Read Hmar EZEKIEL 25 Bible Online

EZEKIEL 25 - Hmar bible

EZEKIEL 25

¹LALPA thu chu ka kuomah a hung tlung a:

²“Mihriem naupa, Ammon thlahai tieng chun i hmai innghat la, an chungchânga chun thu hril rawh;

³Ammon thlahai kuoma chun hieng hin hril la, Lalpa PATHIEN thu chu lo ngai unla, Lalpa PATHIEN chun hieng hin a ti a nih: Ka hmun inthieng chu sukhmingsiet a ni laiin le, Israel ram chu râusan a ni laiin le, Juda sûngkuo chu sala an intâng lai khan, ‘I hih,’ i lo ti tâk lei khan;

⁴ngai ta, an nei ding chein khawsak mi thlahai kuoma chun ka pêk ding che a nih; an chêngna hmunhai chu i sûnga chun siem an ta, an umna hmunhai chu innghat an tih; chun, i tui chu dâwnin i nênetui khawm chu dâwn bawk an tih.

⁵Rabba chu sanghâwngseihai ta dinga inah siem ka ta, Ammon thlahai hmun chu berâmhai ta dinga bawk khâwmna hmunah siem ka tih; chun, LALPA ka nih ti mi hre tâng in tih.

⁶Lalpa PATHIEN chun hieng hin a ti si a; Israel ram chunga hin i lungrila hmusitna po po leh i lo lâwm ta a, i kehai i lo tet a, i kuthai i lo ben tâk leiin;

⁷ngai ta, ka kut chu i chungah kân let ta a, hnamhai kuoma chun râllâk sum dingin ka pêk ding che a nih; chun, hnamhai laia inthawkin sâtthlâng ka ti che a; ramhaia inthawka bohmang dingin siem ka ti che; chun, sukbohmang ka ti che a, chun, LALPA chu ka nih ti mi hre tâng i tih.

⁸“Lalpa PATHIEN chun hieng hin a tih: Moab le Seir chun, ‘Ngai ta u, Juda sûngkuo hi hnam dang po pohai ang bawk a nih,’ an ti leiin,

⁹Ngai ta, Moab[21] sîr khat, khawpui hmawrtâwnghaia inthawkin, a ram ropuina Beth-jesimoth, Baal-meon le Kiriathaim tieng chu ka hawng ding a nih;

¹⁰saktieng mihai thlahai kuoma chun an nei dingin Ammon thlahai leh pêng ka tih; Ammon thlahai chu hnamhai laia hriet zing a ni ta nawna dingin.

¹¹Chun, Moab chunga chun rorêlna chu sukthlûng ka ta; chun, LALPA chu ka nih ti mi hre tâng an tih.

¹²“Lalpa PATHIEN chun hieng hin a tih: Edom hi Juda sûngkuo chungah phuba lain le, maw nasatak inphurtirin le, an chunga thungin a lo sawisak tâk leiin,

¹³Lalpa PATHIEN chun hieng hin a tih: Edom chunga chun ka kut inlet ka ta, amaa inthawk chun ramsa le mihriem khawm sât thlâng ka tih, Temana inthawkin râusanah siem ka ta; Dedan chenin kâwlhnâmah tlûng an tih.

¹⁴Chun, ka mi Israelhai kut hmang- in Edom chunga chun ka phuba lâkna chu sieng ka ta, ka ṭitumna ang pei le ka lunginsenna ang peiin Edoma chun thâwng an tih; chuongchun, ka phuba lâk chu hre tâng an tih, Lalpa PATHIEN chun a tih.

¹⁵“Lalpa PATHIEN chun hieng hin a tih: Philistin mihai chu phuba lâk angin an lo sawisakin, theida zing zinga sukse dingin lungrila hmusit pumin phuba an lo lâk a,

¹⁶chuleiin, Lalpa PATHIEN chun hieng hin a tih: Ngai ta, Philistin mihai chunga chun ka kut inlet ka ta, Kereth mihai chu sât thlâng ka ta, tuipui panga mi um sun hai chu sukbohmang ka tih.

¹⁷Chun, kâwkna ṭiumtak leh phubalâkna nasatak chu intlungtir ka ta; chun, LALPA chu ka nih ti mi hre tâng an tih; ka phubalâkna chu an chunga kân nghat pha chun,” tiin.