Read Hmar EZEKIEL 18 Bible Online

EZEKIEL 18 - Hmar bible

EZEKIEL 18

¹LALPA thu chu ka kuomah a hung nâwk a,

²“Hi thuvar Israel rama in hmang, ‘Pahai chun grêp thûr an fâk ta a, nauhai hahai chu a ṭim,’ ti hi ieng tinâm a na?

³Ka hring zing angin, Lalpa PATHIEN chun a tih; Israel rama chun hi thuvar hi hmangna ding hun hrim nei ta naw ti niu.

⁴Ngai ta, thlarau po po chu ka ta an na, pa hringna chu ka ta a ni ang bawkin, naupa hringna khawm chu ka ta a nih; thlarau thil suksuoltu chu thîng a tih.

⁵Amiruokchu, mi chu a fel a, thil indik le dân ang chu a thaw a,

⁶tlânghai chunga chun a fâk bawk naw a, Israel sûngkuohai milimhai tieng chun a mithai ân lên bawk naw a, a tuolbâwm nuhmei chu a lo sukpawrche naw a, nuhmei insiehran lai a hung hnai bawk naw a;

⁷tukhawm ân suksuoltir naw a, battu kuoma chun a hnina chu ân hmutir a, thawluinain tukhawm a suksiet naw a, mi phîngṭâmhai chu bei a lo pêk ta a, saruokhai chu silfên a lo inkhum ta a;

⁸a pung hnawt dinga pe suok ngai lo a, a pung khawm la ngai lo a, suolnaa inthawka a kut keitîm a, mi le mi inkâra rorêlna indiktak lo hmang hlak a,

⁹indiktaka thaw dinga ka rorêlhai zâwm a, ka thuruothai a pawm chun, ama chu mi indik a na, hring ngei ngei a tih, Lalpa PATHIEN chun a tih.

¹⁰Amiruokchu, naupasal a nei a, suomhmang a ni a, thisen insuotu, hieng thilhai a ieng amani hi thaw a,

¹¹hieng thil thaw dinghai hi thaw lo a, amiruokchu, tlâng chunga lo fa ta a, a tuolbâwmhai nuhmei lo sukpawrche ta a,

¹²mi tlasam le mi rimsihai lo insuksuoltir ta a, thawluinaa lo sukse ta a, hnina lo ngaisak lo a, milimhai tienga a mithai lo inlên ta a, tirdakumnahai lo thaw ta a,

¹³a pung um dinga lo pe suok ta a, a pung khawm lo la ta hlak chu, ama chu a hring ding am a nih? Ama chu hring naw ni a, hieng tirdakumnahai po po thawtu hi chu thi ngei ngei a ta, a thisen chu ama chunga chun a um ding a nih.

¹⁴Chun, ngai ta, ama chun naupasal hung nei ve sien, a pain suolna a thawhai po po chu lo hmu ta a, ama chun ṭi a, chuonga thaw ve lo a,

¹⁵tlânghai chunga khawm lo la fa lo a, Israel sûngkaw milimhai tienga a mithai khawm lân lên ngai lo a, a tuolbâwm nuhmei khawm lo la sukpawrche lo a,

¹⁶mi tu chunga khawm lo suksuol ngai lo a, hninaa thutiem la ngai lo a, thawluinaa la sukse ngai lo a, amiruokchu, a bei chu tlasamhai kuoma pe a, saruok chu silfêna lo inkhum ta a,

¹⁷mi rimsihaia inthawka kut lo keitîm ta a, a pung hnawta lo inpûktir lo a, a pung khawm la lo a, ka rorêlnahai lo thaw ta a, ka thuruothai lo zâwm tah; chuong ang mi chu a pa suolna lei chun thi naw ni a, hring ngei ngei a tih.

¹⁸A pa chungthua chun, ama chun rilotakin a lo nêksâwr ta a, thawluinain a unau chu a lo suksiet ta a, a mihai laia thil ṭha naw chu a lo thaw leiin ngai ta, a suolnaa chun thi ngei a tih.

¹⁹Amiruokchu, nang chun, iengdinga naupa chun pa suolna chu a phur nâwm a na? i ti a ni thei a. Naupa chun dân ang le thil indik chu a thaw pha chun, ka thuruothai chu a pawm bawk a, a thaw bawk chun, hring ngei a tih.

²⁰Mi a suksuoltu chu, chu chu thîng a ta; naupa chun pa suolna chu phur naw ni a, pa khawma naupa suolna chu phur bawk naw ni; mi fel felna chu mi fel chunga chun um a ta, mi rilo rîtlona chu mi rilo chunga bawk chun um a tih.

²¹“Amiruokchu, mi rilo chu a thil suksuolhaia inthawk chun ân her hmang a, ka thuruothai chu a zâwm a, ân dik le dân ang thilhai chu a thaw chun, hring ngei a ta, thi naw nih.

²²A bawsietnahai po po a ieng khawm chu ama chunga chun hriet zing ni ta naw ni a, chun, a felna a ithaw ngeia chun ama chu hring a tih.

²³Mi rilo thina chunga hin inhawi tina hrim ka nei am a nih? Lalpa PATHIEN chun a tih; a lampuia inthawk chun hung kîr lemin a hring ding a ni naw am a nih?

²⁴Nisienlakhawm, mi fel chu a felnaa inthawka ân her hmang a, suolna a thaw chun, mi rilovin a thaw hlak anga tirdakumnahai po po kha a thaw ve chun, a hring ding am a nih? A thilthaw felhai, a lo thaw tahai a ieng ieng khawm kha hriet zing ni ta naw ni a, a bawsietnaa a bawsietna le, a suolnaa a suksuolna chun, chuongahai chun a thi ngei ding a nih.

²⁵Amiruokchu, Lalpa lampui chu ân ang rawp naw a, in la ti a ni thei a; tuhin ngai la, Aw Israel sûngkuo, ka lampui chu ân ang vawng an nâwm a nih? In lampuihai ni lo am a ni ân ang vawng naw chu?

²⁶Mi fel chu a felnaa inthawka ân her hmang a, thil suol a thaw chun thîng a ta, suolna a ithawa chun thîng a tih.

²⁷Chu nawah, mi rilo chu a rîtlonaa rîtlona a lo thaw tahaia in thawka ân her hmang a, chun, ân dik le dân ang thilhai chu a thaw chun, a thlarau chu hringin sanhim a tih.

²⁸Ama chun a ngaituo a, a lo thaw tah, a bawsietnahai po poa inthawk chun ân her hmang tâk leiin thi naw ni a, hring ngei ngei a tih.

²⁹Israel sûngkuo chun, Lalpa lampui chu ân ang vawng lêm, an la ti rawp khawm a ni theia, Aw Israel sûngkuo, ka lampuihai chu ân ang vawng a ni naw maw? Nanga lampuihai lem an nâwm a nih ân ang naw chu?

³⁰Chuleiin, Israel sûngkuo, mi tin chu a thilthawhai ang peiin rêlpêk ka tih, Lalpa PATHIEN chun a tih. Hung kîr unla, in bawsietnahai po poa inthawkin hung kîr ro; chuongchun, suolna chu in tlûkna lung hung ni naw nih.

³¹In bawsietnahai po po, in lo bawsiet tahai chu, nangnia inthawkin peihâwn unla, thlarau thar le lungril thar insiempêk unla, aw Israel sûngkuo, iengdingin am thîng in ta?

³²Mi thinaa chun lâwmna ka nei si naw a, Lalpa PATHIEN chun a tih, chuleiin, hung kîr unla, hring ro,” tiin.