Read Hmar EZEKIEL 28 Bible Online

EZEKIEL 28 - Hmar bible

EZEKIEL 28

¹LALPA thu chu ka kuomah a hung tlung nâwk a;

²“Mihriem naupa, Tura lal kuoma chun hril la, Lalpa PATHIEN chun hieng hin a ti a nih; i lungril chu chawisângin a um a, Pathien ka na, Pathien ṭhungphaa chun ka ṭhung a, tuipuihai lairila chun i ti leiin i lungril chu Pathien lungrilah ngai la khawm, mihriem i ni si a, Pathien ni lovin;

³ngai ta, Daniel nêkin i var lem a nih; nangmaa inthawka thup thei ding thurûk hrim hrim a um naw a,

⁴i varna lei le i hrietthiemna leiin hausaknahai în siempêk a, i ro inhaia chun rângkachak le tangkahai i nei a,

⁵I varna nasatak le i sumdâwngnaa chun i hausaknahai chu i sukpung a, i hausakna lei chun i lungril chu a lo insâng ta a,

⁶chuleiin, Lalpa PATHIEN chun hieng hin a ti a nih; I lungril chu Pathien lungril anga i siem tâk leiin,

⁷chuleiin, ngai ta, i chungah mikhuolhai ka hung ṭhuoi ding a nih, hnamhai ṭisimtak el chu; i varna mawina chunga chun an kâwlhnâmhai chu phawi an ta; i tlêtna chu sukpawrchêng an tih.

⁸Khur sûnga chun la thlâng an ti che a, thata um tahai thîna anga chun, tuipui lairila chun thîng i tih.

⁹Nangma sukhlumtu che hmaa chun, ‘Pathien chu ka nih,’ i la ti rawp ding am a nih? Mihriem chau i ni si a, Pathien ni lo, nangma inhliemtu che kuta chun.

¹⁰Mikhuolhai kuta chun sertanlohai thi angin thîng i ta, keiin ka lo hril ta si a, Lalpa PATHIEN chun a tih,” tiin.

¹¹Chu nawa khawm chun LALPA thu chu ka kuomah a hung tlung a:

¹²“Mihriem naupa, Tura lal ta dingin sûnna hla siem la, a kuoma chun, Lalpa PATHIEN chun hieng hin a ti a nih: Ṭha famkim, varnaa sip le mawinaa famkim i na,

¹³Pathien huon Edena chun i lo um ta a; Lunghlu tinrênghai chu i în khumna a na, Hieng sardion dâm, topaz dâm, rubi lung dâm, onik dâm, jaspi dâm, Sapphir dâm, karbankle dâm, lunghlu dang dang le, Rângkachakhai, an inṭhutna le ziek kermawihai, Kut themthiema siemhai chu i sûnga chun an um a. Nang chu siema i um ni chun chuonghai chu buotsai an ni ve a.

¹⁴Cherub hrieknâla um, zârkhumtu chu i na, Kân umtir che a, Pathien tlâng inthienga chun i um a, Mei lunghai laia chun a suk a tungin i lo inlawn ta a:

¹⁵Felnâwna nangmaa hmu suok a ni hmakhat khan chu, Siema i um nia inthawk khan i lampuia chun i ṭhafamkim hlak a.

¹⁶I sumdâwngna thil tam taluot leiin, I sûng chu inpâwngnêknain an suksip ta a; Thil i suksuol a, chuleiin, sukpawrchea um angin, Pathien tlânga inthawk chun ka hnawt suok ta che a, Ka suksiet ta che a nih, aw inkhumtu cherub, Mei lunghai laia chun ka suksiet che a nih.

¹⁷I mâwina leiin i lungril a lo insâng ta a, I tlêtna lei chun i varna chu i lo suksiet ta a, Hnuoiah ka pei thlawr che a, An hmu theina ding chein lalhai hmaa chun kân zâltir che a nih.

¹⁸I sumdâwngnaa fel nâwnaa suolna tam leiin, I hmun inthienghai chu i lo sukpawrche ta a; Chuleiin, i sûnga inthawk mei ka hung lâk suok a, A kâng hmang che a, hnuoia pilvutah kân changtir che a, Nangma entuhai po po che mithmua chun,

¹⁹Hnamhai laia nanga hretuhai po po che chun maktîng an ta, Nang chu mi ṭîsim i ni ta a, um khawm um nâwk ta naw ti nih,” tiin.

²⁰Chun, LALPA thu chu ka kuomah a hung tlung a:

²¹“Mihriem naupa, Sidon tieng chun i hmai innghat la, a chungah thu hril rawh,

²²hieng hin ti la, Lalpa PATHIEN chun hieng hin a tih: Ngai ta, aw Sidon, ka dodâl che a nih, I sûnga chun ka ropuina suklang ka tih: Chuongchun, LALPA ka nih ti mi hre tâng an tih, Amaa ka rorêlnahai chu ka sukpuitling a, Ama ka sukthieng pha chun;

²³A kawtthlêrhaia chun thisen le hripuihai ka hung tir ding a ni si a, Chun, a hliemhai chu sîr tinah an chunga kâwlhnâmhai leh tlûng an tih. Chun, LALPA chu ka nih ti hre tâng an tih.

²⁴“Chun, Israel sûngkuoa chun a suntu hling um ta naw ni a, an sîr vêla hling buoipuiumhai anni sukhmingse dinghai chu um ta naw ni a, chun, Lalpa PATHIEN chu ka nih ti mi hre tâng an tih.

²⁵“Lalpa PATHIEN chun hieng ang hin a tih; Israel sûngkuohai chu sukdara an umna hnamhai laia inthawka ka lâk khâwm a, hnamhai mithmu ngeia annia sukthienga ka um pha chun, ka siehlaw Jakob kuoma ka lo pêk tah, anni rama ngei khan chêng tâng an tih.

²⁶Chutaka chun himtakin chêng an ta; anih, inhai bâwl an ta, grêp huonhai siem an ta, himtakin chêng an tih; anni sîr vêla anni sukpawrchetuhai chunga ka rorêlna ka sukpuitling pha chun, LALPA an Pathien chu ka nih ti mi hre tâng an tih,” tiin.