Read Hmar EZEKIEL 44 Bible Online

EZEKIEL 44 - Hmar bible

EZEKIEL 44

¹Chun, hmun inthieng dâi kawtkhâr tuol hnai lema, saktieng nghaa chun a mi ṭhuoi kîr nâwk a, a lo inkhâr zing a.

²Chun, LALPA chun ka kuomah, “Hi dâi kawtkhâr hi in khâr zing ding a na, hawng ding a ni nawh; mi tukhawm ahin lût bawk naw ni hai, LALPA Israelhai Pathien chu a lo lût ta si a; chuleiin, khâr a ni zing ding a nih.

³Chun, lal chungthua chun, LALPA hmaa bei fa dingin lal angin chutaka chun ṭhung a ta, dâi kawtkhâr tuolpûk lampuia khan lût a ta, chu bawka chun a suok nâwk ding a nih,” a ta.

⁴Chun, in hmaia hmâr tieng dâi kawtkhâra chun a mi ṭhuoi a; chun, ka hei en a, ngai ta, LALPA ropuina chun LALPA in chu a sip a; chuongchun, bawkkhupin ka tlu ta a.

⁵Chun, LALPA chun ka kuomah a hril a, “Mihriem naupa, inchikṭha la, i mithai khan en rawh, LALPA Ina thupêkhai po po chungthu le, chutaka dânhai po po chungthua ka thuhril chu i nahai khan lo ngai bawk la; chun, ina va lûtna le, hmun inthienga inthawka suokna tinhai chu inchik ṭha bawk rawh.

⁶Chun, mi helhai, Israel sûngkuo kuoma chun hieng hin hril la: Lalpa PATHIEN chun hieng hin a tih: Aw nangni Israel sungkuo, in tirdakumna chu huntâwk ta raw se;

⁷lungrila sertan lo le tisa khawma sertan lo, hmêlmakhai ka hmun inthienga um ding le, sukpawrche dinga ka in ngeia in hung lâklût leia in tirdakumna hi huntâwk ta raw se; Bei dâm, sathâu dâm, thisen dâm chu in inhlân lai chun, ka thuthlunghai chu in bawsiet a, in tirdakumnahai chu belsa ding chauin.

⁸Chun, ka thil inthienghai vêng ṭhatna sin chu in kawl naw a, amiruokchu, chu ka hmun inthienga chun in aia ka sinhai kawltu dinghai in ruot lem a.

⁹“Lalpa PATHIEN chun hieng hin a ti a nih: Mi hmêlmak, lungrila sertan lo, tisa khawma sertan lo mi hmêlmak ieng ang khawm Israel thlahai laia lo um ta khawm chu, ka hmun inthienga chun a lût ding a ni naw a.

¹⁰Nisienlakhawm, Israelhai, an milimhai hnawta an invâk hmang laia keimaa inthawka hlataka fe tahai Levi mihai chun anni suolna chu phur an tih.

¹¹Ina chun rawngbâwlin, in dâi kawtkhârhaia chun enkawlin, ka hmun inthienghaia chun rawngbâwltu nîng an tih; mipuihai ta dinga inthawina le pumrawhmang thilinhlâna ding chu that an ta, anni rawngbâwlpêk dingin an hmaa chun ngîr an tih.

¹²An milimhai hmaa chun an rawng an lo bâwlpêk ta leiin Israel sûngkuo ta ding chun suolnaa tlûkna lung an lo ni ta a; chuleiin, an chunga chun ka kut kân let a, an suolna chu anni ngeiin phur an tih, Lalpa PATHIEN chun a tih.

¹³Keia ta dingin thiempu sin chu thaw dingin, keima hnaia chun an hung ding a ni naw a; ka thil inthieng a ieng khawm, le thil inthiengtakhai chu an hung hnai ding a ni nawh; amiruokchu, an lo thaw tah, an tirdakumnahai le an inzakna chu anni ngeiin phur an tih.

¹⁴Amiruokchu, anni chu in sinhaia enkawltuhaiah siem ka ta, chutaka rawngbâwlnahai po poa ding le, chutaka thaw dinghai po poa chun.

¹⁵“Amiruokchu, thiempu Levi mihai, Zadok naupasalhai, keimaa inthawka Israelhai an invâk hmang lai khawma ka hmun inthieng enkawlna sin kawltuhai chu, ka ta dinga rawngbâwl dingin keia hnaiah hung an ta; sathâu le thisen chu inhlân dingin ka hmaa chun ngîr an tih, Lalpa PATHIEN chun a tih;

¹⁶ka hmun inthienga chun lût an ta, ka rawng mi bâwlpêk dingin ka dawkân hnaia chun hung an ta, ka sin chu kawl an tih.

¹⁷Chun, huon sûng tuollai sûngril lema dâi kawtkhâra an lût pha chun hieng hin nîng a ta, puonzai inhmi puonin an inthuom ding a nih; huon sûng tuollai sûngril lem le, dâi kawtkhâra a sûnga rawng an bâwl lai chun, an chungah sahmul puon an inbel ding a ni naw a.

¹⁸An luhaia chun puonzai inhmi lukâwmhai kâwm an ta, an kâwnga chun puonzai inhmi kekawrhai bun bawk an ta. Thlan suksa thei chi hrim hrimin an inhrên ding a ni nawh.

¹⁹Chun, huon sûng tuollai puo lem, mipuihai umna huon sûng tuollai puo lema chun an hung suok pha chun, an rawngbâwlna an silfênhai kha an hlîp ding a na, chuong chu pindan inthienga chun sieng an ta, silfên dangin an inbel ding a nih, chuongchun, mipuihai chu an silfên hmanga an sukthieng naw nawna dingin.

²⁰“An luhai chu an vâw kawl ding a ni naw a, an sam chu inṭhang seitir chu an phal bawk ding a ni naw a; an lu chu a ṭhawlin an ṭhawl chau ding a nih.

²¹Huon sûng tuollai sûngril lema an lût laiin thiempu tukhawma uoin a dâwn ding a ni nawh.

²²Nuhmei ding khawma hmeithai amanih, mâka um amani chu an nei ding a ni naw a; amiruokchu, Israel sûngkuo chia mi nunghâk hnakhathai an lâk ding a nih; annawleh, hmeithai, thiempu nuhmei a thisan.

²³Ka mihai chu thil inthieng le thil narânhai inkâra danglamnahai chun inchûktir an ta, thil thieng le thieng naw chu an inhriet ṭhentir ding a nih.

²⁴Thubuoia chun rorêltuin an ngîr ding a na; keia rorêl dân dungzui peiin ro an rêl ding a nih; ka ruoiṭhe hunbi neihaia chun ka thuruothai, ka dânhai chu an zâwm ding a nih; chun, ka châwlni khawm chu an inser bawk ding a nih.

²⁵Chun, mi thi kâwla chun anni le anni insukpawrche dingin an hung ding a ni naw a, amiruokchu, pa ta dingin amanih, nu ta dingin amanih, naupa ta dingin amanih, naunu ta dingin amanih,unaupa ta dingin amanih, farnu pasal la nei lo ta dingin amanih chun anni chu insukpawrche thei an tih.

²⁶Chun, sukthieng a ni hnunga chun ama chu ni sari tiempêk an tih.

²⁷Chun, hmun inthienga, huon sûng tuollai sûngril lema, hmun inthienga rawngbâwl dinga a fe ni chun, a suol thilinhlân chu ân hlân ding a nih, Lalpa PATHIEN chun a tih.

²⁸Chun, rochan nei nâwng an ta; kei hi an rochan chu ka nih; Israela chun ro pe naw ti ni a, kei hi an thilnei chu ka nih.

²⁹Bu thilinhlân dâm, suol thilinhlân dâm, bawsietna thilinhlân dâm chu fâng an ta; Israel laia thilhlân tinrênghai chu an ta nîng a tih.

³⁰Chun, thil tinrêng rahmasahai hmasatak le, thil tinrêng thêna inhlânhai chu, in thilinhlânhai po po chu thiempuhai chan nîng a ta, chun, thiempu kuoma chun in beihmet hmasatak chu in in sûnga malsâwmna a um theina dingin in pêk bawk ding a nih.

³¹Thiempuhai chun thilhring amaa thi amanih, keinawia um amanih, ramsa khawm ni sien, vate khawm ni sien an fâk ding a ni nawh.