Read Hmar EZEKIEL 10 Bible Online

EZEKIEL 10 - Hmar bible

EZEKIEL 10

¹Chun, ka hang en a, ngai ta, cherubhai lu chunga vâna chun sapphir lung ni âwmtak, lalṭhungpha ang hi a hung inlang a.

²Chun, mi puonzai inhmia inchei kuoma chun thu a hril a, “Cherubhai hnuoia tawlailîr kekuol invirhai inkâra chun fe la, cherubhai inkâra meihawl chu i kut khinghniin suksip ve ve la, chun, khawpui chunga chun the dar rawh,” tiin. Chun, ka mithmu ngeia chun a va lût ta a.

³Chun, mi chu a va lût lai chun cherubhai chu in changtieng panga chun an ngîr a; chun, sûm chun tuollai sûng ril lem chu a suksip ta a.

⁴Chun, cheruba inthawk chun LALPA ropuina chu a tungin a kai a; in kawtkhâr bula chun a ngîr ta a; chun, in chu sûmin a hung sip a, tuollai chu LALPA ropuina var chun a hung sip ta a.

⁵Chun, cherubhai thla ri chu Pathien Iengkimthawtheiin thu a hril laia a râwl angin, tuollai puo lema inthawk khawm chun ân hriet a.

⁶Chun, mi puonzai inhmia inchei kuoma chun, “Tawlailîr kekuol invir zinghai inkâra inthawk chun, cherubhai inkâra inthawk chun, mei la la,” tia thu a pêk chun, a va lût a, tawlailîr kekuol sîra chun a va ngîr ta a.

⁷Chun, cherub pakhat chun cherubhai inkâra inthawk chun, cherubhai inkâra mei chu a kutin a hei ban a, a hei lâk ta a, chun, chu chu mi puonzai inhmia inchei kuthaia chun a sie a, ama chun a lâk a, a fe suok ta a.

⁸Chun, cherubhai thla hnuoia chun mihriem kut ang hi a hung inlang ta a.

⁹Chun, ka hei en a, ngai ta, cherubhai sîra chun kekuol pali, cherub pakhat sîrah kekuol pakhat, cherub dang sîrah kekuol dang pakhat ka hmu a. Chuong kekuolhai inlang dân chu berul lung ang el a nih.

¹⁰Chun, an inlang dâna chun, an pali chun inangna an nei seng a, kekuol pakhat chu kekuol dang sûnga um ang elin.

¹¹An lâwn pha chun, an sîr lia chun an lâwn a; an lâwn lai chun sîrzâwngin an inher ngai naw a; amiruokchu, a hmasatak chun a nghatna tieng tienga chun an zui pei a; an lâwn lai chun sîrzâwngin an inher nawh.

¹²Chun, an taksa pumpui dâm, an ruongzânghai dâm, an kuthai dâm, an thlahai dâm, an kekuolhai dâm, chuong ang palia kekuol an neihai chu, a vêl tuokin mitin a sip vawng a.

¹³Chuong kekuolhai chu, ka hrieta chun kekuol invir zinghai tia inbûk an nih.

¹⁴Chun, cherub tin chun hmai pali an nei seng a; hmai pakhatna chu cherub hmai chu a na, hmai pahnina chu mihriem hmai a na, hmai pathumna chu sakeibaknei hmai a na, a palina chu mupui hmai a nih.

¹⁵Chun, cherubhai chu dawm kângin an um a, hi hi a nih Kebar vadung panga thilhring ka hmu chu.

¹⁶Cherubhai chu an lâwn pha chun, kekuolhai khawm chu an sîra chun an lo lâwn ve a; cherubhai chun hnuoia inthawka inlakâng dinga an thlahai an suksâng pha chun kekuolhai khawm chu anni sîra inthawk chun an inher hmang chuong naw a.

¹⁷An ngîr pha chun, hieng hi an ngîr ve a, an indawm kâng pha chun hieng hi anni ruolin an indawm kâng ve a; annia chun thilhring thlarau chu a um si a.

¹⁸Chun, LALPA ropuina chu in kawtkhâr bula inthawk chun a fe suok a, cherubhai chunga chun a ngîr ta a.

¹⁹Chun, cherubhai chun an thlahai chu an zâr a, an fe suok lai chun ka mithmua ngei chun hnuoia inthawk chun an insukkâng a; kekuolhai khawm chu an sîrhaia chun an um ve a; chun, LALPA in dâi kawtkhâr saktienga chun an ngîr a; chun, an chunga chun Israel PATHIEN ropuina chu a um a.

²⁰Kebar vadung panga, Israel Pathien hnuoia thilhring ka hmu chu hi hi a nih; chun, cherubhai an nih ti ka hriet bawk a.

²¹Cherub tin chun hmai hran pali seng an nei a, thla pali seng leh; chun, an thlahai hnuoia chun mihriem kut angpui a um bawk a.

²²Chun, an hmêl ka hmuhai ang kha an na, an inlang dân le annihai hrim hrim chu; anni chu tlûntakin hmatieng an fe seng a.