Read Hmar EZEKIEL 35 Bible Online

EZEKIEL 35 - Hmar bible

EZEKIEL 35

¹Chu nawa khawm chun LALPA thu chu ka kuomah a hung tlung a:

²“Mihriem naupa, Seir tlâng chu i hmai innghat la, a chunga chun thu hril la,

³a kuoma chun hieng hin ti rawh: Lalpa PATHIEN chun hieng hin a tih: Ngai ta, nang chu ka dodâl che a, aw Seir tlâng, i chunga chun ka kut kân let ding a nih; chun, nang chu râusana le maktiah ka siem ding che a nih.

⁴I khawpuihai chu suksietin inumtir ka ta, nang khawm râusanin um i tih; chun, LALPA chu ka nih ti mi hre tâng i tih.

⁵Hun tâwpa hremna huna, an vângsiet lai hunah Israel thlahai chu kâwlhnâm thilthawtheina kuoma i lo pêk a, anni chu hmêlmâkna rê lo i nei leiin;

⁶ka hring zing angin, Lalpa PATHIEN chun hieng hin a tih: thisen ta dingin buotsai ka ti che a, thisen chun hnawt a ti che; thisen chu i theida naw leiin, thisen chun hnawt a ti che.

⁷Chuongchun, Seir tlâng chu râusan le maktia um dingin siem ka ta; chun, amaa inthawka fe suokhai le, kîr nâwkhai chu sâtthlâng ka tih.

⁸I tlânghai chu a mi thathai chun suksip ka ta; i muolahai, i phairuomahai le i tui luongnahaia chun kâwlhnâma thata umhai chu tlûng an tih.

⁹Kumkhuoa râusanah siem ka ta, i khawpuihai chu hluo ni nâwk ta ngai naw nih; chun, LALPA chu ka nih ti mi hre tâng i tih.

¹⁰“Nang chun, ‘Hi hnam hnihai le hi ram pahnihai hi ka ta nîng a ta, nei ka tih,’ i ti leiin, chutaka chun LALPA chu a um a,

¹¹chuleiin, ka hring zing angin, Lalpa PATHIEN chun hieng hin a tih; an chunga i lo inentir tah, anni i thîkna ang pei le, i lunginsenna hu ang peiin ka thaw ding a nih; i chungthu ka rêl pha chun, anni[35] laia chun an mi hriet dingin insiem ka tih.

¹²Chuongchun, ‘Suksietin an um ta a, ei kuomah fâk zo el dingin pêkin an um ta a ni hi,’ tia Israel tlânghai chunga thu i lo hril a, anni i lo demnahai po po chu kei LALPA hin ka hriet vawng a nih, ti hre tâng i tih.

¹³Chun, i bauin keia chungah nang le nang în chawimawi a, ka chunga i thuhrilhai i sukpung a; ka hriet a nih.

¹⁴Lalpa PATHIEN chun hieng hin a ti a nih: Leihnuoi pumpui chu a hlim pha chun, nang chu râusanah siem ka ti che.

¹⁵Râusan a ni leia Israel sûngkuo rochan chunga chun i lo hlim ta ang khan, i chungah chuong ang tak chun ka thaw ding a nih; Aw Seir tlâng, Edom tlâng po po, a rêng elin, râusan nîng in tih; chun, LALPA chu ka nih ti mi hre tâng an tih.