Read Hmar ṬAP HLA 4 Bible Online

ṬAP HLA 4 - Hmar bible

ṬAP HLA 4

¹Rângkachak chu a vân thim ta de! Rângkachak inthieng khawm chu a va danglam ta de! Hmun inthieng lunghai chu kawtthlêr tâwp tina chun bunthlâkin a um a.

²Zion naupa hlutakhai rângkachak inthieng le hrilkhi theihai chu, Iem a tia bêlhemtu kuta siem, pil bêlhai ang chaua ngainat an ni el chu!

³Sihalhai hmana an nêne an keisuok a, an têhai an innêktir a; Ka mihai naunu ruok chu, thlalêra varîngseihai angin a khawhlo a ni ta hi.

⁴Nautê nêne ne lai lei chu dangchâr leiin a dangah a kawp tlat a; Naupanghai chun bei an hni a, mi tukhawm hlaka an khawipêk si naw a.

⁵Dutuitaka fâk zawng hlaktuhai kha, kawtthlêrhaia bohmangin an um a; Sen inlâra enkawl tleihai khawm khan êkdûr chu an pawm a.

⁶Ka mihai naunu rîtlona chu Sodom suolna nêkin a nasa lem si a; Chu chu mitkhapkâr loa peihâwnin a um a, a chunga chun kut hrim innghat a ni nawh.

⁷A miṭhahai chu vûr nêkin an inthieng lem a, nênetui nêkin an ngo lem a, Taksaa chun lunghluhai[14] nêkin an sen lem a, An hmêl chu sapphir[15] lung ang a nih.

⁸An hmai chu meihawl nêkin a dum lem a, kawtthlêrhaia chun hriet an ni nawh; An vun chu an ruhaia chun a kawp ri ngawt a, a vuoi a, hmawl ang el a nih.

⁹Kawlhnâma thata umhai chu phîngṭâmnaa thata umhai nêkin an hamṭha lem a, Lo thlairahai tlâksamnaa vuoka umin, hieng hai hi an luong hmang si a.

¹⁰Lunginsietna hau nuhmeihai kut chun an nauhai ngei chu an suong a; Ka mihai naunu suksieta a umnaa chun an buhai an nih.

¹¹ LALPA chun a ṭiumna chu a hung sukpuitling a, a lunginsenna ṭium chu a hung bunthlâk a; Ziona chun mei a sukchawk a, a lungphûmhai kâng hmangtu chu.

¹²Jerusalem dai kawtkhârhai chun hmêlma le râldo chu hung lût an tih ti, Hnuoia lalhai chun an ring naw a, khawvêl hluotuhai khawmin an ring nawh.

¹³A zâwlneihai suolnahai le a thiempuhai khawhlona, A sûnga mi fel thisen an insuona lei khan a nih.

¹⁴Kawtthlêrhaia chun mitdel angin an invâk a, thisenin an pawrche a, Chuleiin, mi tukhawma an silfênhai chu an them thei nawh.

¹⁵“Fe hmang ro, thieng nawhai,” tiin mihaiin an khêk khum a, “Tir hmang ro, Tir hmang ro, Tâwk naw ro”,[16] tiin. Tlânsie le invai an hung ni ta a, Hnamhai lai chun mihaiin, Eini lai um ta naw raw hai se,[17] an ti a.

¹⁶LALPA lunginsenna chun anni chu a ṭhe a, ngaisak nâwk ta naw ni; Thiempu mi nina chu an inza naw a, upahai khawm an ditsak bawk nawh.

¹⁷Ei ṭhangpuina thlâwn ennain ei mithai a kham zo a, Ei nghâknaa chun hnam sandam thei lo ding chu ei nghâk a.

¹⁸Ei kehnunghai an sui a, chuongchun, ei kawtthlêrhaia khawm ei fe thei naw a; Ei tâwpna chu a hnai a, ei nihai chu suk tlung a na, ei tâwpna chu a hung tlung ta leiin.

¹⁹Eini mi hnawttuhai chu vâna mupui nêkin an hrât lem a, Tlânghai chunga chun an mi hnawt a, thlalêra chun eini an mîn chân a.

²⁰Ei hnârkuo thuok, LALPA hrieknâl chu, an khursûnga chun an lâk a; “Ama hlim hnuoia chun hnamhai laia chun chêng ei tih,” ei ti a.

²¹Uz rama um, nang aw Edom naunu, hlimin lâwm rawh; Nanga kuoma khawm no chu hung tlung a ta; inrui i ta; chun, nang chu ruokin insiem i tih.

²²Aw Zion naunu, i suolna hremna chu a famkim ta a nih; Sal ninaa chun hrên zing ta naw ni che a, Aw Edom naunu, i rîtlona chu hung hrem a ta; I suolnahai chu hmusuok a tih.