Read Hmar JEREMIA 8 Bible Online

JEREMIA 8 - Hmar bible

JEREMIA 8

¹Chu huna chun, LALPA chun a tih: Juda lalhai ruhai, a rorêltuhai ruhai, thiempuhai ruhai, zâwlneihai ruhai, Jerusalem hluotuhai ruhai chu an thlânhaia inthawkin hung la suok an ta,

²nisa dâm, thla dâm, vâna umhai po po, an hmangaia a rawng an lo bâwlhai, an zawnga an biekhai hmaa chun keidar an tih; lâk khâwm ni naw ni haia, phûm khawm ni bawk naw ni hai, hnuoia êkdûra ṭhang ding ni lem an tih.

³Chun, hi sûngkuo rilo la umsunhai, ka hnawt hmangna hmuna la umhai chun, hring nêkin thi thlang lem an tih, sipaihai LALPA chun a tih.

⁴Chu naw khawm chu an kuomah hi hi hril i tih: LALPA chun hieng hin a tih: Mihai chu tlûng an ta, an tho nâwk ta naw ding maw? Mi chu fe hmang a ta, a hung kîr nâwk ta naw ding maw?

⁵Iengtiziea hieng Jerusalema mihai hi hnungtawl sawng zingnaa an hnungtawl am a na? Hlêmna chu an chel det tlat a, kîr nâwk an nuom naw a.

⁶Ka ngai a, ka lo hriet a, anachu, thudik an hril nâwk a, mi tukhawm, “Ieng am ka lo thaw ta leh,” tiin a khawhlonaa inthawk chun ân sîr naw a, mi tin chun mâni lampui seng an hraw a, indonaa sakawr tlân bingbilet ang chun.

⁷Anih, chunga vakâwl chun ama hun ruot chu a hriet a; vaṭhuhai, pelêuhai, vangalsânghai an hunah an hung tlung a, ka mihai ruok chun LALPA thupêk an hriet nawh.

⁸Iengtiziein am, “Kan var a, LALPA dân chu kan kuomah a um annâwm” in ti a na? Nisienlakhawm, ngai ta u, lekhaziektuhai ziekhmawl indik naw chun indik lotakin a lo thaw ta a.

⁹Mi varhai chu an inzak a, sukbeidawngin an um a, ṭhuoi hmangin an um a; en ta u, LALPA thu chu an dit naw chu: annia chun ieng ang varna hrim am a um a na ?

¹⁰Chuleiin, an nuhmeihai chu mi danghai kuomah pêng ka ta, an lohai chu a neitu dinghai kuomah pêng ka tih; mi tin el chu a chîn taka inthawka a lien tak chenin, inîtthîknain an sip si a; zâwlneia inthawk thiempu chenin indik lotakin an thaw bawk a.

¹¹Chun, thlamuongna ding a um naw sain, “Thlamuongna, thlamuongna,” tiin, ka chipui naunu insuknatna chu an sukdam met chau a.

¹²Thil tirdakum an thaw lai chun inzapui an ti? An inzapui hlawl nawh; an hmai khawm a mâwk naw a, chuleiin, a tluhai laia chun tlu vêng an ta, anni chu hrem an ni huna chun, LALPA chun a tih.

¹³Anni chu kâng hmang letdêr ka tih, LALPA chun a tih; grêphruiahai chun grêp um naw ni a, theichang kûngahai khawm chun theichang um naw ni a, a hna khawm chu vuoi a tih; chun, an kuoma thil ka pêkhai khawm chu annia inthawk chun fe hmang a tih.

¹⁴Iengdinga ei ṭhung zing am? Hung inkhâwm unla, khawpui kul neiahai chun lût ei ta, chutaka chun bohmang el ei tiu; LALPA chunga chun thil ei lo suksuol ta leiin, LALPA ei Pathien chun bohmangnaa um dingin a mi sie ta a, tûr pawl tui chu dâwn dingin a mi pêk ta a.

¹⁵Thlamuongna ding ei enkai hlak a, nisienlakhawm, thil ṭha hrim a hung tlung naw a; sukdamna ding huna dâm chun, ngai ta, beidawngna lem!

¹⁶Dana inthawk chun a sakawrhai hnâr hnâwt ri chu ân hriet a; a mi hrât hung inhrosatna ria chun ram pumpui chu ân hnîng a. Anni chu an hung a, ram po po le a sûnga umhai chu an fâk zo si a; khawpui le a sûnga chênghai le khawm chun.

¹⁷Ngai ta u, nangni lai chun rûlhai, rûltûrneihai sukngam thei ngailo dinghai chu ka hung tir ding a nih; chuongchun, chuk an ti cheu, LALPA chun a tih.

¹⁸Aw lungngainaa inthawk hin keima le keima bêk inthlamuong thei lang chu; ka sûnga chun ka lung hlak chu a thidang si a.

¹⁹Ka chipuihai naunu ram hlataka inthawka a khêkri chu lo ngai ta u, “LALPA chu Zionah a um a ni naw am a nih? a Laltak chu a sûnga chun a um nâwm a nih? An milim ker fâwmhai le teplo thil maktakhai chun iengdinga lunginsen dinga an mi chawktho am a na?” tiin.

²⁰Busîk hun chu a liem ta a, nipui hun chu a tâwp tah, sandamin ei um nawh.

²¹Ka chipuihai naunu suknatnaa chun suknat vein ka um a, ka thla ân vai a, beidawngnain a mi chel tlat a.

²²Gileada hin thinghnai damdawi a um naw maw? Chutaka chun damdawi thiem an um naw maw? Chuong a ni chun ieng dinga ka chipuihai naunu chu sukdam a ni nâwm a na?