Read Hmar EZEKIEL 16 Bible Online

EZEKIEL 16 - Hmar bible

EZEKIEL 16

¹LALPA thu chu ka kuomah a hung tlung nâwk a,

²“Mihriem naupa, Jerusalem chu a tirdakumna chu hre dingin siem la,

³Lalpa PATHIEN chun Jerusalem kuomah hieng ang hin a tih, ti rawh; ‘I piengna le i hnam ram chu Kanaan mihai ram a na; Amor mi chu i pa a na; Hit mi chu i nu a nih.

⁴I pieng dâna chun, i pieng ni chun i laihrui chu ât a ni naw a, nang chu sukfai ding chein tuia sâwp khawm i ni bawk naw a; chia saw hrim khawm i ni naw a, dawm khawm i ni bawk naw a.

⁵I chunga lunginsietna nei dingin le, hieng thilhai hi thawpêk ding chein, tu mit khawma a lunginsiet naw che a; amiruokchu, khawhnâwmah hnawt suok i ni ta lem a; chuong ang chun i pieng ni chun i mi nina chu tenin a lo um ta a.

⁶Chun, i sîra ka khêl lai a, i thisena insukpawrche vawnga ka hmu chein, i kuoma chun, “I thisena khânga um kha ni la khawm, dam rawh,” ka ti a.

⁷Ramhnuoi hnader anga pung dingin ka siem che a, i hung pung ngei a, i hung ropui a, incheina ṭha bîktak ang chu i hung ni ta a; i nênehai a hung in siem a, i sam dâm khawm a hung ṭo a, amiruokchu, saruok le ruok i la ni tlat el a.

⁸Chun, i sîr ka hung khêl a, ka hung en che chun, ngai ta, i hun chu hmangaina hun a ni ta a; ka puon chu i chunga chun ka keiphar a, i saruokna chu kân khum ta a; anih, i kuoma chun kân khâm a, nangma le chun thuthlung ka lo siem ta a, Lalpa PATHIEN chun a tih; chun, ka ta i hung ni ta a.

⁹Chun, tuiin kân sil che a; anih, i thisen chu nangmaa inthawk chun ka sâwpfai vawng a, hriek ka nâl che a.

¹⁰Puon cheimawiin kân thuom che a, seal vun kekawk kân buntir che a, puonzai inhmiin ka hrên che a, tuktulungêk puonin ka tuom che kha.

¹¹Incheina thuomhaiin ka chei che a, i kuta chun bânbunhai kân buntir che a, i rîngah khaidiet leh.

¹²Chun, i hnârah hnârbê le, i nahaia chun nabêhai le, i lu chungah lukhum mawitak ka sie a.

¹³Chuongchun, rângkachak le tangkaruoa cheiin i um a; i silfênhai khawm, puonzai inhmi dâm, tuktulungêk puon dâm le puon cheimawi dâm an nih; beiphit indîtak le khuoizu le hriek chu i fâk a; i hung hmêlṭha êm êm el a; chun, lalnu khawm chu i hung tling pei ta a.

¹⁴I mawina leiin i hming chu hnamhai laia chun ân darsuok a; kân lalna leia i chunga ka lo sie ta chu, ṭhat famkimna a ni si a.’ Lalpa PATHIEN chun a tih.

¹⁵“Nisienlakhawm, i hmêl ṭhatna chu i ring a, i hming inthangna lei chun nawchizawrah i um ta a; nangma hung khêltu taphawthai chunga chun i châkna chu i phal a; ama ta a ni ta a.

¹⁶I silfênhai chu i lâk a, i bâwlhmunhai chu ze dang dangin i chei a; a chunga chun nawchizawrna thil chu i thaw ta a; chuong ang thil chu um nâwk ta ngai naw ni a, chuong ang chu a la ni ngai bawk nawh.

¹⁷Ka rângkachak le ka tangka în cheina hluhai ka pêkhai che chu i lâk a, mihriemhai limhaia chun i siem a, anni le chun nawchizawrna thil chu i thaw ta a;

¹⁸i puon cheimawihai chu i lâk a, anni chu în khum a; an hmaa chun ka sahriekhai le riminhnikhai chu în tung a;

¹⁹ka bei ka ipêk che, beiphit indîtak, hriek le khuoizu leh, ka châwmna che chu, an hmaa chun riminhnika dingin i sie ve bawk a, chuong chu a nih, Lalpa PATHIEN chun a tih.

²⁰Chu nawa khawm chun, naunuhmeihai le naupasalhai i mi neipêkhai chu i lâk a, an kuomahai chun fâkzoa um dingin inthâwinain i hmang a.

²¹I nawchizawrna chu thil chîn tham a ni ding maw? Ka nauhai i that a, meia infethlengtir dinga an kuoma i pêk hi!

²²I nawchizawrna le i tirdakumnahai poa hin i tleirâwl lai nihai, saruok le ruoka i um a, i thisena în sukpawrche lai kha i hriet zing ta naw a nih.

²³“Chun, i rîtlona po po hnunga chun (i chung a rik, i chung a rik! Lalpa PATHIEN chun a tih),

²⁴hmun langsârtak takhai chu i ta dingin i bâwl a, kawtthlêr tinahai chun hmun insângtakhai chu i ta dingin i siem ta a.

²⁵Lam tluongpui tinahai chun i hmun insânghai chu i bâwl a, i mawina chu tirdakumnain în changtir a, mi a hung khêl taphawt che kuoma chun în hlîm a, i hurna chu i sukpung ta a.

²⁶I tuolbâwm, tisa ropuina, Aigupta mi le khawm chun i lo uire ta a; lunginsennaa mi chophâwk dingin i hurna chu i sukpung ta a.

²⁷Chuleichun, ngai ta, i chungah ka kut kân let a, i bu pângngai chu ka suktlâwm ding a nih, chun, Philistin naunuhai, i lampui tirdakum inzapuituhai, nangma theidatuhai duthusâmah pe suok ka ti che.

²⁸Mumal boa i um lei khan Assuria mihai kuoma khawm nawchizawrah i lo insiem ta a; anih, an kuoma chun nawchizawr thil chu i lo thawa chu i lungawi tâwk si naw a.

²⁹Chu nawa khawm chun Kanaan rama chun, Kaldai ram chenin i hurna chu i sukpung a; chu khawm chun i la lungawi tâwk naw a.

³⁰Hieng thil, nuhmei châk tawm tawmhai sin i thaw hi hmuin, ‘I lungril chu a va khawhlo de!’ Lalpa PATHIEN chun a ti a nih.

³¹Lampui tluong tinahai chun i hmun langsârhai chu i bâwl a, kawtthlêr tinahai chun i hmun insânghai chu i siem bawk a; hawman khawm i lâk nawnaa hin nawchizawr el ang khawm i ni nawh.

³²Nuhmei uirenu, mâni pasal nêka mikhuolhai la[13] lemtu!

³³Nawchizawrhai po po kuoma chun miin thilpêkhai an pêk hlak a, nang ruok chu i hmangaihai po po chu thilpêkhai i pêk a, anni chu i tham a, i châknaa ding chun sîr tina nangma kuoma an hung theina dingin.

³⁴I nawchizawrnaa hin nuhmei danghai nêka danglamna a um a, nang chu mi tukhawma nawchi zawr dingin an hung zui naw chea hin; nang chun a man chu i pêk lem a, nangma kuoma chun a man chu pêk a ni naw a, chuleiin, i danglam a nih.

³⁵“Chuleiin, aw nang nawchizawr, LALPA thu chu lo hre rawh:

³⁶Lalpa PATHIEN chun hieng ang hin a tih; i hmangaituhai kuoma i châkna zâra chun i saruokna chu hmusuok a na, i tirdakumna chu bunsuok a ni bawk lei le; i pawrchena milimhai po po le, an kuoma i lo pêk tah i nauhai thisen po po lei chun,

³⁷ngai ta, chuleichun, i hmangaihai po po chu ko khâwm ka ta, inhawi i lo chênpuihai[14] po po le, i lo hmangai[15] tahai po po le, i lo theida tahai po po le chun, kil tina inthawkin, i chungah hung ṭhuoi khâwm ka ta, i saruokna po pohai chu an hmu theina dingin an kuoma chun i saruokna chu hâwk ka tih.

³⁸Chun, nuhmei inneina dân bawse le, mâni nau thisen insuo chunga rorêl angin i chungah rorêl ka tih; i chunga chun îtthîkna le lunginsenna thisen chu hung intlungtir ka tih.

³⁹Chun, anni kuta chun pe bawk ka ti che a, i hmun langsârhai chu peisieng an ta, i hmun insânghai chu sukchim an tih; i puon sil chu hlîppêk an ti che a, în cheina thil hluhai chu lâng an tih; chuongchun, saruok le ruokin mâksan an ti che.

⁴⁰Nangma chunga chun inkhâwmpuina nei bawk an ta, lunghaiin dêng an ti che a, an kâwlhnâmhaiin sunthleng bawk an ti che.

⁴¹I inhai chu meiin râwng an ta, nuhmei tamtak mithmua chun i chunga rorêlna chu sukthlûng an ta; chun, nawchizawr anga um chu ma dingin siem ka ti che a, chun, hawman khawm pe ta ngai hrim hrim naw ti ni.

⁴²Chuongchun, ka lunginthakna chu i chungah hrîtthlâng ka ta, ka îtthîkna chu nangmaa inthawk chun fe hmang tâng a ta, to ṭawk ṭawk ka ta, lunginsen nâwk ta naw ningah.

⁴³I tleirâwl lai nihai kha i hriet zing ta naw a, amiruokchu, hieng thilhaia hin i mi suklungsen a; chuleiin, ngai ta, kei khawma i nun suol maw chu i lu chungah hung intlungtir ka tih, Lalpa PATHIEN chun a tih; chun, pawrchenahai po po belsain hi khawhlona hi thaw ta naw ti nih.

⁴⁴“Ngai ta, mi tukhawm thuvarhai hmangtu chun hi thuvar hi i chungah hung hmang an tih, ‘A naunu khawm a nu ang bawk,’ ti hi.

⁴⁵Nang chu i nu naunu, a nauhai le a pasal khawm dawnsaklo naunu chu i na, nang chu i zuorpuihai, mâni nauhai le pasalhai khawm dawnsaklohai unaunu chu i na; in nu chu Hit mi a na, in pa khawm Amor mi a nih.

⁴⁶I zuorpui upa lem le a naunuhmeihai chu i vawitienga chêng Samaria hi a na; chun, i zuorpui naupang lem i changtienga chêng chu Sodom le a naunuhmeihai hi an nih.

⁴⁷An lampuihai chu i hrawin, an tirdakumnahaia chun i lungawi tâwk naw a; amiruokchu, hun sâwt nawtê sûngin i um dân po poah anni nêk hmanin i se lem a.

⁴⁸Ka hring zing angin, Lalpa PATHIEN chun a tih, ‘nang le i naunuhaiin, nangin i thaw angin i zuorpui Sodom chun amanih, a naunu khawmin amani khawm a thaw naw a.

⁴⁹Ngai ta, hi hi i zuorpui Sodom suolna chu a nih; ama le a naunuhaia chun chapona, bei ditkhawp, hausaka inhawitirna a um a, mi tlasamhai le mi rimsihai chu a ṭhangpui chuong nawh.

⁵⁰An chapo a, ka hmaa chun tirdakumna an thaw a, chuleiin, ṭha ka ti ang peiin anni chu ka lâk hmang ta a.

⁵¹Samaria khawm chun i suol zâtve khawm a thaw naw a, nang ruok chun anni nêkin i tirdakumna chu i sukpung nasa lem a, chuleiin, tirdakumna i thawhai po po chun i zuorpuihai chu felah în langtir tah a nih.

⁵²I zuorpuihai fel lema în langtirna hin nang ngeiin i muolphona chu phur rawh, anni nêka tirdakumna nasa lem thawha i suolnahai leiin anni chu nanga nêkin an fel lem a nih, i zuorpuihai chu fel lema în langtir leiin.

⁵³“An sal nina chu inlet ka ta, Sodom le a naunuhmeihai sal nina, Samaria le a naunuhmeihai sal nina le, anni laia i salhai sal nina khawm inlet ka tih,

⁵⁴an ta dinga thlamuongtu nia i thil lo thaw tahai po poa khan în zak a, i muolphona chu i phur theina dingin.

⁵⁵I zuorpuihai Sodom le a naunuhmeihai le Samaria le a naunuhmeihai chu an um dân hmasaa bawk kîr nâwk an ta, nang le i naunuhmeihai khawm in um dân hmasaa bawk kîr nâwk in tih.

⁵⁶I chapo ni khan i zuorpuinu Sodom chu i ṭawngse hnâwkna[16] ni lo am a nih,

⁵⁷i rîtlona suklang a ni hma khan? Tuhin amanu angin Suria[17] naunuhmeihai le a vêla umhai po po le, Philistin naunuhai i kîmvêla hmusittuhai che hrilsiet i hung ni ta hi.

⁵⁸I hurna le i tirdakumna hremna chu i phur a nih, LALPAIN a tih.

⁵⁹“Lalpa PATHIEN chun hieng hin a tih: thuthlung bawsea, inkhâmna hmusita nangin i lo thaw ta ang khan nanga chunga khawm thâwng ka tih.

⁶⁰Nisienlakhawm, i tleirâwl lai nihaia nang le ka thuthlung chu hre zing ka ta; chun, nang le chun chatuon thuthlung indin ka tih.

⁶¹I unauhai, i unu le i sangnu i pawmlût pha chun naunuhmeihai dingin anni chu i kuomah pêng ka tih, i thuthlung lei ruok chu ni lovin.

⁶²Chun, ka thuthlung chu nang leh sukdet ka tih, chun LALPA ka nih ti mi hre tâng i tih.

⁶³Thil i lo thawtahai po poa ka ngaidam pha che chun i hriet zing a, i hmai a mâwk a, în zak leia i bau i kâk dêr ta nawna dingin, Lalpa PATHIEN chun a tih,” tiin.