Read Hmar EZEKIEL 30 Bible Online

EZEKIEL 30 - Hmar bible

EZEKIEL 30

¹LALPA thu chu ka kuomah a hung tlung nâwk a:

²“Mihriem naupa, hril la, hieng hin hril rawh, Lalpa PATHIEN chun hieng hin a tih: Ṭapinrûm unla, chungrikna ni chu!

³Ni chu a hnai a, LALPA ni chu a hnai ta si a; Sûm zingna ni, Hnamhai sietna ni chu nîng a tih.

⁴Aigupta chunga chun kâwlhnâm chu hung a ta, Ethiopiaa chun tuorna nasatak um a tih; Aiguptaa mi thata umhai an tlûk pha chun, A mipuihai chu la hmang an ta, A lungphûmhai khawm chu sukchim nîng a tih.

⁵Ethiopia, Put le Lud mi chi inpawlhai chu, Kus mihai leh, ram ṭhangruolhai mihai chu anni le chun kâwlhnâmin tlûng an tih.

⁶LALPA chun hieng hin a tih: Aigupta chelngirtuhai khawm chu tlûng an ta; A thilthawtheina chapona khawm hung inhnuoi a tih; Migdola inthawka Suene[27] chenin kâwlhnâmin tlûng an tih, Lalpa PATHIEN chun a ti a nih.

⁷Ram râusana umhai sûnga chun râusanin um vêng an ta, A khawpuihai khawm chu khawpui suksieta umhai laia chun ṭhang vêng a tih.

⁸Aigupta rama chun mei ka sêm a, A ṭhangpuituhai po po sukbohmanga an um vawng pha chun, LALPA chu ka nih ti mi hre tâng an tih.

⁹Chu nia chun Ethiopia mi pawisakna neilotuhai chu sukṭi dingin ka hmaa inthawkin mitirhai chu lawnghaiin suok an ta; an chunga chun tuorna nasatak, Aigupta nia ang khan um an tih, en ta, a hung mêk si a.

¹⁰“Lalpa PATHIEN chun hieng hin a tih; Babulon lal Nebukadnezzar kut hmangin Aigupta mipuihai[28] chu sukrêm ka tih;

¹¹Ama le, a kuoma a mihai, hnamhai ṭisim chu ram sukse dinga hung ṭhuoilût nîng an ta, Aigupta chu doin an kâwlhnâmhai phawi an ta, ram chu mi thatin suksip an tih.

¹²Chun, vadungpuihai khawm chu sukkangchat ka ta, ram chu mi rilohai kutah zawr ka tih; mikhuolhai kut hmangin ram le a sûnga umhai po po chu râusanah siem ka tih, kei LALPA ngeiin ka lo hril tah a nih.

¹³“Lalpa PATHIEN chun hieng hin a tih; Milimhai chu suksieng ka ta, Nopha inthawkin milimhai chu intâwptir bawk ka tih; chun, Aigupta rama inthawk hin lal um nâwk ta naw ni hai a; Aigupta rama hin ṭiumna ka sie ding a nih.

¹⁴Pathros chu râusanah siem ka ta, Zoana chun mei hung sêm ka ta, Noa rorêlnahai chu sukpuitling ka tih.

¹⁵Chun, ka lunginsenna chu Sin chunga chun hung bunthlâng ka ta, Aigupta kul dettak chu; Noa mihai chu sât thlâng ka tih.

¹⁶Aigupta rama chun mei hung tîng ka ta, Sin chu rinum nasatakin um a ta; Noa chu suksietin um a tih; chun, Noph chu lunginzîngtakin ni tin um a tih.

¹⁷Aven le Pi-beseth tlangvâlhai chu kâwlhnâmin tlûng an ta, chun, hieng khawpuihai hi sala ṭhuoiin um an tih.

¹⁸Tehaphnehesa chun ni chu hung inthim a ta, chu pha chun Aigupta rîngkawlhai chu suktliek ka ta, amaa chun a thilthawtheina chapona chu tâwp tâng a tih; ama chu sûmpuiin hung inkhum a ta, a naunuhmeihai chu salah fêng an tih.

¹⁹Chuong ang tak chun Aiguptaa chun rorêlna chu sukpuitling ka ta; chun, LALPA chu ka nih ti mi hre tâng an tih,” tiin.

²⁰Kum sâwmpakhatna, thla khatna, chu thla a ni sarinaa chun, LALPA thu chu ka kuomah a hung tlung a,

²¹“Mihriem naupa, Aigupta lal Pharao bân chu ka suktliek ta a; ngai ta, kâwlhnâm chawi ding tâwka hrât dingin, ngar khuoa tuom dingin, sukdamna damdawihai nâl dinga tuom a ni naw a.

²²Chuleiin, Lalpa PATHIEN chun hieng hin a tih; Ngai ta, Aigupta lal Pharao chu ka dodâl a, a tliek ta hnung a kut hrâthai chu suktliek ka tih;

²³chun, kâwlhnâm chu a kuta inthawkin intlâktir bawk ka tih. Chun, Aigupta mihai chu hnamhai laia chun sukdar ka ta, rambunghaia chun hnawt dar ka tih.

²⁴Babulon lal kuthai chu sukhrât ka ta, ka kâwlhnâm chu a kutah sieng ka tih; nisienlakhawm, Pharao bânhai chu suktliek ka ta, ama hmaa chun mi thi khawp raua hliem inrûmin inrûm a tih.

²⁵Chun, Babulon lal bânhai chu chelngîrpêk ka ta, Pharao bânhai ruok chu tlahnuoi a tih; Babulon lal kutah ka kâwlhnâm ka sie a, Aigupta ram chungah ama chun ân let pha chun LALPA chu ka nih ti mi hre tâng an tih.

²⁶Chun, Aigupta mihai chu hnamhai laia chun sukdar ka ta, rambunghaia chun hnawt dar ka tih; chun, LALPA chu ka nih, ti mi hre tâng an tih,” tiin.