Read Hmar EZEKIEL 31 Bible Online

EZEKIEL 31 - Hmar bible

EZEKIEL 31

¹Kum sâwmpakhatna, thla thumna, chu thlaa ni khat ni chun, LALPA thu chu ka kuomah a hung tlung a,

²“Mihriem naupa, Aigupta lal Pharao le a mipuihai kuoma chun hi hi hril rawh; I ropuinaa hin tu ang am i na?

³Ngai ta, Assuria chu Lebanona thingkau ṭha tak nei, Buk hlim nei, dung tieng insâng[29] tak a na; A lêrzîk khawm chu kâu inbuk tak laia chun a um a.

⁴Tuihai chun ama chu a châwm a, li inthûk chun ân ṭhangtir a, A phunna sîr vêla chun a vadunghai chu a luong a, A tui luongnahai chu lova thing tin kuoma chun a tir a.

⁵Chuongchun, ân sângzie chu lova thing po pohai chunga chawisângin a um a, A kauhai chu a tam a, a zârhai chu tui tam lei chun, An hung inzar suok sei tâwl a.

⁶A kâuhaiah chunglêng vatehai po poin buhai an sep a, A zârhai hnuoia chun rama ramsahai po po chun têhai an nei a, A hlim hnuoiah hnam ropuihai po po chu an chêng ta a.

⁷A kâuhai seizie le a ropuinaa chun chuong anga mâwi chu a na, A zung chu tui tamtaka chun a um si a.

⁸Pathien huona sidarhai chun ama chu tluk thei naw ni a, Fâr thinghaiin a kau khawm an tluk nawh, Insethingin a zâr khawm a tluk naw a, A mâwinaa chun ama ang Pathien huonah thing hrim a um nawh.

⁹A zârhai tam lei chun ka siem mawi a, Chu lei chun, Pathien huona um Edena thing po pohai chun ama an îtthîk a.

¹⁰“Chuleichun, Lalpa PATHIEN chun hieng hin a tih; Insâng tienga chun chawisângin i um a; a lêrzîk chu kâubuk sataka chun ân umtir a, ân sâng lei chun a lungril chu suksângin a um a;

¹¹hnamhai laia mi thilthawtheitak kutah ama chu pe suok ka ta; ama chu sawisa ngei a ta, a rîtlona lei chun ama chu ka hnawt suok tah a nih.

¹²Ram dang mi hnamhai ṭisimhai chun, ama chu an sât thlâk a, ama chu an mâksan ta a; tlâng chungahai le phairuom po poahai chun a kâuhai chu an tla a, a kâuhai po po chu rama tui luongnahai chun an suktliek bawk a; hnuoia hnam tinhai chu a hlima inthawk chun an fe thla a, an mâksan ta a.

¹³Suksieta a umnaa chun chunglêng vatehai po po chu chêng an ta, ram hnuoia sahai po po khawm chu a kâuhai chunga chun um an tih;

¹⁴a tâwpa chun tuihai kâwla thinghai po po chun an insâng leiin anni le anni inchawimawi ta ngai naw ni hai a, a kâubuk satak laia chun an lêrzîk khawm chu sie ta bawk naw ni hai a, tui dâwn ta po po chu, an thilthawtheihai chu an insâng ang chun ngîr ta naw bawk an tih; vânsama fe thla tahai, mihriem nauhai laia chun, leihnuoi hnuoi tienga chun anni chu thina kuoma pêk an ni ta si a.

¹⁵“Lalpa PATHIEN chun hieng hin a tih; Hremhmuna a fe thlâk ni chun, sûnna ka siem a; ama ta dingin li inthûk chu kân khum a, chutaka vadungpuihai chu ka sukchâwl a, tui nasatakhai khawm chu an châwl ta a; chun, Lebanon chu ama sûn dingin ka siem a, chun, rama thinghai po po chu ama lei chun an thidang a.

¹⁶Vânsama ṭum tahai laia, hremhmuna ka pei thlâk lai chun, a tlûkna ria chun hnamhai chu ka sukthin a; Eden thing po po Lebanona thing ṭhatak le ditumhai, tui lo dâwn tahai po po chu hnuoi khingtieng panga chun sukhlimin an um a.

¹⁷Kâwlhnâma thata lo um tahai kuomah, ama ruolin hremhmuna chun an fe thla ve a; anih, a bân lo ni taa, hnamhai laia a buk hlim hnuoia lo chêng tahai chu.

¹⁸“Edena thinghai laia hin ropuina le mawinaah ieng le hin am in inang a? Hnuoi khingtieng panga chun Eden thinghai le chun nang chu sukhnuoi i la ni ding a nih; kâwlhnâma thata lo um tah, sertan lohai laia chun i zâl ve ding a nih; Hi hi Pharao le a mipuihai chu an nih, Lalpa PATHIEN chun a tih,” tiin.