Read Hmar ṬAP HLA 3 Bible Online

ṬAP HLA 3 - Hmar bible

ṬAP HLA 3

¹A lunginsenna hmawla hremna hmu tah mihriem chu ka na,

²Ama chun a mi ṭhuoi a, varah ni lovin, inthimah a mîn lâwntir a.

³Keia chungah sûnnithlâkin a kut a thlâk takzet a.

⁴Ka taksa le ka vun chu a sukchuor a, ka ruhai chu a suktliek a.

⁵Ka chunga chun dai a rem ta a, nauhase nat le khâknain[11] a mîn huon a.

⁶Sâwttaka lo thi tahai ang khan, hmun inthimahai chun a mîn chêngtir a.

⁷Ka vêlin a mîn huon a, ka suok thei nawna dingin; ka khaidiet chu a sukrik a.

⁸Anih, ka khêk a, ṭhangpuina ka ngên pha leh, ka hnina chu a lo dangkîr a.

⁹Ka lampuihai chu lung a saka sakhaiin ân huon[12] a, ka lampuihai chu a sukkâwi a.

¹⁰Keia ta ding chun ama chu savawm mi lo inchân zingtu, hmun fienriela sakeibaknei ang chu a nih.

¹¹Ka lampuihai chu a herkâwi a, a mi keinâwi vawng a; râusanin a mi siem ta a.

¹²A thalngul chu a kuoi a, a kâp dingah a mi sie a.

¹³A thalbâwm thalhai chu ka diemnêmah a hung kâp lût a.

¹⁴Ka mihai ta dinga nuizatbûr le, ni tin tina an hla ka lo ni ta a.

¹⁵Ama chun khâknain a mi suksip a, sairam kha leh a mîn ṭhungtir ta a.

¹⁶Ka hahai[13] chu lungtâthaiin a suknâwi a, pilvutin a mîn khum bawk a.

¹⁷Nangin ka thla chu thlamuongnaa inthawka hlataka chun i sie hmang a; hlawtlingna khawm ka theinghil rau a.

¹⁸Kei chun, “Ka hrâtna le LALPAA inthawka ka beiseina chu a bohmang an ta hi,” ka ti a.

¹⁹Ka hrem tuorna le ka rimsikna, sairam thing le khâkna chu hre zing la.

²⁰Ka lungril chun a hrietzing zing a, keimaa chun a kûn a.

²¹Hi hi ka lungrilah ka hung hrietsuok nâwkin, chuleiin, ka beisei hlak.

²²Sukbohmanga ka um naw hi Lalpa zangaina a lo nih, A lainatnahai chu a kang ngai naw leiin.

²³Zîng tinin an thar a; i ringumna chu a ropui a nih.

²⁴Ka thla chun,“ LALPA chu ka chanvo a na, chuleiin, amaa chun beisei ka tih,” a ta.

²⁵Lungrila ama zawngtuhai le, ama nghâktuhai kuoma chun LALPA chu a ṭha a.

²⁶ LALPA sandamna chu mîn an nghâk ṭâwk ṭâwk a, an beisei chu a ṭha a nih.

²⁷Mîn a tleirâwl laiin rîngkawl chu a phur chun a ṭha a nih.

²⁸Ama chunga chun ân nghatpêk ta leiin, mâkhâtin ṭhung sienla, to zing raw se.

²⁹A bau chu pilvuta chun sie sienla, chuongchun, beiseina a um thei rawi mawh.

³⁰Ama bentu chu a bieng dawpêk sienla, kâwknaa sipa suksipin um raw se.

³¹ LALPA chun kumkhuo chun a peihâwn âwm si naw a.

³²Lungngaina intlungtir hlak sien khawm, a zângaina hauzie ang peiin lunginsietna chu nei a tih.

³³Nuom thu ngawtin a hremin, mihriem nauhai chu a suklungzîng ngai si naw a.

³⁴Hnuoia lungin intânghai po po kea sirde dingin.

³⁵A chunghnungtak hmaihmaa mihriem thuneina herhmang ding le,

³⁶Mi chu a chungthua hnuoisie chu, LALPA chun rem a ti nawh.

³⁷ LALPAIN thu a pêk naw laia, a hril a, hung tlung el hlak chu tu am a na?

³⁸A chunghnungtak baua inthawk chun thu sie le ṭha chu a suok ni lo am a nih?

³⁹Iengleiin am mi hring chu mi a suolnahai leia hremna thua chier hlak a na?

⁴⁰Ei lampuihai chu thaw ṭâl ei ta, zawngsuok ei ta, LALPA kuomah inher kîr nâwk ei tiu.

⁴¹Vânhaia Pathien kuoma chun ei kuthai leh ei lungril chu chawisâng vêng ei tiu.

⁴²Kan bawsiet a, kan hel ta a, nang chun i mi ngaidam naw a.

⁴³Lunginsennain în khum a, keini i mi hnawt a; i that a, i lunginsiet naw a.

⁴⁴Kan hninahai chu a fethleng thei nawna dingin, nang chu sûmpui chun în khum a.

⁴⁵Hnamhai laia chun hnâwlthlâk le, hnâwlhnawk angah i mi siem ta a.

⁴⁶Kan hmêlmahai po po hlakin kan chungah an bau an ka pêkpûk a.

⁴⁷Vânsam le ṭitna chu kan chungah a hung tlung a, buoina le bohmangna le chun.

⁴⁸Ka mihai naunu suksieta a umna lei chun, ka mit chu vadungpui tui angin a luong a.

⁴⁹Ka mit chu, ma lovin, tâwp hun nei lovin, ân bunthlah a;

⁵⁰ LALPAIN vâna inthawka a hung en a, a hung hmu hmakhat chun.

⁵¹Ka khawpui naunuhai po po lei chun, ka mit chun ka thla chu a sukna a.

⁵²A san um lova ka hmêlmahai chun, vate angin an mi hnawt rak rak a,

⁵³A hringin khurah an mi peilût a, lung an mi hung thlâk khum a.

⁵⁴Tuiin ka lu a chîm tlum a, “Ka bo a ni ta ie,” ka ti a.

⁵⁵Khur sûng inhnuoitaka inthawk chun, aw LALPA, i hming ka hung ko a,

⁵⁶Ka râwl chu i hriet a, ka khêkna le, kân thuoknaah i na chu suksêt naw la.

⁵⁷Nang ka hung ko ni chea chun i hung hnai a; “Ṭi naw rawh,” i ta.

⁵⁸Aw LALPA, ka thla chungthu chu nangin i ṭan a, nangin ka hringna i sanhim a.

⁵⁹Aw LALPA kân dik nawna i hmu a; ka chungthu nangin rêl la.

⁶⁰An phubalâknahai po po le, ka chunga an thiltum dânhai chu i hmu vawng kha.

⁶¹Aw LALPA, nangin an kâwknahai le, ka chunga an thiltum po po chu i hriet a.

⁶²Ka chunga hung ṭuongtuhai hmûr le, ni tin tina ka chunga an ngairuotnahai chu.

⁶³An ṭhung lai le an tho lai khawm chu nangin en la, an hla ka ni hi.

⁶⁴Aw LALPA, an kuthaia an sinthaw ang peiin nangin thungna pe la.

⁶⁵Anni kuoma i ṭawngsie, lungril ngarna chu nangin pe rawh.

⁶⁶Nangin lunginsennain hnawt i ta, LALPA vânhai hnuoia inthawk chun sukbohmang i tih.