Read Hmar EZEKIEL 38 Bible Online

EZEKIEL 38 - Hmar bible

EZEKIEL 38

¹Chun, LALPA thu chu ka kuomah a hung tlung a:

²“Mihriem naupa, Ros, Mesek le Tubal hai hotu tak Magog rama Gog tieng ngha la, a chunga chun thu hril la,

³Lalpa PATHIEN chun hieng hin a tih: Ngai ta, Aw Gog, Ros, Mesek le Tubal hai hotu tak, nang ka dodâl che a nih;

⁴i hnung innghattir ka ti che a, i khâkruhaia chun ngakuoihai kuoi ka ta, nang le i sipai pâwl po po, kâwlhnâm hmangtuhai po po, âwmphaw le phaw hmanga pâwl nasatakhai leh, râlthuom famkima inthuomhai po po le, sakawrhai le i sakawr chung chuong mihai po po leh ka khai dawk ding cheu a nih,

⁵anni lai chun Persia le Kus le Put an ṭhang ve a; an rêngin thîr lukhum le phaw hmangin;

⁶Gomer le a rawihai po po leh; chun, a hmârtieng tâwptaka chun Togarma sûngkuohai le a rawihai po po leh; hnam tamtakhai chu nang le ṭhang an nih.

⁷Inbuotsai la, anih, nangma chu inbuotsai la, pâwlhai nanga kuoma hung inkhawmhai po po chunga chun nang chu a vêngtu ni la.

⁸Ni tamtak hnunga chun ko khâwm ning i ta, kum nuhnungahai chun indonaa inthawka sansuok, hnam tamtakhaia inthawka lâk khâwmhai umna ram, Israel tlâng- hai, râusana um zing zing el chu hung tlung i tih; anni chu hnamhai laia inthawka lâk suok an na, an rêng chun himtakin an chêng ding a nih.

⁹Nang chu hang fêng i ta, thlipui angin hung i ta; chun, nang le, i pâwlhai po po le, hnam tamtak nangma kuoma umhai chu chu ram inkhumtu sûmpui ang chu nîng in tih.

¹⁰“Lalpa PATHIEN chun hieng hin a ti a nih: Chu ni chun chuong chu hung tlung a ta, thilhai chu i lungrila chun hung lût a ta, ngairuotna rilo ngairuot i ta,

¹¹khuohai kul neilova an umna rama chun hang fêng ka ta, to ṭawk ṭawka chênghai, himtaka chênghai kuoma chun; an rêngin kul neilovin an chêng a, dai kawtkhârhai le kalna thîrtluonhai bovin;

¹²Râllâk sumhai la ding le, râlhai man ding le, tuta hluoa um tah hmun se tahai le, hnamhaia inthawka mipui lâk suokhai, hnuoi lailia chênga ran ruolhai le thuomhnawhai neia khawsahai chunga chun kut inlet dingin fêng ka tih, tîng i ta.

¹³Seba le Dedan le, Tarsis sumdâwng mihai le, chutaka sakeibaknei tuoihai chun i kuomah, ‘Râllâk sumhai chu la dinga hung am i nih? Râl chu man dingin i pâwlhai chu i kei khâwm ta am a nih? Rângkachak le tangka dâm phur hmang ding le, ran ruolhai chu ṭhuoi hmanga, thuomhnawhai chu la hmang a, râllâk sum nasatak el la ding chun?’ tîng an ti che a.

¹⁴“Chuleiin, mihriem naupa, thu hril la, Gog kuoma chun hieng hin ti rawh, Lalpa PATHIEN chun hieng hin a tih: Ka mi Israelhai hi himtaka an chêng nia chun, i hriet naw ding maw?

¹⁵Hmârtieng kil khâwra hmunhaia inthawk chun hung i ta, nang le i kuoma mi tamtak leh, anni chu an rêngin sakawr chunga chuong, pâwl ropuitak, sipai pâwl thilthawtheitak nîng an ta;

¹⁶ka mi Israelhai chu hung do i ta, sûmpuiin ram a hung tuom ding ang elin; chun, ni nuhnungahai chun aw Gog, an mithmu ngeia nangmaa sukthienga ka um phaa hnam tamtakhai chun an mi hriet theina dingin, ka ram chu indodâl tir ka ti che.

¹⁷Lalpa PATHIEN chun hieng hin a tih: ka siehlaw Israel zâwlneihaiin kum tamtaka chun anni indotir ka ti che tia chuong nihaia an lo hril, tienlaia a chanchin an lo hril hlak kha i ni naw am a nih?

¹⁸“Gog chun Israel ram chu a hung do pha, chu nia chun, Lalpa PATHIEN chun a tih; Ka ṭiumna chu ka hnârkuoa inthawkin khu suok a tih.

¹⁹Ka îtthîkna le ka lunginsen lai chun ka hril ta si a: Matheilovin, chu ni chun Israel rama chun inhnîngna nasatak um a ta,

²⁰chuongchun, tuipuia ngahai dâm, chunglêng vatehai dâm, rama ramsahai dâm, hnuoi chunga bawkvâka invâk thilhringhai po po dâm, hnuoi phêk chunga mihriem umhai po po dâm, ka hmaihmaa chun inthin an ta, tlânghai chu pei thlûkin um an ta, hmun inṭênhai chu tlathlâng an ta, kulbang tinhai chu hnuoiah tlâng an tih.

²¹Ka tlânghai po po kuoma chun, ama[38] do dingin kâwlhnâm[39] ko ka ta, Lalpa PATHIEN chun a tih; mi tin kâwlhnâm chu a unau chungah um a tih.

²²Ama chu thisen le hripuiin do ka ta; chun, ama le a pâwlhai le ama kuoma mipui tamtak umhai chunga chun ruopui vânâwnin, ṭêk le mei le meitâwklungin sûr ka ta.

²³Chun, kei le kei inchawimawiin, insukthieng ka ta, hnam tamtakhai mithmua chun kei chu insukhmêlhriet ka ta; chun, LALPA chu ka nih ti mi hre tâng an tih.