Read Hmar EZEKIEL 34 Bible Online

EZEKIEL 34 - Hmar bible

EZEKIEL 34

¹Chun, LALPA thu chu ka kuomah a hung tlung a:

²“Mihriem naupa, Israel berâmpuhai chungah thu hril la, thu hril la, berâmpuhai kuom ngeia chun, an kuoma chun hril rawh; Lalpa PATHIEN chun hieng hin a tih; Israel berâmpuhai mâni le mâni inchâwmtuhai chu an chung a rik de; berâmpuhai chun berâmhai chu an châwm ding a ni naw am a nih?

³Thâu chu in fâk a, sahmulin in inthuom a; châwm thâuhai chu in that a; nisienlakhawm, berâmhai chu in châwm naw a.

⁴A hrât naw chu in sukhrât naw a, a na khawm chu in sukdam bawk naw a; a tliek khawm chu in tuom naw a, khal hmanga um ta khawm chu in hung ṭhuoi nâwk bawk nawh, ân hmang khawm chu in zawng bawk nawh; amiruokchu, thawluina le, hrohrângsetakin an chungah ro in rêl a.

⁵Anni chu berâmpu an um naw leiin an indar a; rama sahai po po ta ding chun bu an na, sukdarin an um ta a.

⁶Ka berâmhai chu tlâng po po le muol insâng tinahai chun an invâk a; anih, ka berâmhai chu leihnuoi pumpui chunga chun an indar tah a ni hi; mi tukhawm anni chu zawnga hmusuok tum an um si nawh.

⁷Chuleiin, nangni berâmpuhai, LALPA thu chu ngai ta u;

⁸Lalpa PATHIEN chun, Ka hring zing angin ka berâmhai chu, berâmpuhai an um naw a, ka berâmpuhai chun ka berâmhai chu an zawng bawk naw a, berâmpuhai chu anni le anni an inchâwm a, ka berâmhai chu an châwm naw leiin, rama ramsahai po po bu le an sasehai chu an lo ni ngei chu a ni ta hi;

⁹chuleiin, nangni berâmpuhai, LALPA thu chu lo ngai ta u;

¹⁰Lalpa PATHIEN chun hieng hin a tih: Ngai ta, berâmpuhai chu ka dodâl a nih; ka berâmhai chu an kutah lâkpêk ka ta, an berâm châwm chu inmâktir ka tih; anni berâmpuhai khawm chu mâni le mâni inchâwm bîk ta naw bawk an tih; chun, an ta dinga bu an ni nawna dingin ka berâmhai chu an baua inthawk chun la suok ka tih.

¹¹“Lalpa PATHIEN chun hieng hin a ti si a; Ngai ta, keima ngeiin, keiin ka berâmhai chu zawng ka ta, zawng suok bawk ka tih.

¹²Berâmpu chun sûnah a berâm ruol chu a zawng a, berâm a lo indarhai laia chun a um hlak angin, ka berâmhai chu zawng suok ka ta; inthim le sûmzîng nia an lo invâk darna hmunhai po poa inthawk chun anni chu zawng suok ka tih.

¹³Hnamhai laia inthawk chun hung ṭhuoi suok ka ta, rambunghaia inthawk chun kei khâwm ka ta, anni ram ngeia chun ṭhuoi lût ka tih; chun, Israel tlâng chungahai le, tui luongna sîrahai le, chu ram, hluoa a umna hmun po poahai chun anni chu intlattir ka tih.

¹⁴Hlo pet ding ṭhatak chun anni chu châwm ka ta, Israel insângna tlâng chungahai chun an in chu um a tih; in ṭhatak sûnga chun bawk an ta, Israel tlâng chungahai chun hlo petna hmun tuihnâitaka chun tlâng an tih.

¹⁵Lalpa PATHIEN chun, Ka berâmhai chu keima ngeiin châwm ka ta, anni chu inbawktir ka tih, a tih.

¹⁶A lo inhmang ta chu zawng ka ta, hnawt hmanga lo um ta khawm chu hung ṭhuoikîr nâwk ka tih; sukthlieka um ta chu tuom ka ta, damnawa um khawm chu sukhrât bawk ka tih; a thâu le a hrât chu suksieng ka ta; anni chu rorêlnain châwm ka tih.

¹⁷Chun, nangni thua chu, Aw ka berâm ruol, Lalpa PATHIEN chun hieng hin a tih: Ngai ta, kêlchalhai le berâmchalhai ang bawkin, ran ruol le ran ruol chunga chun ro ka rêl a.

¹⁸Hlo pet ding ṭha hmuna tlat chu in ta ding chun thil chînthamah ân lang thei a, nisienlakhawm, in hlo pet mahlahai chu in kehaiin in sirde naw ding am a nih? Tui inthiengtakhai hang dâwn ding khawm chun a mahla chu in kehai chun in pal siet naw ding am a nih?

¹⁹Chun, ka berâm ruolhai chun, in kehaia in sir chen ta hnunghai chu an fâk a, in kehaiin a lo pal siet tahai chu an dâwn bawk a ni hi.

²⁰“Chuleichun, Lalpa PATHIEN chun an kuomah hieng hin a hril a: Ngai ta u, Keiin, kei ngeiin, ran ruol thâu le ran ruol chêr inkâra chun ro rêl ka ta.

²¹Liengko le sîrin in hneng a, in sukdar phier hmakhat chun in kihai chun a damnawhai chu in sik leiin,

²²ka berâm ruol chu ka sandam ding a nih, anni chu fâk zoin um nâwk ta naw ni hai a; ran ruol le ran ruol inkâr thu chu ka rêl ding a nih.

²³An chunga chun berâmpu pakhat sieng ka ta, ka siehlaw David ngei chu, ama chun anni chu châwm a ta, an ta dingin berâmpu nîng a tih.

²⁴Chun, kei LALPA hi in Pathien nîng ka ta, ka siehlaw David chu anni laia lal nîng a tih; hi hi kei LALPAIN ka hril ta a nih.

²⁵Anni le inremna thuthlung siem ka ta, rama inthawk chun ramsa rilohai chu inrêmtir vawng ka tih; thlalêra chun himtakin chêng an ta, rampui hnuoia chun zâl an tih.

²⁶Chun, ka tlâng sîra hmunhai le anni chu malsâwmah siem ka ta; ruohai khawm a huntakah hung insûrtir ka ta; malsâwmna ruohai sûr hlak a tih..

²⁷Loa thinghai chun ra hung insuong an ta, leihnuoi khawma a hlâwkna hung insuo bawk a tih; chun, an ram sûnga chun him an ta, an rîngkawl thîrtluonhai ka suktliek a, an rawng an bâwlpêkhai kuta inthawka ka sansuok pha chun LALPA chu ka nih ti mi hre tâng an tih.

²⁸Chun, khawhri be mihai ifâk zoin um ta ngai naw ni hai a, hnuoia ramsahai khawma anni chu fa zo bawk naw ni hai; amiruokchu, himtakin chêng an ta, tukhawma anni chu sukṭi ta naw ni hai.

²⁹Anni lai chun hming inthang khawp[34] thlâichingna pêng ka ta, chu rama chun ṭâm ifâk zoin um ta naw ni hai a, hnam danghai biekrâwpna chu tuor ta bawk naw nihai.

³⁰Chun, kei LALPA an Pathien chu an kuomah ka um a, anni, Israel sûngkuo chu, ka mihai an nih ti hre tâng an tih, Lalpa PATHIEN chun a tih.

³¹Chun, nangni ka berâmhai, ka hlo petna hmuna berâmhai chu mihriemhai hi in na; chun, kei in Pathien chu ka nih, Lalpa PATHIEN chun a tih,” tiin.