ama chu inthup thei naw nih; a chi chu suksiet a na, a unauhai le a tuolbâwmhai le, ama chu a um ta nawh.

¹¹I nau, pa bohai kha mâksan la, keiin hringin hlâng ka tih; chun, i hmeithai khawm chun mi ring bawk raw se.

¹²“LALPA chun hieng hin a ti si a: Ngai ta u, an kuoma no dâwn phâk nawhai chun dâwn ngei ngei an ta; anleh nang chu hrem lo dinga um hrim hrim am i nih? Hrem lo ni naw tawp i tih; i dâwn ve ngei ngei ding a nih.

¹³Keima insâlin kân khâm ta si a, LALPA chun a tih: Bozra chu makti ding el nîng a ta, thusekawk, suksieta um, ṭawngsephur nîng a tih; chun, chutaka khawpuihai po po chu kumkhuoa sie ni bawk an tih.

¹⁴LALPA kuoma inthawkin chanchin lâwmum ka hriet a; ‘Nangni le nangni hung inkhâwm unla, ama hung do unla, indonaah hung tho ro,’ tiin, aiawtu pakhat chu hnamhai laia chun tir a nih.

¹⁵Ngai ta, hnamhai laia a china le, mihai laia hmusitumah ka siem ta che a.

¹⁶I ṭiumna chungthua chun, i lungril chapona chun a hlêm che a nih; Aw nang lungpui kak kârhaia chêngtu, muol insângnahai cheltu: i bu chu mupui bu anga insânga chun sep la khawm, chutaka inthawk chun ka hung sukhnuoi ding che a nih, LALPA chun a tih.

¹⁷“Chun, Edom khawm chu maktia um ding el ni bawk a ta, mi a fe khêltu tinhai chun mak tîng an ta; a sietna po poa chun inchek an tih.

¹⁸Sodom le Gomorra le chu kâwl vêla khawpuihai suksiet ang khan, chutaka chun tukhawm chêng naw ni hai, tukhawm inzinah va fe bawk naw ni hai, LALPA chun a tih.

¹⁹Ngai ta u, ama chu tlatna hmun pângngaia chun Jordan vadung fâwna inthawk chun sakeibaknei ang elin hung a ta; amiruokchu, ama kuoma inthawk chun intlânsiettir vak ka tih; chun, mi tukhawm thlanga um chu, ama chunga chun ruot ka ta, tu am keia ang an um a? Tuin am hun mi ruotpêk a ta? Berâmpu ka hmaa ngîr ding chu tu am a na?

²⁰Chuleiin, Edom khaw chungthua LALPAIN thurâwn a ilâktak le, a thiltum, Teman hluotuhai chunga lo tum ta chu lo ngai ta u; matheilovin, anni chu ran ruol têhai hnûk hmangin um ngei ngei an ta an chêngna chu anni irâusanin siempêk a tih.

²¹An tlûk ria chun hnuoi chu ân thin a; an khêk ri chu Tuipui Sena chun hriet a na.

²²Ngai ta u, hung suok a ta, mupui angin vuong a tih, chun, a thlahai chu Bozra chunga chun phar a ta; chun, chu nia chun Edoma mi thilthawtheihai lungril chu nuhmei na tuor lai lungril ang nîng a tih” tiin.

²³Damaska chungthu chu. Hamath chu ân zak, Arpad leh; chanchin ṭha lo an lo hriet a, an intuihmang ta si a; tuisuoriet infâwn re thei lo angin an buoi a.

²⁴Damaska chu a hung hrât naw a, tlân hmang dingin ân her a; inthinnain ama chu a man a; thuokdawngna le lungngaium chun ama a chel tlat ta a; nuhmei nauhase nat tuor ang elin.

²⁵Iengtiziea inpâkna khawpui, ka hlimna khawpui hi nghatsana um am a na?

²⁶Chuleiin, a tlangvâlhai chu a kawtthlêrahai chun tlûng an ta, chu ni chun indo mihai po po khawm chu sukto ṭawk ṭawk nîng an tih, sipaihai LALPA chun a tih.

²⁷Damaska banga chun mei sêm ka ta, Benhadad lal inhai khawm chu kâng hmang vawng a tih.

²⁸Kedar le Hazor ram Babulon lal Nebukadnezzarin a rûnhai chungthu chu. LALPA chun hieng hin a tih: “Tho unla, Kedara chun hang fe ro, saktienga thlahai chu hang sukse ro.

²⁹An puon inhai le an ran ruolhai chu lâng an ta; an ta dingin an puonhai, an bûr le bêlhai po po le an sanghâwngseihai po po ṭhuoi hmang an tih; chun, an kuoma chun, ‘Kil tina ṭitna ruok a nih,’ tiin mi khêk an tih.

³⁰Tlânse unla, hlatakah invâk unla, tlumhmang dai ro, Aw Hazor hluotuhai, LALPA chun a tih; Babulon lal Nebukadnezzar chun in chunga thurâwn a siem ta a, in chunga thiltum a nei ta si a.

³¹Tho unla, hnam nuomsipa khawsa le pawisak hrim nei lo an khâta chênga, dai kawtkhâr amanih, kawtkhâr thîrhai amani khawm nei lo hai chu thaw ro, LALPA chun a tih.

³²Chun, an sanghâwngseihai chu râllâkthilhai nîng an ta, an ran ruolhai khawm chu râllâksum ni bawk an tih; chun, barêp vawhai chu kâwlkil po poah sukdar ka tih, chun, anni kil tina inthawk chun an lunginzingna ding chu hung intlungtir ka ta, LALPA chun a tih.

³³Chun, Hazor chu sihalhai ta dinga chêngna hmuna le, kumkhaw râusan nîng a ta, chutaka chun tukhawm chêng naw ni hai a, mihriem nau tukhawm chutaka chun inzin khawm vân zin bawk naw ni” tiin.

³⁴Juda lal Zedekia rorêl ṭantir lai Elam chungthua zâwlnei Jeremia kuoma LALPA thu hung tlung chu:

³⁵“Sipaihai LALPA chun hieng hin a tih: Ngai ta u, an thilthawtheina laili Elam thalngul chu sukthliek ka tih.

³⁶Chun, Elam chunga chun vân hmun palihaia inthawka thli palihai chu hung inhrângtir ka ta, chu thli fena tienga chun anni chu sukdar vawng ka tih, Elama inthawka hnaw dawkhai tlung nawna hnam hrim hrim um naw ni hai.

³⁷Chuongchun, Elam chu an hmêlmahai hmaa beidawng dingin siem ka ta, an hringna zawngtuhai hmaa le chun. Chun, an chunga chun thil ṭha naw, ka lunginsenna ṭiumtak chu hung intlungtir ka tih, LALPA chun a tih; chun, an hnunga chun kâwlhnâm inhnawttir ka ta, anni chu ka sukbohmang vawng hmakhat chun;

³⁸chun, Elama chun ka lalṭhungpha chu inṭhut ka ta, chutaka lal le rorêltuhai chu sukbohmang ka tih; LALPA chun a tih.

³⁹Amiruokchu, ni nuhnungahai chun hieng hi hung nîng a ta; Elam sal intângna chu hung la kîr nâwk ka tih, LALPA chun a tih”tiin.