Read Hmar EZEKIEL 33 Bible Online

EZEKIEL 33 - Hmar bible

EZEKIEL 33

¹LALPA thu chu ka kuomah a hung tlung a:

²“Mihriem naupa, i chipui thlahai kuoma chun thu hril la, an kuomah hieng hin ti rawh: ‘Ram chunga chun kâwlhnâm ka hung intlungtir pha, rama mihai chun anni laia mi an lâk a, an ta dinga vêngtu anga an sie chun;

³ram chunga chun kâwlhnâm chu a hung tlung phaa a lo hmu chun tawtawrâwt mût sienla, mipuihai chu vaulâwk raw se;

⁴tukhawma tawtawrâwt ri chu hrea, vaulâwkna pawisa lo chu, kâwlhnâm chu a hung tlung a, ama chu lâk hmang a ni chun, a thisen chu ama lu chunga ngei chun um a tih.

⁵Tawtawrâwt ri chu a hriet a, nisienlakhawm, vaulâwkna chu a pawisa naw a; a thisen chu ama chunga chun um a tih, vaulâwkna chu lo pawisa ni sien chu a nun chu a sanhim ding a nih.

⁶Nisienlakhawm, vêngtu chun kâwlhnâm hung tlung chu a hmu a, tawtawrâwt a mût naw a, mipuihai chu vaulâwk an ni naw a, kâwlhnâm chu a hung tlung a, anni laia mi tukhawm chu a lâk hmang chun; a suolnaa chu lâk hmang a na; amiruokchu, a thisen maw chu vêngtu kuta chun phût ka tih,’ tiin.

⁷Chuongchun, nang mihriem naupa, Israel sûngkuo ta ding chun vêngtuah ka sie ta che a nih; chuleiin, ka baua thu chu hre la, anni chu keimaa inthawka vaulâwkna chu pe rawh.

⁸Mi rilo kuoma chun, ‘Aw mi rilo, i thi ngei ding a nih,’ ka ti a, mi rilo chu a um dân bânsan dinga vaulâwkna thu i hril si naw chun mi rilo chu ama suolnaa chun thîng a ta, amiruokchu, a thisen maw chu nangmaa chun ka phût ding a nih.

⁹Nisienlakhawm, mi rilo chu a um dân bânsan dinga i vaulâwk a, a um dân a bânsan si naw chun, ama chu ama suolnaa chun thîng a ta, nang chun i nun i sanhim nîng a tih.

¹⁰“Chun, nang mihriem naupa, Israel sûngkuo kuoma chun hieng hin hril rawh, ‘Hieng ang hin in ti a; Ei bâwsietnahai le ei suolnahai chu ei chungah a um a, annia chun ei riral hmang a ni hi, iengtin am hring ei ta?’ tiin.

¹¹An kuoma chun, ‘Ka hring zing angin, Lalpa PATHIEN chun hieng hin a tih; mi rilo thinaa chun lâwmna ka nei naw a; mi rilo chu a um dân a bânsan a, a hring ruok chun lâwmna ka nei a; hung kîr ro, in lampui suola inthawk chun hung kîr ro; aw Israel sûngkuo, iengdingin am thîng in ta?’ ti rawh.

¹²Chun, nang mihriem naupa, i chipuihai thlahai kuoma chun hieng hin hril rawh; mi fel felna chun ama chu a bâwsietna nia chun sanhim naw ni a; mi rilo rîtlona thua chun, a rîtlonaa inthawka a hung kîr nia chun a rîtlonaa chun tlu naw nih; chun, mi fel chu a suksuolna nia chun a felnain hring bawk naw nih.

¹³Mi fel kuoma chun a hring ngei ding a ni ka ti pha chun, a felna chu a ring a, suolna a thaw chun, a thil thaw felhai chu a ieng khawm hriet zing ni naw ni a; amiruokchu, a suolna a lo thaw taa chun thîng a tih.

¹⁴Chun, mi rilo kuomah, ‘I thi ngei ding a nih,’ ka ti ve a; ama chu a suolnaa inthawk chun a hung kîr a, ân dik le dân thil chu a thaw chun;

¹⁵mi rilo chun bathai chu a thung a, arûka a lâk tahai chu a pêk nâwk a, nun dân thuruot chu a hraw a, thil a suksuol naw chun, hring ngei ngei a ta, thi naw nih.

¹⁶Ama chunga chun thil a lo suksuol tahai hrim hrim a ieng khawm chu hriet zing ni ta naw ni a; ân dik le dân thil chu a lo thaw tâk lei chun a hring ngei ding a nih.

¹⁷Amiruokchu, i chipui thlahai chun, ‘Lalpa lampui chu ân ang vawng naw a,’ an ti chun, anni chungthua ruok chun, anni lampui chu ân ang vawng naw lem a.

¹⁸Mi fel chu a felnaa inthawka ân herhmanga thil suol a thaw chun, chutaka chun a thi ngei ding a nih.

¹⁹Chun, mi rilo chu a rîtlonaa inthawka ân her hmanga, ân dik le dân thil chu a thaw chun, chutaka bawk chun hring a tih.

²⁰Amiruokchu, ‘Lalpa lampui chu ân ang vawng nawh,’ in la ti rawp chun, Aw Israel sûngkuo, mi tin chu ama lampuihai ang sengin, a chungah rorêl ka tih,” tiin.

²¹Kan sal intâng a kum sâwmpahni kum, thla sâwmna, chu thla ni nga ni chun Jerusalema inthawka hung tlân suok mi pakhat chu ka kuomah a hung a, ka kuomah “Khawpui chu suksiet a ni tah,” a hung ti a.

²²Chun, chu hung tlân suok hung hma, zântieng chun LALPA kut chu ka chungah a um a, zîngkâra ka kuoma a hung hma po chun ka bau chu a mîn kâktir a; ka bau chu inkâktirin a um a, ṭawng thei lovin ka um ta naw a.

²³Chun, LALPA thu chu ka kuomah a hung tlung a,

²⁴“Mihriem naupa, Israel rama hmun se tahai hluotuhai chun thu an hril a, ‘Abraham chu pakhat chau a na, ram chu a lo hluo ta a; eini hlak chu tamtak ei na, ram chu hluo dinga pêk ei ni tho a,’ tiin.

²⁵Chuleiin, an kuoma chun, Lalpa PATHIEN chun hieng hin a tih: Thisen leh bu in fâk a, in milimhai tieng chun in mithai in inlên a, thisen in insuo a, ram chu in chang hrim ding am a nih?

²⁶In kâwlhnâm chu in ring a, thil pawrche chu in thaw a, mi tinin mâni tuolbâwm nuhmeihai chu in sukpawrche a; ram chu in chang hrim ding am a nih?

²⁷Hieng hin an kuoma chun hril rawh; Lalpa PATHIEN chun hieng hin a tih: Ka hring zing angin, chuong hmun se taa umhai chu kâwlhnâmah tlûng an ta, rama umhai chu ramsahai kuomah fâk zo dingin ka pêk ding a nih; chun, kul det le pûka umhai chu hripuiin thîng an tih.

²⁸Ram chu râusanah siem ka ta, maktia um ding leh; a thilthawtheina chapona chu re tâng a ta, Israel tlânghai chu râusan ni tâng a ta, tukhawm fethleng ta naw ni hai.

²⁹An thil pawrche lo thaw tahai po po leia ram chu râusan le maktia um dinga ka siem pha chun, LALPA chu ka nih ti mi hre tâng an tih.

³⁰“Nangma chungthua chu, mihriem naupa, i chipuihai thlahai chu bang hrûla le in kawtkhârhaia chun nanga chanchin an hril a, anni le anni an inbiek a, mi tinin a unau kuoma chun, ‘La hung ta, ka ngên che hi, LALPAA inthawka hung suok thu chu ieng am a nih hung ngai ta,’ an ti a.

³¹Mipuihai chu an hung angin i kuoma chun anni chu an hung a, ka mihai angin i hmaa chun an ṭhung a, i thuhai chu an ngai a, amiruokchu, thaw si lovin; an bau chun nasatakin hmangaina an inlangtir a, amiruokchu, an lungrilhai chun an hlâwkna chu a hnawt si a.

³²Ngai ta, an ta ding chun nang chu mi pakhat râwl ṭhatak neia, thil sutmihai sut thiem mi hla ditumtak ang[33] chu i nih; i thuhai chu an hriet a, an thaw si naw a.

³³Chun, hi hi a hung tlung pha chun, (ngai ta, a hung tlung mêk) anni lai chun zâwlnei a lo um zing a nih, ti hre tâng an tih,” tiin.