Read Hmar EZEKIEL 24 Bible Online

EZEKIEL 24 - Hmar bible

EZEKIEL 24

¹Kum kuona kum, thla sâwmna, chu thla ni sâwm ni chun LALPA thu chu ka kuomah a hung tlung nâwk a;

²“Mihriem naupa, hi ni hin Babulon lal chun Jerusalem a hung hnai a nih.

³Chun, sûngkaw hel hmanghai kuoma chun tekhithu hril la, an kuoma chun, ‘Lalpa PATHIEN chun hieng ang hin a tih: Sumbepui inchuon unla, inchuon unla, A sûnga chun tui buok unla;

⁴Chun, chutaka chun a sa tlinhai thlâk unla, A tlang ṭha deu deuhai, a mal le a dârhai le A ru tuihnâihai chun suksip ro.

⁵Ran ruol laia ditumtak chu la unla, A ruhai chu a hnuoi tieng sie unla, Insoṭhattir hle unla, a ruhai chu but ro;

⁶“Chuleiin, Lalpa PATHIEN chun hieng hin a tih: Khawpui, thisen insuo hmang chu a chung a rik, sumbepui a tuiêkna a sûnga um le, a tuiêkna khawm bo thei lo chu, a chung a rik! a tlang tlangin la suok rawh, thlang bik nei lovin.

⁷A thisen chu ama sûnga chun a um si a, lungpui ruok chunga chun ân suo a; pilvuta zuk vurkhum theina ding, leihnuoi chunga chun a bunthlâk si naw a.

⁸Phuba la dinga hung tlung dinga lunginsenna chu ân umtir theina dingin, a thisen chu lungpui ruok chunga chun kân suo a, inkhum a ni nawna dingin.

⁹Chuleiin, Lalpa PATHIEN chun hieng hin a tih; Khawpui thisen insuo hmang chu a chung a rik! Kei khawma a thing sep khawm chu suklien ka ta.

¹⁰Thing buk ṭeu la, mei ti chawk ṭha la, sa chu intlawk ṭhattir hle la, a tuihâng chu hâng deuin, a ruhai chu râw hmang ni raw se.

¹¹Chun, meiling chunga chun a ruokin inchuon la, a hung luma, a dârsen chu a hung inling theina dingin, chuongchun, ân thieng nawna chu a sûnga chun a hung intui theina dingin le, a tuiêkhai chu a hung kânghmang theina dingin.

¹²Sâwl neng khawpa thaw hnung khawmin a tuiêkna chu amaa inthawk chun a tlan hmang si naw a; a tuiêkna chu mei khawma a sukbo thei nawh.

¹³I pawrchenaa chun hurna a um a; ka sukfai che a, sukfaia i um naw leiin, i pawrchenaa inthawkin sukfai ni ngai ta hrim hrim naw ti ni, ka lunginsenna hi i chunga ka suklungâwi hmakhat chun.

¹⁴Kei LALPA chun ka hril ta a, hung tlung ngei a ta, thaw khawm thâwng ka tih, kîr nâwk naw ning a, hla naw nîng a, insîr bawk naw ning; i um dânhai ang pei le i thilthawhai ang peiin ro rêlpêk an ti che, Lalpa PATHIEN chun a tih,” tiin.

¹⁵LALPA thu chu ka kuomah a hung nâwk a:

¹⁶“Mihriem naupa, ngai ta, thâwkkhatin i mithai châkna chu nangmaa inthawkin ka lâk hmang ding a nih; ṭap naw ti ni a, sûn bawk naw ti ni, i mitthlihai khawm luong thla bawk naw ni.

¹⁷Inthuok huoi la, amiruokchu, inring lovin, mithi ta ding chun sûnna siem naw la, i lukâwm chu kâwm la, i kehaia chun i kekawkhai chu bun la, i hmûrhai chu hup naw la, lusûntuhai bei chu fa naw rawh,” tiin.

¹⁸Chuongchun, zîngkâr chun mipuihai kuoma chun thu chu ka hril a, a zântieng chun ka nuhmei chu a thi ta a; chun, thu pêka ka um ang chun zîngkâr chun ka thaw ta a.

¹⁹Chun, mipuihai chun ka kuoma chun, “Hieng thil i thawhai hi, keini ta dingin ieng am an niha i mi hril naw ding maw?” an ta.

²⁰Kei chun an kuomah, “LALPA thu chu ka kuomah a hung tlung a:

²¹‘Israel sûngkuo kuoma chun hril la, Lalpa PATHIEN chun hieng hin a tih; Ngai ta, ka hmun inthieng in thilthawtheina chapopui le, in mithai châkna, in lungrilin a hmangai chu ka sukhmingsiet ding a nih; chun, in naupasalhai le in nau nuhmeihai in hnunga in mâksanhai kha kâwlhnâmah tlung an ta.

²²Chun, ka thaw ta ang khan thâwng in ta; in hmûrhai chu inkhum naw ti niu a, mihriemhai bei chu fa bawk naw ti niu.

²³In lu haia chun in lukâwmhai chu kâwm in ta, in kekawkhai chu in kehai chun bun in ta; ṭap naw ti niu a, sûn bawk naw ti niu; amiruokchu, in suolnaa chun riral lem in ta, insûntuo lem in tih.

²⁴Chuongchun, Ezekiel hi in ta dingin inchikna nîng a ta; amain a thaw ang tak hin thaw vêng in tih; hienghai hi a hung tlung pha chun LALPA chu ka nih ti mi hre tâng in tih.’

²⁵“Chun, nang mihriem naupa, an kul det, an ropuina hlimna, an mithai châkna le, an lungril an sienahai, an naupasalhai le an naunuhmeihai ka lâk pha chun,

²⁶chu nia chun a pumpeltu chu i kuomah hungin a hung inhriettir naw ding che am a nih?

²⁷Chu nia chun chu a pumpeltu kuoma chun i bau chu ka tâng i ta, thu hril i ta, ṭawng theilovin um ta naw ti ni; chuongchun, an ta ding chun inchikna nîng i ta; chun, LALPA chu ka nih ti mi hre tâng an tih,” tiin.