Read Hmar EZEKIEL 42 Bible Online

EZEKIEL 42 - Hmar bible

EZEKIEL 42

¹Chun, hmârtieng lampuia, huon sûng tuollai puo lema chun a mi ṭhuoi suok a; hmârtieng panga in zâwna um, hmun daidan epa pindan kêma chun a mi ṭhuoi lût a.

²Hmartieng panga pindan chu a sei tieng tawng za khat a na; a khang tieng chu tawng sâwmnga a nih.

³Huon sûng tuollai sûngril lema ṭhang tawng sâwmhni zâwna le, huon sûng tuollai puo lem epa lungpha zâwna chun dawdan inep ṭhieuin sâwng thumin a um a.

⁴Chun, pindanhai hmaa chun, sûnglûtin inlawnna tawng sâwma lien, tawng za khata sei a um a; chun, an kawtkhârhai chu hmar sawng an nih.

⁵Chun, pindan chunghnung lemhai chu an tawi lem a; dawdanhai chun a hnuoihnung le a laitak nêkin ina chun hmun an aw lien lem si a.

⁶Sâwng thum an ni si a; huon sûng tuollaia sûtpuihai ang kha sûtpui an nei ve naw a; chuleiin, a chunghnung tak chu a hnuoia nêkin ân têp a, a hnuoihnung tak nêkin a lailung chu ân têp lem a.

⁷Pindan kêmhai zâwn pei puoah, tuollai puo lem tiengah pindanhai epa ân huonna chu tawng sâwmngaa sei a nih.

⁸Huon sûng tuollai puo lema pindan chu a dung tieng tawng sâwm- nga an ni si a; chun, ngai ta, biekin tuola chun tawng za khat a nih.

⁹Hieng pindanhai hnuoia hin saktieng pangah lûtna a um a, huon sûng tuollai puo lema inthawka lûtna chu.

¹⁰Chutaka chun puo tieng bang ân ṭan a. Simtienga khawm huon sûng tuollai le inepa chun pindanhai an um bawk a.

¹¹An hmaa lampui chu hmârtienga pindanhai lampui ang bawk kha a na; an seizie le a khang tieng khawm ân ang; a suokna lampuihai le an rem dân dâm, a kawtkhârhai chenin ân ang vawng a nih.

¹²Simtieng panga pindanhai hnuoia chun saktieng pangah lûtna a um a, chu chu fe thlengna lampui chu a nih. Chuonghai epa chun pindanna bang a um a.

¹³Chun, ama chun ka kuomah, “Hmârtienga pindanhai le simtienga pindanhai, hmun âwl hmaa umhai hi, pindan inthieng, thiempu LALPA hnaituhaiin thil inthiengtakhai an fâkna ding a nih; chutaka chun thil inthiengtakhai chau chu sieng an tih, bu thilinhlân dâm, suol thilinhlân dâm, bawsietna thilinhlân dâm chu; chu hmun chu ân thieng si a.

¹⁴Thiempuhai chu an lût pha chun, huon sûng tuollai puo lema chun hmun inthienga inthawk chun an fe suok ding a ni naw a, amiruokchu, chutaka chun, an rawngbâwlnaa chun an silfênhai sieng an ta; an inthieng si a; silfên dangin inbel an ta, chun, mipui tieng chu an hung hnai chau ding a nih,” a ta.

¹⁵Chun, in sûngril lem chu inkhi zo hnung chun, dâi kawtkhâr, saktieng nghaa chun a mi ṭhuoi suok a, chun, a vêl chun ân khi ta a.

¹⁶Inkhina luonghmawl chun sak-tieng chu ân khi a, inkhina luonghmawl chun a vêlin tawng za nga a nih.

¹⁷Chun, hmârtienga khawm chun a vêlin, inkhina luonghmawl chun tawng za ngain ân khi bawk a.

¹⁸Inkhina luonghmawl chun, simtieng pang khawm chu tawng za ngain ân khi a.

¹⁹Chun, thlang tieng chu ân khi nâwk a, inkhina luonghmawl chun tawng za ngain ân khi a.

²⁰A sîr lia chun ân khi ta a, a sei tieng chu za nga, a khang tieng khawm za nga bawk, a vêlin bang a nei a, hmun narân le hmun inthieng chu ṭhena dingin.