Read Hmar JEREMIA 51 Bible Online

JEREMIA 51 - Hmar bible

JEREMIA 51

¹LALPA chun hieng hin a tih: “Ngai ta u, Babulon chunga le, Kaldaia chêngtuhai chunga chun suksietna thli hung inhrângtir ka ta.

²Chun, Babulona chun ama zâptu ding tir ka ta, ama ram chu zâpfai an tih; buoina niahai chun a vêlin ama kaltuhai ruok an ni ding a ni si a.

³Thalkâptu chun a thalngul chu kuoi naw raw se, ama chu a îndona thuom chun inthuom bawk naw raw se, a tlangvâlhai chu hla naw unla, a sipaihai po po chu sukse fai rêt ro.

⁴Kaldai rama chun thata umin tlûng an ta, an kawtthlêrhaia chun sunthlengin um an tih.

⁵Israelhai amanih, Judahai amanih, an Pathien, sipaihai LALPA chu a nghatsan si naw a; an ram chu Israel Mi Inthieng dodâlin khawhlonain sip hle sien khawm.

⁶Babulona inthawk chun tlân suok unla, mi tinin a hringna sandam raw se; a khawhlonaa sât thlâkin um naw unla, LALPA phuba lâkna hun a ni si a; ama chun thungna chu pêng a tih;

⁷Babulon chu LALPA kuta chun rângkachak no hnuoi po po sukruitu chu a lo ni tah; hnamhai chun a uoin chu an dâwn ta a; chuleiin, hnamhai chu an invêt a nih.

⁸Babulon chu a tlu thut a, suksietin a um a; ama ta dingin ṭap inrûm unla; a natna ta dingin thinghnai damdawi la unla, chuongchun, a hung dam khiet rawi mawh.

⁹Babulon chu sukdam ka tum a, nisienlakhawm, sukdamin a um si naw a; ama chu mâksan unla, mi tin chu mâni ram sengah fêng ei tiu; a chungthu rêlna chun vân a tlung ta si a; vânhai chena dawm sâng chu a ni ta si a.

¹⁰LALPA chun ei felnahai chu a hung lâk suok a; hung unla, Ziona chun va hril dar ei tiu, ei Pathien LALPA sinthawhai hi.

¹¹Thalhai chu tâtngei unla, phawhai chu chel det ro; LALPA chun Media lalhai lungril chu a hung chawktho ta si a; a remruot chu Babulon do le suksiet chu a na, LALPA phuba lâkna, a biekin phuba lâkna chu a ni si a.

¹²Babulon kul banghai epa chun puonzâr chu khai unla, râlvêng chu sukhrât unla, vêngtuhai sie unla, râlvêng chu buotsai bawk ro; Babulon hluotuhai chunga chun LALPA chun a thurawt le a hril chu a thaw a ni ta hi.

¹³Aw nang tui tamtakhai chunga chêng, hausaknaa bit, i tâwpna a hung tlung mêk a, i hringna hrui ân tan tah.

¹⁴Sipaihai LALPA chun, ‘Matheiloâin, leiṭha ang elin, mihriemin hung suksip ngei ngei ka ti che a, chun, i chunga chun hung khêk khum an ti che,’ tiin ama le ama insâlin a lo inkhâm ta a.

¹⁵“A thilthawtheinân hnuoi chu a siem a, a varnain khawvêl chu a tungding a, a hrietthiemna chun vânhai khi a keiphar bawk a;

¹⁶a râwl a hung insuo pha chun, vânhaia tuihai ân ri hum hum a; leihnuoi tâwphaia inthawk chun tuihu dâm chu ân zâmkaitir bawk a, ruo ta dingin kâwlinlephai chu a siem a, a robâwmhaia inthawk chun thlihai chu a hung lâk suok a.

¹⁷Mi tin el chu an lo intlaw ta a; hrietna boin an lo um ta a, rângkachak suttu tinhai khawm chu an milem kera siemhai lei chun sukzakin an um ta a, an milim sunghai chu khêlhlip el a ni si a, annia chun inthuokna khawm a um si naw a.

¹⁸Teplo el an nih, thil suol sinthaw, anni chu hrem an ni pha chun bohmang an tih.

¹⁹Jakob chan chu hieng ang hi chu a ni nawh; ama chu thil po poa hmasa a na, Israel khawm chu a rochana a chipui a nih; Sipaihai LALPA chu a hming a nih.

²⁰“Nang chu ka indona hrei le, ka hriemhrei i nih; nangma chu hmangin hnamhai chu suknawi vawng ka tih; nangma chu hmangin lalramhai chu suksieng ka ta;

²¹nangma chu hmangin sakawr le a chunga chuong khawm chu suknawi vawng ka tih;

²²chun, nangma chu hmangin sakawr tawlailîr le a chunga chuong khawm suknawi vawng ka ta, nangma hmangin nuhmei khawm pasal khawm suknawi bawk ka tih; nangma hmangin upa le naupang khawm suknawi vawng ka ta; nangma hmangin tlangvâl le nunghâk khawm suknawi vawng ka tih;

²³nangma hmangin berâmpuhai le a ran ruol suknawi vawng ka ta, nangma hmangin lo neitu le a bâwngchal tuokhai khawm suknawi vawng ka tih; chun, nangma hmangin ram awptuhai lal aiawtuhai chu suknawi vawng ka tih.

²⁴Chun, Babulon kuoma le, Kaldai hluotuhai po po chunga chun i mithmua Ziona thil ṭha naw an lo thaw tahai po po kha thung ka tih, LALPA chun a tih.

²⁵“Ngai ta, Aw suksetu tlâng, hnuoi po po suksetu, nang ka dodâl che a nih, LALPA chun a tih: i chunga chun ka kut hung inlet ka ta, râwlkhotlânga inthawk chun inhlum thlâng ka ti che a, tlâng kângah siem ka ti che.

²⁶Chun, a kia lung dingin amanih, lungphûm dingin amanih nangmaa inthawk chun la naw ni hai a; amiruokchu, kumkhuoa râusan ni lem i tih, LALPA chun a tih.

²⁷Rama chun indo puonzâr chu khai unla, hnamhai laia chun tawtawrâwt mût unla, hnamhai chu ama do dingin buotsai ro; ama chunga chun Ararat dâm, Minni dâm, Askenaz lalramhai chu ko khâwm unla, a chunga chun sipai hotu lien inruot unla, sakawrhai chu khâu hawn angin inhungtir ro.

²⁸Ama chunga chun, hnamhai, Media lalhai, an ram awptuhai, an lal aiawtuhai po po, a huop sûng ram po pohai chu buotsai ro.

²⁹Ram chu ân thin a, a na a; Babu- lon chunga LALPA thiltum, Babulon ram chu hluotu um lova râusana um dinga a tum chu a la um zing si a.

³⁰Babulon mi thilthawtheihai chun indo chu an ṭhul a, an kulahai chun an um zing a; an thilthawtheina khawm a thlâwn a, nuhmeihai ang el an ni ta a; a chêngna hmunhai chu meia rawin a um a, ân huonna thîrhai khawm chu sukthliekin a um ta a.

³¹Thangko pakhat chu a dang intuokpui dingin tlân a ta, mi tir pakhat chu a dang intuokpui dingin tlân bawk a ta, Babulon lal chu kil tina inthawkin khawpui chu lâk a ni tah ti hril dingin;

³²fenahai chu khârin a um a, phairuonghai chu meiin an raw a, indo mihai khawm chu suklâuin an um ta a,” tiin.

³³Sipaihai LALPA Israel Pathien chun hieng hin a tih: “Babulon naunu chu hrizâwl bu chîl mêkna lai ang chu a nih; nakie sâwt nawtêah, ama ta dingin bu chil hun la hung tlung a tih,” tiin.

³⁴“Babulon lal Nebukadnezzar chun a mi fâk zo a, a mi suknawi a, ama chun bêl ruokah a mi siem ta a, rûlpui ang elin a mi lem a, kân hnikna chun a phîng chu a suksip a, a mi peisâk ta a.

³⁵Ka chunga le ka taksa chunga thawluina hi Babulon chungah um raw se,” Zion hluotuhai chun, tîng an ta; “Ka thisen hi Kaldai hluotuhai chungah um raw se,” Jerusalem chun ti bawk a tih.

³⁶Chuleiin, LALPA chun hieng hin a ti si a: “Ngai ta u, in thua chun ṭan ka ti cheu a, in ta dingin phuba lapêk ka ti cheu; chun, a tuipui chu sukkang ka ta, a tuikhur khawm chu sukhul ka tih.

³⁷Babulon chu hmun dêng pâwng el, sihalhai ta dinga chêngna hmun ding le, maktia um ding le, hluotu um lova inchek khum el ding nîng a tih.

³⁸Sakeibaknei vânglaihai angin a ruolin inrûm an ta, sakeibaknei têhai angin innghir an tih.

³⁹Suklum an ni pha chun, an ta dingin ruoi ṭhêng ka ta, anni chu sukrui ka ta, chuongchun, an hlim a, tho nâwk ta lo dinga kumkhuoa innaa chun an in theina dingin, LALPA chun a tih.

⁴⁰Sa thattu kuoma berâmtehai ang le, kêlchalhai le berâmchalhai angin anni chu hung lâng ka tih.

⁴¹Sesak chu iengtiziea lâka um el, hnuoi pumpuiin an inpâkna chu maktia um el chu! Hnamhai laia chun iengtiziea Babulon chu râusana um el!

⁴²Babulon chunga chun tuisuoriet chu a hung luong a, tuifâwn tamtakhai chun a hung inkhum ta a.

⁴³A khawpuihai chu râusan, ram ṭâwl, thlalêr ram, ram mi chêng nawna hmun, mihriem nau tukhawm sir ngai lo ram a lo ni ta a.

⁴⁴Babulona Bêl chu hrem ka tih; a ilem tahai khawm chu a baua inthawkin hung la suokpêk ka tih; chuongchun, hnamhai chu ama kuoma chun luong hmunkhat ta ngai naw ni hai a, anih, Babulon kulbang chu chim a tih.

⁴⁵“Ka mihai, a sûnga inthawk chun fesuok unla, mi tin chu LALPA lunginsenna ṭiumtaka inthawk chun insandam seng ro.

⁴⁶In lungrilhai chu thidang naw sienla, chu rama thuthang hriet ding lei khawm chun ṭi bawk naw ro; kum khat chu thuthang chu hung a ta, chu hnunga chun kum dangah thuthang bawk chu hung a tih, thawluina le, rorêltu le rorêltu inkalna dâm.

⁴⁷Chuleiin, ngai ta u, nihai chu a hung tlung mêk, Babulona milem kera siemhai chunga chun rorêl ka ta, a ram pumpui chu inzak a tih; a ithathai po po khawm chu a sûnga chun tlûng an tih.

⁴⁸Chun, vân le hnuoi le an sûnga um po pohai chu Babulon chunga lâwm lei chun hla sak an ta; hmârtienga inthawkin a kuoma chun suksetu a hung ding a ni si a; LALPA chun a tih.

⁴⁹Babulon chun Israelin a thathai a lo intlûktir ta ang khan, ram po po thathai chu chuong ang bawk chun Babulona chun tlûng an tih.

⁵⁰“Nangni kâwlhnâma inthawka suokthlenghai, fe unla, ngîr ṭawk ṭawk naw ro, hlataka inthawk chun LALPA chu hre zing unla, Jerusalem chu in lungrilah in hungtir hlak ro.

⁵¹Kâwkna chu ei hriet tâk leiin ei inzak a, buoinahai chun ei hmaihai khawm an inkhum ta a, LALPA ina hmun inthienga chun mikhuolhai chu an hung lût ta si a.

⁵²Chuleiin, ngai ta u, nihai chu a hung tlung mêk, a milim kera siemhai chunga chun rorêlna nei ka ta, a ram sûng po poa chun hliemhai chu inrûm an tih, LALPAIN a tih.

⁵³Babulon chu vân chenin vûm sienkhawm, a hrâtna insâng khawm chu la sukhrât zuol pei sienkhawm, keia kuoma inthawkin suksetuhai an hung ding a ni si a, LALPA chun a tih.

⁵⁴Babulona inthawka ṭap ri le, Kaldaihai rama suksietna nasatak chu e!

⁵⁵LALPA chun Babulon chu a suksiet a, amaa inthawka râwl ropuitak chu a sukbohmang ta a; chun, an chângvêl chu tui tamtakhai angin an inri a, an râwl rihai chu insuoin a um a;

⁵⁶ama chunga chun suksetu chu a hung ta si a, Babulon chung ngeia chun; a mi thilthawtheihai chu manin an um a, an thalngulhai khawm chu a tliek innawi vawng a; LALPA chu phuba latu Pathien a ni si a, ama chun thung ngei ngei a tih.

⁵⁷Chun, a lalhai le a mi varhai le, a rorêltuhai le, a lal aiawtuhai le a mi thilthawtheihai chu sukrui ka ta; kumkhuoa innaa chun in an ta, tho ta naw ni hai, Laltak, a hming khawm sipaihai LALPA chun a tih.

⁵⁸Babulon kulbang lientakhai khawm chu sukchim nîng an ta, a dai kawtkhârhai chu meia raw nîng an ta, a mipuihai chu a thlâwn elin inrim an ta, hnamhai khawm chu mei leiin inrim an ta, sipaihai LALPA chun a tih”tiin.

⁵⁹A rorêl a kum li kuma, Juda lal Zedekia le Babulona an hang fe laia, Maaseia naupa Neria, chu naupa Seraia kuoma zâwlnei Jeremia thupêk thuhai chu. Tun Seraia chu khawtlâng hotu lien tak a na.

⁶⁰Chun, Jeremia chun Babulon chunga thil ṭha naw hung tlung dinghai po po, Babulon chungchângthua thu zieka umhai po po chu, lekhabua chun a ziek a.

⁶¹Chun, Jeremia chun Seraia kuoma chun, “Babulona i va fe pha chun, hieng thuhai po po hi en la, tiem la,

⁶²‘Aw LALPA, nang chun hi hmun chungchâng thua hin, sât thlâk ding a nizie dâm, tukhawm an chêng naw dingzie dâm, mihriem amanih, ramsa amani khawm an chêng naw dingzie le, kumkhuoa râusan a ni dingzie chu i lo hril ta a,’ ti la.

⁶³Chun, hi lekhabu hi i tiem zo pha pha chun, lung leh khit dêng i ta, Euphrates vadunga chun va pei lût i tih;

⁶⁴chun, ‘Hieng ang bawk hin Babulon chu tlumhmang a ta, a chunga thil ṭhanaw ka hung intlungtir dinghai lei chun tho nâwk ta ngai naw ni a, rimsi hle tâng an tih,’ ti rawh,” a ta. Jeremia thuhai chu chu chen chu a nih.