Read Hmar EZEKIEL 20 Bible Online

EZEKIEL 20 - Hmar bible

EZEKIEL 20

¹Kum sarina, thla ngânaa, chu thla ni sâwm ni chun, Israel upa ṭhenkhathai chu LALPA kuoma thu indawn dingin an hung a, ka hmaa chun an ṭhung a.

²Chun, LALPA thu chu ka kuomah a hung tlung a,

³“Mihriem naupa, Israel upahai kuoma khan thu hril la, an kuoma chun, ‘Lalpa PATHIEN chun hieng hin a ti a nih; ka kuomah thu indawn dinga hung in ni maw? Kei ka hring zing angin nangni thu indawn hin um naw ning,’ Lalpa PATHIEN chun a tih,

⁴Anni chu ro rêlpêk i ti, mihriem naupa, anni chu ro rêlpêk i ti? An thlatuhai tirdakumnahai chu inhriettir la;

⁵an kuoma chun, Lalpa PATHIEN chun hieng hin a tih; ‘Israel hi ka thlang a, Jakob sûngkaw thlahai chunga chun ka bân ka phar a, Aigupta ramah anni laia kân sukhmêlhriet nia chun; ka bân ka phar a, LALPA in Pathien ka nih,’ tiin;

⁶chu nia chun Aigupta rama inthawka, ram po pohai ropuina nenetui le khuoizua luong ram an ta dinga ka lo enthlit tah rama hung ṭhuoi dingin, an kuoma chun ka bân ka phar a.

⁷An kuoma khawm chun, a mithmua tirdakumnahai po po chu nangni mi tinin peithla unla, Aigupta ram milimhai chun insukpawrche naw unla; LALPA in Pathien ka ni hi, tiin ka hril a.

⁸Nisienlakhawm, ka chungah an hel a, ka thu an ngai naw a; mi tin chun an mithmua an tirdakumnahai chu an pei thlâk naw bawk a; Aigupta milimhai khawm chu an nghatsan bawk naw a; chun, kei chun, ‘an chunga chun Aigupta ram sûnga an chunga ka lungsenna sukpuitling dingin ka lunginsenna chu ka bunthlâk ding a nih,’ ka ti a;

⁹nisienlakhawm, ka hming leiin,[19] Aigupta rama inthawk anni hung ṭhuoi suoka an kuoma ka lo intârlang tâkna hmutu, an laia an umna hnamhai mithmua, hrilsiet ka ni nawna dingin, ka thaw a.

¹⁰chuongchun, Aigupta rama inthawka suok dingin ka siem a, thlalêra chun anni chu ka hung ṭhuoi ta a.

¹¹Ka thuruothai le ka rorêlhai, chuong chu miin an thaw a, an hring pui dinghai chu, an kuomah ka pêk a, kân entir bawk a.

¹²Chu nawa khawm, ka châwlni chu anni le keia kâra inchikna ni a, anni sukthiengtu LALPA chu ka nih ti an hriet theina dingin ka pêk bawk a.

¹³Amiruokchu, Israel sûngkuo chu thlalêra khan ka chungah an hel a, ka thuruotahai chun an fe naw a, chuong chu miin a thawa a hringna dinghai ka rorêlhai khawm chu an dang kîr a; ka châwlni khawm chu nasatakin an suksiet a, chun, kei chun thlalêra chun anni chu kânghmang dingin ka lunginsenna chu an chungah ka bunthlâk ding a nih ka ti ta a.

¹⁴Chun, ka hming leiin, hnamhai anni mithmua anni ka hung ṭhuoisuoknahai, chuonghai mithmua chun hrilsiet a ni ding a ni nawh tiin ka thaw a.

¹⁵Chu nawa khawm, ram po pohai ropuina, nênetui le khuoizua luong anni ka lo pêk ta rama chun anni chu ka ṭhuoi lût naw ding a nih tiin thlalêra khan an kuomah ka bân ka lo phar ta a;

¹⁶ka rorêlhai chu an dang kîr a, ka thuruothai chu an hraw naw a, ka châwlnihai chu an bâwsiet ta leiin; an lungrilhai chun an milimhai chu a zui si a.

¹⁷Nisienlakhawm, anni suksietnaa inthawk chun ka mit chun a hla a, thlalêra khan anni chu ka lo suktâwp dêr el bawk naw a.

¹⁸Chun, an thlahai kuomah thlalêra khan, ‘In thlatuhai thuruothai chu hraw naw unla, an rorêlhai chu pawm bawk naw unla, an milimhai chun nangni le nangni insukpawrche bawk naw ro;

¹⁹LALPA in Pathien chu kei ka na, ka thuruothai chu hraw unla, ka rorêlhai chu pawm unla, thaw ro;

²⁰ka châwlni khawm chu inza bawk unla; LALPA in Pathien ka nih ti in hriet theina dingin nangni le keia inkâra inchikna nîng a tih,’ tiin.

²¹Nisienlakhawm, chuong thlahai chu ka chungah an hel ta rawp a, ka thuruothai chu an hraw naw a, ka rorêlhai khawm chu thaw dingin an zâwm bawk naw a; chuong chu miin a thaw chun chuonga chun hring a tih; ka châwlni khawm an sukpawrche a; chun, kei chun thlalêra an chunga ka lunginsenna chu sukpuitling dingin an chunga chun ka lunginsenna chu ka bunthlâk ding a nih ka ti a.

²²Nisienlakhawm, an mithmua anni ka hung ṭhuoi suokna hnamhai mithmua chun sukhmingsiet a ni nawna dingin, ka hming leiin ka thaw a, ka kut chu ka keitîm ta a.

²³Chu nawa khawm chu ram hran hranhaia chun hnawt dar ka ta, hnamhai laia chun anni chu ka sukdar ding a nih tiin thlalêra khan an kuomah ka bân chu ka phar a;

²⁴ka rorêlhai chu an phursuok naw a, ka thuruothai khawm an dangkîr bawk leiin le, ka châwlnihai khawm chu an sukpawrche a, an thlatuhai milimhai chu an mit chun a en zing leiin.

²⁵Chu nawa khawm chun thuruot a ṭha ni lo, rorêlnahai an hringna ding ni lohai khawm chu ka pêk bawk a;

²⁶chun, anni thilpêkhaia ngei, sul hung hawngtu taphawt meia an infethlengtirnaa chun, anni chu râusana ka siem theina ding le, a tâwpa chun LALPA ka nih ti an mi hriet theina dingin anni chu ka sukpawrche a.

²⁷“Chuleiin, mihriem naupa, Israel sûngkuo kuoma chun thu hril la, an kuomah Lalpa PATHIEN chun hieng ang hin a tih ti rawh: In thlatuhai chun hitaka hin an mi lo demsiet ta a, ka chunga an lo bâwsietnaa hin.

²⁸Ka bân phara anni pe dinga ka ti, chu rama anni ka hung ṭhuoi lai chun tlâng insângtak le rampui inthim mup an hmu a, chutaka chun an inthâwina chu an inhlân ta a, chutaka chun an thilinhlân chimum chu an pêk a, chutaka chun an riminhnik khawm chu an bun bawk a.

²⁹Chun, keiin an kuomah, ‘In va fena bâwlhmun kha ieng am in ti a?’ ka ti a. Chuongchun, a hminga chun vawisûn ni chen hin Bama an inbûk ta a.

³⁰Chuleiin, Israel sûngkuohai kuoma chun hril la, Lalpa PATHIEN chun hieng hin a tih: In thlatuhai thaw dân ang bawkin nangni le nangni in insukpawrche ding a ni maw? An tirdakumna chu châkin in zâwm ve ding a ni maw?

³¹In thilpêkhai in inhlân lai le, in naupasalhai chu meia in infethlengtir lai khan, in milimhaia khan vawisûn ni chen hin in insukpawrche a ni nâwm a nih? Aw Israel sûngkuo, nangni mi râwn hin ka um rawp ding maw? Ka hring zing angin, Lalpa PATHIEN chun a tih, nangni irâwn hin chu um ta naw ningah.

³²“In lungrila in ingaituo, ‘Thing le lung rawng bâwl dinga rambunghaia sûngkuohai le hnamhai ang nîng ei ta’ in ti ang kha hung ni tawp naw ti niu.

³³“Lalpa PATHIEN chun ka hring zing angin, kut hrâttak le, bân phar le lunginsenna bunthlâkin in chungah lal nîng ka ta,

³⁴hnam danghai laia inthawkin la suok ka ti cheu a, sukdara in umna ramhaia inthawk khan kut tha hrât le, bân phar le lunginsenna bunthla hielin kei khâwm ka ti cheu;

³⁵chun, hnamhai thlalêra chun hung ṭhuoi ka ti cheu a, chutaka chun hmai san ngeiah phût tâng ka ti cheu.

³⁶In thlatuhai Aigupta ram thlalêra ka phût ang khan, nangni khawm ka phût ding cheu a nih, Lalpa PATHIEN chun a tih.

³⁷Chun, vuokfung hnuoiah infetir ka ti cheu a, thuthlung khuokhirna hnuoiah lalût ka ti cheu;

³⁸nangni laia inthawkin mi helhai chu sukfai ka ta, chuong keia chunga bâwsetuhai le chun; an mikhuolna rama inthawk chun hung ṭhuoi suok ka tih; amiruokchu, Israel rama chun chu lût naw ni hai; chun, LALPA chu ka nih, ti mi hre tâng in tih.

³⁹Nangni ta ding chun, Aw Israel sûngkuo, Lalpa PATHIEN chun hieng hin a tih: Fe unla, ka thu in ngai si naw ding chun mi tinin tuhin le hi hnunga khawm, a milimhai rawng chu va bâwl el raw se chu; amiruokchu, ka hming inthieng chu in thilpêkhai le in milimhai chun sukhmingsie ngai ta naw ti niu.

⁴⁰Lalpa PATHIEN chun a tih: Ka tlâng inthieng, Israel tlâng insânga chun Israel sûngkuohai po po chu, an rêngin chu rama chun ka rawng bâwl tâng an ta, chutaka chun anni chu lâwm ka ta, chutaka chun in thilinhlânhai chu, in rahmasa inthâwinahai le in thil inthienghai po po le chun pawimawsak tâng ka tih.

⁴¹Hnamhai laia inthawka ka hung ṭhuoi suok pha cheu a, sukdara in umna ramhaia inthawka ka kei khâwm pha cheu chun riminhnik angin lâwm tâng ka ti cheu a, hnamhai mithmua ngei chun nangni chu sukthieng tâng ka ti cheu.

⁴²Chun, in thlatuhai kuoma pêk dinga ka bân ka lo phar tah, chu ram, Israel rama chun ka hung ṭhuoi pha cheu chun LALPA chu ka nih ti mi hre tâng in ta;

⁴³chutaka chun, in lampuihai le in thilthawhai po po, in lo insukpawrchenahai chu hre zing in tih; chun, in suolnahai po po, in lo suksuol tahaia chun in mithmu ngeia chun nangni le nangni intheida tâng in tih.

⁴⁴Chun, in lampui suolhai ang ni lova, in thilthaw khawhlohai ang khawm ni lova, ka hming leia nangni le sin ka thaw pha chun, LALPA chu ka nih ti mi hre tâng in tih, Aw Israel sûngkuo, Lalpa PATHIEN chun a tih,” tiin.

⁴⁵Chun, LALPA thu chu ka kuomah a hung tlung a.

⁴⁶“Mihriem naupa, i hmai kha simtieng innghat la, i thu chu simtienga chun inthla la, Sim rama phûl rampui chunga chun thu hril rawh;

⁴⁷chun, Sim rampui kuoma chun, ‘LALPA thu hi lo ngai la, Lalpa PATHIEN chun hieng hin a ti a nih: Ngai ta, i sûnga hin mei sêm ka ta, i sûnga thing hring tinrênghai chu kâng hmang a tih, thing ṭâwl tinhai le chun, chun, meichawk lai mei chu rêm el naw ni a, simtienga inthawka hmârtieng pang po po kâng a tih.

⁴⁸Chun, taksa tin chun kei LALPA hin ka sêm a nih ti hmûng an ta; thimit el naw ni,’ ti rawh,” tiin.

⁴⁹Chun, kei chun, “E, Lalpa PATHIEN! Ama hi tekhithu hriltu a nih an nâwm a nih? an mi ti el a nih,” ka ta.