Read Hmar EZEKIEL 11 Bible Online

EZEKIEL 11 - Hmar bible

EZEKIEL 11

¹Chu nawa chun thlarau chun a mi hang dawm kâng a. LALPA in dâi saktieng kawtkhâr, saktieng sawnga chun a mi ṭhuoi ta a; chun, ngai ta, chu dâi kawtkhâra chun mi sâwmhni panga an um a; chun, anni laia chun Azzur naupa Jaazania le Benaia naupa Pelatia, mipuihai hotuhai chu ka hmu a.

²Chun, ama chun ka kuomah, “Mihriem naupa, hi khawpuia thurâwn rilo pea, suolna suksuoktuhai chu hieng mihai hi an nih.

³Anni chun, ‘Inhai bâwlna ding hun a hnai ta a ni nâwm a nih?[9] Hi khawpui hi sumbepui chu a na, eini hi a sahai chu ei nih,’ an ti a.

⁴Chuleiin, an chunga chun thu hrillâwk la, aw mihriem naupa, hrillâwk rawh,” a ta.

⁵Chun, LALPA thlarau chu ka chungah a hung tlung a, ka kuoma chun, “ LALPA chun hieng hin a tih ti hril rawh: Aw Israel sûngkuohai, chuong ang chun in hril am a ni; in lungrilhaia thil hung lûthai chu ka hriet si a.

⁶Hi khawpuia hin in mi thathai chu in sukpung a, chutaka kawtthlêrhai chu mi thathaiin in suksip a.

⁷“Chuleiin, Lalpa PATHIEN chun hieng hin a ti a nih: In ithathai a sûnga in inzâltirhai hi, sa chu an nih; khawpui chu sumbepui chu a nih; nisienlakhawm, a sûnga inthawk chun lâk suokin um a tih.

⁸Kâwlhnâm chu in ṭi a; in chungah kâwlhnâm chu hung intlungtir ka tih, Lalpa PATHIEN chun a tih.

⁹Chun, chutaka inthawk chun la suok ka ti cheu a, hmêlhrietlohai kutah pêng ka ti cheu a, chun, nangni lai chun rorêlna chu tirsuok ka tih.

¹⁰Kâwlhnâmah tlûng in ta, Israel ramria chun ro rêlpêk ka ti cheu a; chun, LALPA chu ka ni ti hre tâng in tih.

¹¹Hi khawpui hi in sumbepui chu ni naw ni a, nangni khawm a sûnga sa chu ni nâwng in tih; Israel ramria chun ro ka rêlpêk ding cheu a nih;

¹²chun, LALPA chu ka ni ti hre tâng in tih; ka thuruothaia chun in fe naw a, ka rorêlhai khawm in zâwm si naw a; amiruokchu, in vêla hnamhai dân ang chun in thaw ta lem a,” tiin.

¹³Chun, thu ka hril lai chun Benaia naupa Pelatia chu a thi ta a. Chun, ka hmaia hnuoi sikin ka bawkkhup a, râwl inringtakin ka khêk a, “A khai, Lalpa PATHIEN! Israel la um sunhai hi i suktâwp el ding am a nih?” tiin.

¹⁴Chun, LALPA thu chu ka kuomah a hung tlung a,

¹⁵“Mihriem naupa, i unauhai, i unauhai ngei, i chipuihai, Israel sûngkuo[10] po po chu, an rêngin, an kuoma chun Jerusalem hluotuhai chun, ‘ LALPAA inthawk chun fe hmang unla, keini kuomah hi ram hi nei dinga pêk a ni tah,’ an ti a;

¹⁶chuleiin, hril la, Lalpa PATHIEN chun hieng hin a tih; ‘Hnamhai laia inthawka hlataka chun ka lo sawn ta de a, ramhai laia chun anni chu ka lo sukdar ta dea chu, an va fena ramhaia chun hun sâwt nawtê sûnga ding chun an ta dingin hmun inthieng la ni ta fan ka tih’ tiin.

¹⁷Chuleiin, ‘Lalpa PATHIEN chun hieng hin a tih, hnamhai laia inthawk chun la khâwm ka ti cheu a, sukdara in umna ramhaia inthawk chun kei khâwm ka ti cheu a, Israel ram chu pêng ka ti cheu,’ ti rawh.

¹⁸Chun, chutaka chun hung an ta, chutaka inthawk chun thil tirdakumhai po po le thil pawrchehai po po chu la hmang an ta.

¹⁹Anni chu lungril hmunkhat[11] pêng ka ta; nangmaa[12] chun lungril thar sie bawk ka tih; chun, an tisaa lungril lung anga ngar chu lâng ka ta, an kuoma chun tisa lungril innêm pêng ka tih.

²⁰Ka thuruothaia an fe theina ding le, ka dânhai chu an kawl a, an thaw theina dingin; chun, ka mihai hung nîng an ta, kei khawm an Pathien nîng ka tih.

²¹Nisienlakhawm, an lungrilhaia an tirdakumna le an pawrchenahai zâwmtuhai chu, an lu chunghaia ngei chun an suol maw chu innghat ka tih, Lalpa PATHIEN chun a tih,” tiin.

²²Chun, cherubhai chun an thlahai chu an zâr a, kekuolhai chu an sirahai chun a um a; chungtienga chun Israel ropuina chu an chungah a um a.

²³Chun, LALPA ropuina chu khawpui laia inthawk chun a hung suok a, khawpui saktieng sîra um tlâng chunga chun a hang ngîr ta a.

²⁴Chun, thlarau chun a mi dawmkâng a, Pathien thlaraua thilhmulâwknaa chun Kaldaia sal intânghai kuoma chun a mi ṭhuoi ta a. Chuongchun, ka thilhmulâwk hmu chun chungtieng a mi fesan ta a.

²⁵Chun, sal intânghai kuoma chun LALPAIN ka kuoma a lo inentir tah thilhai po po chu ka hril ta a.