Read Hmar EZEKIEL 45 Bible Online

EZEKIEL 45 - Hmar bible

EZEKIEL 45

¹“Chu nawa khawm chun, rochan dinga aisâna ram chu i sem pha chun, LALPA kuoma chun thilhlân în hlân ding a nih, ram ân thiengna hmun tak, a dung chu tawng sîng hni le sâng nga nîng a ta, a khang chu sîng hni nîng a tih: A sîr vêlin a ramri huopsûng po poa chun ân thieng ding a nih.

²Hi sûnga hin hmun inthieng a dung tawng za nga, a khang tawng za nga bawk a um ding a nih; a vêla inchenin; chun, a sîr a vêlin hmun ruok tawng sâwmnga um bawk a tih.

³Chun, hi hi tiet hi inkhîng i ta, a dung tawng sîng hni sâng nga, a khang sîng khat; chu sûnga chun hmun inthieng, ân thieng tak chu a um ding a nih.

⁴Ram hmun inthieng chu a na, thiempuhai hmun inthienga rawngbâwltuhai, LALPA hmaa rawngbâwl dinga hung hnaihai ta ding chu nîng a tih; an inhai hmun ding le, hmun inthieng ta dinga hmun inthieng chu nîng a tih.

⁵Chun, a dung tawng sîng hni sâng nga le a khang tawng sîng khat chu Levi mihai, chu ina rawngbâwltuhai, chêngna khawpui dingin, an chan ding chu nîng a ta.

⁶Chun, khawpui iṭhut ding hmun tawng sâng ngaa lien, tawng sîng hni sâng ngaa sei, chan inthieng inhlânna epa khan ruot i ta, chu chu Israel sûngkuo pumpui ta ding nîng a ta.

⁷Chun, lal ta dinga hmun chu sîr khata chun nîng a ta, a sîr khing tienga chun hmun inthieng thil inhlânna, khawpui sûng ṭhut le, hmun inthieng inhlânna hmatieng chu nîng a ta, saktienga chun khi saktiengah, thlangtienga inthawk chun khu thlangtiengah, chun, a dung tieng chu, thlangtieng ramria inthawka saktieng ramri chenin hmun pakhat ep chu nîng a tih.

⁸Chu ram chu Israelhai laia ama ta dinga a chan chu nîng a ta; ka lalhai chun ka mihai chu nêksâwr ta ngai naw ni hai a; amiruokchu, Israel sûngkuo laia chun an hnam ang peiin ram chu pe lem tâng an tih.

⁹“Lalpa PATHIEN chun hieng hin a tih; Aw Israel lalhai, inhuntâwktir ta ro; pâwngnêkna le suksietna chu sie hmang unla, indikna le rorêl fel chîng ta unla; ka mihai hnawt suok hi ma ta ro; Lalpa PATHIEN chun a tih.

¹⁰Bûkna indiktakhai chu nei in ta, epha indik le, bath indik le chun.

¹¹Epha le bath chu inkhina angkhat nîng an ta, bath chun homer hmun sâwma ṭhea hmun khat keng a ta, epha khawm chun homer hmun sâwma ṭhea hmun khat bawk, chu inkhina chu homer dungzui pei a ni ding a nih.

¹²Shekel[49] chu gera sâwmhni nîng a ta; chun, in mina chu shekel sâwmruk nîng a tih.

¹³“Hi hi thilinhlân in inhlân dinghai chu nîng a tih; bupui homer[50] khata chun epha hmun ruka ṭhea hmun khat; buṭei homer khata chun epha hmun ruka ṭhea a hmun khat pêng in ta;

¹⁴chun, hriek chan ruot thua chun, kor tinah bath hmun sâwma ṭhea hmun khat nîng a tih; chu chu bath sâwm tluk a na, homer khat a nih.

¹⁵chun, berâm ruol za hni peiah berâm pakhat, Israel ram hlopetna hmun ṭhataka inthawkin, bu thilinhlâna ding le, pumrawhmang thilinhlâna ding le, inremna thilinhlâna dinga an ta dinga intlanna siempêk dingin pêk nîng a tih, Lalpa PATHIEN chun a tih.

¹⁶Rama mipuihai po po chun hi thilinhlân ang hi Israel rama lal ta ding chun an pêk ding a nih.

¹⁷Chun, ruoiṭhenahaia le, thla tharhaia le, châwlnihaia le, Israel sûngkuo ruoiṭhena hunbi neihaia chun, pumrawhmang thilinhlânhai, bu thilinhlânhai, dâwnmi thilinhlânhai inhlân chu lal chan chu ni ve thung a tih; Israel sûngkuo ta dinga intlanna siemna dingin, suol thilinhlânhai, bu thilinhlânhai, pumrawhmang thilinhlânhai, inremna thilinhlânhai chu a buotsai ding a nih.

¹⁸“Lalpa PATHIEN chun hieng hin a tih: Thla hmasatak,[51] chu thla ni khat ni chun, bâwngchal tuoi demkâilo lâng i ta; hmun inthieng chu sukthieng i tih;

¹⁹thiempu chun suol thilinhlâna thisen chu lâng a ta, chu in kawtkhâr bienghaia le, maichâm rei kil lia le, huon sûng tuollai sûngril lem dâi kawtkhâr biengahai chun nâl a ta.

²⁰Chuongchun, chu thla ni sari ni chun mi thil lo suksuol ta tinhai ta ding le, mi lo thawpalhai ta dingin thâwng i ta; chuongchun, in ta ding chun intlanna chu siem in tih.

²¹Thla hmasatak, chu thla ni sâwm pali ni chun, fekân ruoiṭhe chu nei in tih, ni sari sûng ruoiṭhe chu; chun, chawl ṭhanglo bei chu fâk nîng a tih.

²²Chu ni chun lal chun ama ta ding le, chu rama mipuihai ta ding chun suol thilinhlâna dingin bâwngchal buotsai a tih.

²³Chun, ruoiṭhe ni sari sûnga ding chun LALPA kuoma pumrawhmang thilinhlâna dingin bâwngchal pasari le berâmchal pasari, demkailo, ni sari sûnga ni tina pakhat pei; chun, kêlchal ni tina pakhat pei, suol thilinhlâna dingin buotsai bawk a tih.

²⁴Chun, bu thilinhlân, bâwngchal pakhatah epha khat, berâmchal pakhatah epha khat, ephaa chun hriek hin khat pei leh buotsai bawk a tih.

²⁵Thla sarinaa chun, chu thla ni sâwmpangana chun, ruoiṭhenaa ni sari sûng chu angkhat vawngin thâwng a tih; suol thil inhlân ang pei le, pumrawhmang thilinhlân ang pei le, bu thilinhlân ang pei le, hriek thilinhlân ang peiin.