Read Hmar EZEKIEL 19 Bible Online

EZEKIEL 19 - Hmar bible

EZEKIEL 19

¹Chu nawa chun Israel lalhai ta ding chun sûnna hla phuok la,

²I nu chu ieng am a na? Sakeibakneipui a nih, A bawk a, a têhai châwmin, sakeibaknei tuoihai laia chun.

³A têhai pakhat chu a hung châwm tlei a, Sakeibaknei tuoi a hung na, fâkding man ân chûk a; Mihriemhai chu a fâk zo ta a.

⁴Hnamhai khawm chun a chanchin an lo hriet a, An khura chun lâkin a um a; Khaidieta khitin Aigupta rama chun an hung ṭhuoi ta a.

⁵A nu chu a nghâk zing a, a beiseina a bo tah ti a hriet a, A te dang a lâk vak a, sakeibaknei tuoiah a siem nâwk a.

⁶Sakeibakneihai lai a suk a tungin ân lawn a, Sakeibakneituoi a hung na, fâkding man an chûk a; Mihriemhai chu a fâk zo ta a.

⁷An in ropuihai chu a hriet a, an khawpuihai[18] a suksiet a, Ân rûm ri leiin ram chu râusanin a um a, a bitna lai po po le chun.

⁸Rambunghaia inthawk sîr tinah hnamhaiin ama an hung kal a, A chungah an lênhai an keiphar a, an khura chun a tla ta a.

⁹Kawl inbunin bâwmah an khum a, Babulon lal kuomah an hung ṭhuoi a; Kul dettak sûngah an ṭhuoi a, A râwlhai chu Israel tlânghaia inthawk hriet a ni nâwk ta nawna dingin.

¹⁰I nu chu i thisena chun tuihai kâwla phun, grêphrui, Tuihai tam leia ra nuomtak le kâua sip ang a nih.

¹¹A kâu ngartakhai chu rorêltu lalhmawla hmang an hung ni a, A buk samup laia khawm chun an dâwk lûr bik a; Kâu tamtakhai laiah ân sâng leiin an hmu bîk lûr bawk a.

¹²Nisienlakhawm, lunginsenna hmalthlakin a um a, Hnuoia pei thlâkin a um a, Sak thliin a sukṭâwl a, a ra a mût ṭil a, A kâu ngartak khawm chu suktliek a hung na, A vuoi ta a, meiin a kâng hmang ta a.

¹³Tuhin chu thlalêrah, Ram ṭâwl le tuihulnaah phunsawn a ni tah.

¹⁴A kâu kuonghaia inthawk mei a suok a, a ra a kâng hmang zo a, Chuleiin, kâu ngartak rorêlnaa lalhmawla hmang thei khawm a um ta nawh. Hi hi sûnna chu a na, sûnna hla chu la hung nîng a tih.