Read Hmar JEREMIA 50 Bible Online

JEREMIA 50 - Hmar bible

JEREMIA 50

¹Zâwlnei Jeremia hmanga, Kaldaihai ram chungthu, Ba- bulon chungthua LALPA thuhril chu:

²“Hnamhai laia chun hril la, puong rawh, chun, puonzâr chu khai la, puong la, thup naw rawh, ‘Babulon chu lâkin a um a, Bêl chu sukzak a na, Merodak chu a beidawng a, a milimhai po po chu sukzakin an um a, a milimhai chu an beidawng zo tah,’ ti rawh.

³Hmârtienga inthawk chun hnam pakhat a ram chu râusana siema tukhawm chêng lo dinga siem dingin a hung mêk a; an tlânse a, mihriem le ramsahai khawm chu, an fe hmang zo ta a.

⁴Chuong niahai chun, chuong hunahai chun, LALPA chun a tih: Israel thlahai chu hung an ta, anni le Juda mihai chu a ruolin hung an ta; an ṭap malamin hung an ta, LALPA an Pathien chu zawng an tih.

⁵Hma sawngin Zion chu râwn an ta, ‘Hung ve ro, theinghila um ta ngai lo ding chatuon thuthlung chun LALPA chu hung zawm ve ro khai,’ tîng an tih.

⁶“Ka mihai chu berâm inhmanghai an lo ni ta a, an vêngtuhai chun anni chu tlângahai chun inherhmangtirin, an ṭhuoi hmang a; tlânga inthawkin muola dâm chun an fe a, an riekna hmun chu an theinghil ta a.

⁷A hmu taphawthai hlak chun anni chu an fâkzo a, an hmêlmahai chun, ‘Thudik umna LALPA, an thlatuhai beiseitak, LALPA chunga chun thil an suksuol lei a nih, ei sukpawi nawh,’ an ti a.

⁸Babulona inthawk chun tlânsuok unla, Kaldaihai rama inthawk chun fe suok unla, kêl ruol hmaa kêlchal ang ni ro.

⁹Ngai ta u, hmârtieng rama inthawka hnam ropuitak inkhâwm chu Babulon hung rûn dingin hung chawktho ka ta, in hungtir ka tih; a chunga chun hung intlar an ta; chutaka inthawk chun lâkin um a ta, an thalhai chu mi hrât indo thiemtak a thlâwna kîr nâwk ngai naw ang a nih.

¹⁰Chuongchun, Kaldai chu râllâk sum hung nîng a ta, ama suksetuhai taphawt chu lungawi êm êm an tih, LALPA chun a tih.

¹¹Aw nangni ka rochan hung rûntuhai, in hlima in lâwm lei le, sazukpui bu chilse a, sakawr hrâttak inhrâm anga in tha a fân leiin; in nu chu nasatakin inzak a tih;

¹²nangni neitu cheu chu buoi a ta, ngai ta u, hnam po poa hnuoihnung tak, thlalêr le, ram ṭâwl le fienriel hmun nîng a tih.

¹³LALPA lunginsenna lei chun hluoin um naw ni a, a pumpuia râusan nîng a ta, mi tin Babulon fekhêltuhai phawt chun mak tîng an ta, a sietna po poa chun inchek an tih.

¹⁴Babulon chu a vêlin nangni khawma intlar khum ro, thalngul kuoituhai, ama chu kâp unla, thal chu ren naw ro, LALPA chungah thil a lo suksuol ta si a.

¹⁵A vêlin ama chu khêkkhum unla; ama chu a hung inpêklût ta a, a kulhai chu a chim a, a banghai chu sukchim an na. Lalpa phubalâkna a ni si a; ama chunga chun phuba la unla, amain a lo thaw ta ang khan a chunga khawm thaw ve ro.

¹⁶Babulona inthawk chu chi thetu chu sât thla unla, busîk laia kâwite hmangtu le chun; nêksâwrna kâwlhnâm ṭi leiin mi tin chu mâni mihai tiengah kîr seng an ta, mi tin chu mâni rama seng chun tlân an tih.

¹⁷“Israel chu berâm indar a nih: sakeibakneihai chun ama chu an lo hnawt hmang ta a; a hmasatak chun Assuria lal chun anni chu a fâkzo a; a tâwpah Babulon lal Nebukadnezzar hin a ruhai chu a sukthliek ta a.

¹⁸Chuleiin, sipaihai LALPA Israel Pathien chun hieng hin a tih: Ngai ta u, Assuria lal ka hrem ang bawk khan Babulon lal le a ram chu ka hrem ding a nih.

¹⁹Israel chu a tlatna hmuna chun hung ṭhuoi nâwk ka ta, Karmel le Basana chun tlâng a ta, a thla chu Ephraim le Gilead tlângahai chun lungawi tâwk tâng a tih.

²⁰Chuong niahai chun, chuong pha chun, LALPA chun a tih: Israel suolna chu zawng nîng a ta, iengkhawm um naw ni; chun, Juda suolna khawm chu hmu ni ta naw ni a; a mahla anga ka hla tahai chu ka ngaidam ding a ni si a.

²¹“Merathaim ram chu, chu ngei chu, Pekod hluotuhai le chun hang rûn ro; anni chu that unla, sukbohmang vawng ro, LALPA chun a tih: thu ka pêk ang tak cheu chun thaw unla.

²²Suksietna ropuitak le, indona ri chu rama chun a um a.

²³Hnuoi chung po po tubau iengtiziea tlieka innawi el am a ni aw! Iengtiziea Babulon chu hnamhai laia chun râusana um el am a ni aw!

²⁴I ta dingin châng ka kam a, i âwk a ni tah, aw Babulon, i lo inring naw a, LALPA chu i kal leiin hmu suokin i um a, manin i um an tah.

²⁵LALPA chun a râlthuom siekhâwmna chu a hawng a, a lunginsenna hriemhreihai chu a hung lâk suok a, LALPA sipaihai LALPA chun Kaldaihai rama chun thaw ding a nei si a.

²⁶Kil tina inthawk chun ama chu hung rûn unla, a siekhâwmna inhai chu hawng unla, ama chu pil dêng pâwng angin dêng pâwng unla, sukse letdêr ro; a ieng iengkhawm hlain um naw raw se.

²⁷A bâwngchalhai po po chu that vawng unla, sa thattu kuomah infetir ro; an chung a va rik de! an ni, anni hung hremna hun chu a hung tlung ta si a. Babulon rama inthawka tlânsea suokthlenghai râwlhai chu e!

²⁸“LALPA ei Pathien phubalâkna a biekin phubalâkna ngei chu Ziona hril ding a nih.

²⁹“Thalkâptuhai, thalngul kuoi- hai po po chu Babulon chunga chun ko khâwm ro; a vêl el chun riekngha unla, chutaka inthawk chun tukhawm insuokthlengtir naw ro; a sinthaw ang pei chun ama chu thung unla, a lo thaw ta ang tak khan ama chungah thaw ve ro; LALPA chungah, Israel Mi Inthieng chunga chun a lo chapo ta si a.

³⁰Chuleiin, a tlangvâlhai chu a kawtthlêrahai chun tlûng an ta; chu ni chun a mi indo mihai po po khawm chu sukto ṭawk ṭawk nîng an tih, LALPA chun a tih.

³¹Ngai ta, nang ka dodâl che a nih, Aw nang mi chapo, LALPA, sipaihai LALPA chun a tih; i ni, ka hung hremna ding che ni chu a hung tlung mêk si a.

³²Chun, mi chapo chu insui a ta, tlûng a tih, tukhawma ama chu keitho naw ni hai; a khawpuiahai chun mei sêm ka ta, ama vêla umhai po po chu kâng hmang vawng a tih.

³³“Sipaihai LALPA chun hieng hin a tih: Israel mipuihai le Juda mipuihai chu nêksâwrin an um rêl a; anni sala mantuhai taphawt hlak chun an chel det tlat a, an infetir nuom naw a.

³⁴Anni sanhimtu chu a hrât a, a hming khawm, sipaihai LALPA a nih, ama chun an chungthu chu ṭan tlat a ta; hnuoi chunga chun châwlna a pêk thei a, Babulon hluotuhai ruok chu a sukto ṭawkṭawk nawna dingin.

³⁵Kâwlhnâm chu Kaldaihai chunga dâm, Babulon hluotuhai chunga dâm, a rorêltuhai le a mivarhai chunga chun a um a nih, LALPA chun a tih.

³⁶Chapohai chunga chun kâwl- hnâm chu a um a, invêtpui an ta, kâwlhnâm chu a mi thilthawtheihai chungah a um a, beidawng an tih.

³⁷Kâwlhnâm chu an sakawrhai chunga dâm, an sakawr tawlailîrhai chunga dâm, ama sûnga mi chilakhai po po chunga dâm chun a um a, chuongchun, anni chu nuhmei ang el nîng an ta, kâwlhnâm chu a ro inhai chunga chun a um a, inrûkin um a tih.

³⁸A tuihai chunga chun kangna a um a, kangchat an tih; milem kerfâwm ram a na, milimah an invêt ri ngawt el a ni si a.

³⁹“Chuleiin, thlalêr ramsa hrânghai chu sihalhai leh chutaka chun chêng an ta; vangalsânghai khawm chêng an ta; kumkhuoin hluo hrim hrim ni ta naw ni; suona inthawka suon dang chena khawm hluo ni naw ni.

⁴⁰Pathien chun Gomorra le Sodom le a vêl khuohai chu a pei thlâk lai ang khan, LALPA chun a tih: chutaka chun mi chêng naw ni hai a, mihriem nau tukhawm chutaka chun inzin khawm vân zin naw ni hai.

⁴¹Ngai ta u, hmâr tienga inthawkin hnam pakhat an hung a, hnam ropuitak el, lal tamtakhai le chun leihnuoi kilkhâwrtaka inthawk chen chun chawktho nîng an ta.

⁴²Anni chun thalngul le fei an chawi a; an rilo hle a, lunginsietna an nei nawh; an râwlhai chu tuisuoriet angin ân rûm a, sakawr chungahai chun an chuong a; Aw Babulon naunu, nangma chunga chun, indonaa mi angin, mi tin chu an intlar a nih.

⁴³Babulona lal chun an ri chu a lo hriet a, a kuthai chu a hung chau a, ama chu lunginzîngna chun a man ta a, nuhmei nauhase nat tuor angin a na ta a.

⁴⁴“Ngai ta u, umhmun det chu doin, Jordan chaponaa inthawk chun sakeibaknei angin hung suok a ta; amiruokchu, amaa inthawk chun intlânsiettir vak ka tih; chun mi ama chunga thunei ding chun ruot ka ta; kei ang hi tu am an um hrim a? Tuin am hun mi ruotpêk a ta? Berâm vêngtu ka hmaa ngîr ding chu tu am a na?

⁴⁵Chuleiin, Babulon chungthua LALPAIN thurâwn a nei chu lo ngai ta u, Kaldaihai ram chunga thiltum a nei tâk le chun. Matheilovin anni chu ran ruol têhai hnûkhmangin um ngei ngei an ta, an chêngna chu anni irâusanin siempêk a tih.

⁴⁶Babulon lâkna ria chun hnuoi chu ân thin a, hnamhai laia chun a khêk ri chu hrietin a um a,” tiin.