Read Hmar JEREMIA 52 Bible Online

JEREMIA 52 - Hmar bible

JEREMIA 52

¹Zedekia chu rorêl a ṭan chun kum sâwmhni pakhat mi a na; Jerusalema chun kum sâwmpakhat sûng ro a rêl a; a nu hming chu, Libnaa Jeremia naunu Hamutal a nih.

²Chun, ama chun LALPA mithmua thil ṭha naw chu a thaw a, Jehoiakimin a thaw ang chie el kha.

³LALPA lunginsenna leia anni chu Juda le Jerusalema a hmaihmaa inthawka anni a pei suok hmakhat chun Zedekia chu Babulon lal chungah a hel zing a.

⁴Chun, a rorêl kum kuona, thla sâwmnaa, chu thla ni sâwm ni chun Babulon lal Nebukadnezzar le, a sipaihai po po chu Jerusalem do ding chun an hung a, an umngha ta a; a vêl ela chun kulhai an bâwl khum ta a.

⁵Chuongchun, khawpui chu lal Zedekia inlal kum sâwm pakhatna chen inhuolin a um a.

⁶A thla linaa, chu thla ni kuo ni chun khawpui sûnga ṭâmna chu a nasa ta êm êm a; chu rama mipuihai ta ding chun bei hrim a um ta naw a.

⁷Chun, khawpuia chun lamrel siem a ni ta a, lal huon sîra, bang pahnihai inkâra dai kawtkhâr lampuia chun zânah indo mihai po po chu an tlân suok ta a (chuongchun, Kaldaihai chun khawpui chu a vêlin an umngha a na) Araba tieng lampuia chun an fe ta a.

⁸Nisienlakhawm, Kaldai sipaihai chun lal chu an hnawt ta a, Jeriko phairuoma chun Zedekia chu an va hnawt phâk ta a; chuongchun, a sipaihai po po chun ama chu an indar san ta a.

⁹Chun, lal chu an man a, Hamath rama Riblaa chun Babulon lal kuoma chun an ṭhuoi ta a; chun, ama chun a chungthu a lo rêlthlûk ta a.

¹⁰Chun, Babulon lal chun a mithmu ngeia chun Zedekia naupasalhai chu a that ta a; chun, Riblaa chun Juda ram lalhai po po chu a that vawng bawk a.

¹¹Chun, Zedekia mithai chu a kheldawkpêk a, Babulon lal chun ama chu thîrkawl ân buntir a, Babulon tieng a ṭhuoi a, a thi ni chenin lung inah a sie ta a.

¹²Chun, thla nganaa, chu thla ni sâwm ni chun, chu chu Babulon lal Nebukadnezzar inlal kum sâwmpakuona a nih; vêngtu hotu Nebuza-radan lal hmaa ngîr hlak chu Jerusalema chun a hung a,

¹³LALPA in le lal in chu a raw a; Jerusalema in po pohai, in ropui takhai khawm chu meiin a raw ta a.

¹⁴Chun, Kaldai sipaihai vêngtu pâwlhai la umhai po po chun Jerusalem kulbang chu a vêlin an sukchim ta a.

¹⁵Chuongchun, vêngtu pâwl hotu Nebuzaradan chun, mi rimsihai pâwl le, khawpuia a mahlaa mâksana la um pâwlhai le, hung inrelruhai, Babulon lal kuoma hung tlân lûthai le, mipui la um sunhai hrim hrim chu sal dingin a ṭhuoi tâwl a.

¹⁶Nisienlakhawm, Nebuzaradan chun chu rama mi inrim zuol taluohai chu lo neitu dinghaia le, grêp huon enkawltu dinghaiah a mâksan a.

¹⁷Chun, LALPA ina dârsen sûtpuihai, dârsen maihûn le ân ṭhutnahai LALPA ina umhai chu Kaldaihai chun an suknawi vawng a, a dârsenhai po po chu Babulon tieng chun an phur ta a.

¹⁸Chun, bêlhai, vutluohai, mei chepnahai, maihûnhai, thîrhaihawhai, bûr le bêl dârsena siemhai po po rawngbâwlnaa an hmang hlakhai chu an lâk hmang vawng a.

¹⁹Chun, nohai, vutluohai, maihûnhai, bêlhai, chawtawlhai, rângkachaka siemhai chu rângkachakin tangkaruoa siemhai chu tangkaruoin, vengtu pâwl sipai hotu chun a lâk vawng a.

²⁰Sûtpui pahnihai, chawtawl[5] pakhat, ân ṭhutna hnuoia dârsen bâwngchal sâwm le pahni LALPA in ta dinga lal Solomonin a siemhai chu: hieng bûr le bêl dârsenhai po po hi a bûk chin hrietlo an nih.

²¹Sûtpui chungthua chun, sûtpui pakhat seizie chu tawng sâwmpariet a nih; chun, tawng sâwmpahni vêltuok a nih; chu chu sazie chu kut bel li bawk a na, kawrawng a nih.

²²Chun, a chunga chun dâra siem a lubâwk a um a, a lubâwk pakhat insângzie chu tawng nga a na, a vêl chun lênkal le, theibufai chu a lubâwk chunga dârsena siem vawng a um a, chun, sûtpui pahnina khawm chun chuong ang bawk chu, theibufaihai le chun a ni ve bawk a.

²³A sîra chun theibufai chu sâwmkuo le paruk an na; a lênkal chunga a vêla theibufai po po chu za a nih.

²⁴Chun, vêngtu pâwl hotu chun thiempu laltak Seraia le, a dawttu Zephania le, kawtkhâr vêngtu pathum a ṭhuoi a;

²⁵khawpui sûnga inthawk chun indo mihai enkawltu hotu a ṭhuoi bawk a; chun lal hmaa ngîr hlak, chu khawpuia hmua um mi pasari leh; indo mihai hotu ziektu, a ram mihai hming ziektu, le khawpui sûnga mi hmua um chu ram mi sâwmruk leh a ṭhuoi a.

²⁶Chun, Nebuzaradan, vêngtu pâwl hotu chun anni chu a ṭhuoi a, Babulon lal kuomah Riblaa chun a hung ṭhuoi tâwl a.

²⁷Babulon lal chun anni chu a hrem a, Hamath rama Riblaa chun anni chu a that tâwl ta a. Chuongchun, a rama inthawk chun Juda chu sala intâng dinga ṭhuoi a ni ta a.

²⁸Hienghai hi Nebukadnezzarin sala intâng dinga a ṭhuoihai chu an nih: kum sari kum chun Juda mi sâng thum le sâwmhni pathum;

²⁹Nebukadnezzar inlal kum sâwmpariet kum chun Jerusalema inthawkin mi za riet le sâwmthum pahni a ṭhuoi a;

³⁰Nebukadnezzar inlal kum sâwmhni pathum kum chun Nebuzaradan, vêngtu pâwl hotu chun Juda mi sala intâng ding chu za sari, sâwmli panga a ṭhuoi a; chuongchun, mihriem po po chu sâng li le za ruk an nih.Jehoiakin insuoa a um thu le Babulona chawisânga a um thu.

³¹Chun, Juda ram lal Jehoiakin sala ân tâng kum sâwmthum pasarina, thla sâwm pahnina, chu thla ni sâwmhni panga ni chun Evil-merodak Babulon lal ân lal kum, kum khatnaa chun Juda lal Jehoiakin lu chu a dawm kâng a, lung ina inthawk chun a hung ṭhuoi suok ta a;

³²a kuoma chun ngilneitakin thu a hril a, a lalṭhungpha chu Babulona lal um mi danghai nêka insânga chun a siepêk a.

³³Chun, a lung in intângna silfênhai chu a thlengpêk a, a kuoma chun ni tinin a dam sûng po chu bu a fâk ve hlak a.

³⁴Chun, a hlaw ding khawm Babulon lal chun a pêk zing a, a dam sûng nihai po poa chun, a thi hmakhat chun ni tin a chanpuol a pêk a.