Read Hmar EZEKIEL 27 Bible Online

EZEKIEL 27 - Hmar bible

EZEKIEL 27

¹LALPA thu chu ka kuomah a hung tlung nâwk a;

²“Nang mihriem naupa, Tura ta dingin sûnna hla siem la,

³Tura kuoma chun, Aw nang tuipui lûtnaa chênga, thlierkâr tamtakhai kuoma hnamhai dâwrkaitu, Lalpa PATHIEN chun hieng hin a tih: Nang aw Tura, ‘Mâwinaa chun ka famkim an nâwm,’ i ti a.

⁴I ramrihai chu tuipuihai rila chun a um a, Nanga lo bâwltuhai che chun i mâwina an lo sukfamkim ngei el che,

⁵I thingphêkhai chu an siem, Senir fâr thing vawngin, I lawngngulhai dingin Lebanon sidar thinghai an lâk a.

⁶I lawngzâpna an siem Basan thingsaisuohaiin, I ṭuong chu Kittima thing tlo chi saihaa tuomkhumin.

⁷Nangma inchikna bîk a nina dingin I puonzâr chu Aigupta mi puonzai inhmi ṭiel a nih. I inchung chu Elisa thlierkâra inthawka dumpâwl le sendukin.

⁸Zidon le Arvada chênghai chu i lawngkartu an na, I[22] mi varhai chu, aw Tura, i sûnga chun an um a,

⁹I Lawngpuhai an nih. Gebala upahai le mi varhai chu, I sûnga chun i lawng siemtu an na, Tuipui lawng lienhai po po le an lawngpuhai chu I sûngah an um, i sumdâwngna thilhai thleng vêl dingin.

¹⁰“Persia le Lud le Put mihai chu, i sipai pâwl indo mihai chu an nih; anni chun nangmaa chun thîrlukhum le phaw chu an khai a, i ngainobeina chu an târlang a nih.

¹¹Arvad[23] mihai chu i sipai[24] pâwlhai le chun a vêlin i kula chun an um a; Gammadim mihai chu i in insânghaia chun an um bawk a. I kul vêl po poa chun phawhai an khai a, i mawina an sukfamkim bawk a.

¹²Hausakna tinrêng tam leiin Tarsis chu i sumdâwngtu a na; tangkaruo le, thîr le rângva le, suonin i chan dingin an sumdâwng a.

¹³Javan, Tubal le Mesek chu i sumdâwngtu an na, mihriemahai le, dârsen bûr le bêlhaiin i sum dingin an sumdâwng a.

¹⁴Togarma sûngkuohai chu i chan dingin sakawrhai, indona sakawrhai le sabengtung lien chi haiin an sumdâwng a.

¹⁵Dedan mihai chu i sumdâwngtuhai an ni bawk a; thlierkâr tamtakhai chu i kuta sumdâwngna thilhai chu an na; thalhrit le saiha kihai chu an hung thlengpêk che a.

¹⁶I kutsuok thil tam leiin Suria[25] chu i sumdâwngtu a na, lunghluhai, puon dum pâwl hai, ṭhuimawi hai, puonzai inhmi hai, lungmantamhai le, tuihuom lunghaiin an sumdâwng a.

¹⁷Juda le Israel ram chu i sumdâwngtuhai an na, i thuomhnaw dingin, Minnith bu le, pannag leh, khuoizu le hriek le, thinghnai damdawiin an sumdâwng a.

¹⁸I kut sinthaw tam lei le, hausakna chi tinrêng tam leiin, Damaska khawm chu i sumdâwngtu a na; sahmul var chi le Helbon uoin chun a sumdâwng a.

¹⁹Vedan le Javan khawm chu i thuomhnaw dingin Uzal uoinin an sumdâwng a, i sumdâwngna thuomhnaw lai chun thîr tle mi dâm, thingzungthak dâm, mafu dâm an ṭhang a.

²⁰Dedan chu chuongpha puon hlutak takhaia i sumdâwngtu a nih.

²¹Arabia le Kedar lalhai po po chu i kuta sumdâwngtuhai an na; berâmtehai, berâmhai, kêlhaiin, hienghaia hin i sumdâwngtuhai an nih.

²²Seba le Raama sumdâwngtuhai chu i sumdâwngtuhai an na; i thuomhnaw dingin rângkachak dâm, lung hluhai po po dâmin, riminhnik bîk taktakhai dâmin an sumdâwng a.

²³Haran le, Kanne le Eden, Seba sumdâwngtuhai chu, Assur le Kilmad leh i sumdâwngtuhai an nih.

²⁴Hienghai hi thuomhnaw dittuihai a dumpâwl fûn le, cheimawihai le, sidara siem, hruihaia khuop silfên hlu bâwmhai le, i sumdâwngna thilhai laia sumdâwngtuhai chu an na.

²⁵Tarsis lawnglienhai chu i dâwr thuomhnaw phurtuhai an nih: Nang chu hluosip nâwka umin tuipuihai lairila chun ropuitaka siemin i um a,

²⁶I lawngkartuhai chun tui nasataka chun an hung ṭhuoi che a, Sak thli chun tuipuihai lairila chun a suksiet che a.

²⁷I hausaknahai, i thuomhnawhai, i dâwrsumhai, i lawngpuhai, I ṭhuoituhai, i lawng remtuhai, i dâwrsum thleng vêltuhai, I indo mihai i sûnga um po pohai, I sûnga i pâwlhai um po pohai le chun, I sietna nia chun tuipui lairila chun tlâng in tih.

²⁸I lawngpuhai khêk ri chun a vêl mihai inthin an tih.

²⁹Lawngkarna cheltuhai po po le lawngpuhai le Tuipuia lawng puhai po po chu, An lawnghaia inthawk hung thlâng an ta, hnuoiah hung ngîr an ta;

³⁰An râwlhai chu i chunga hriet dingin siem an ta, Lungna takin ṭap an tih. Chun, an lu chunga chun pilvutin inthêkhum an ta, Vuta chun anni chu inbuol an tih.

³¹I ta dingin invâwkawl an ta, saiip puonin inthuom an ta, Rinumtitaka sûna, lungrila natitakin ṭâng an ti che!

³²An ṭapinrûm chun ṭap hla insamin Nangma chu sûn an ti che a, ‘Tura anga tuipuia to ṭawka um dinga siem hi tu am an um a?

³³I thuomhnawhai chu tuipuia inthawka a fe suok lai chun Hnam tamtakhai chu i suksip a; I dâwrsum le i hausaknahai chun hnuoia lalhai chu i sukhausa ta a,

³⁴Tui inthûkhaia tuipuihaiin a suksiet lai che khan, I dâwrsumhai, i pâwlhai po po i sûnga mi chu nangma leh an tlum ta a.

³⁵Thlierkâr hluotuhai po po chu nangmaa chun mak an ti a, An lalhai chu nasatakin an ṭi a, an hmêl khawm a buoi zo a.

³⁶Hnamhai laia dâwrkaihai chun an diriem che a, Nangma chu ṭium i lo ni ta a, iengtika khawm um nâwk ta naw ti nih,’ ” tiin.