Read Hmar EZEKIEL 46 Bible Online

EZEKIEL 46 - Hmar bible

EZEKIEL 46

¹“Lalpa PATHIEN chun hieng hin a tih: huon sûng tuollai sûngril lem dâi kawtkhâr saktieng sawng saw ni ruk sinthaw sûng po inkhâr a ta; amiruokchu, châwlni chun inhawng a ta, thla thar nia khawm chun inhawng bawk a tih.

²Dâi kawtkhâr tuolpûk lampuia chun lal chu lût a ta; dâi kawtkhâr bieng sîra chun ngîr a ta, chun, thiempu chun a pumrawhmang thilinhlân ding le, a inremna thilinhlân dinghai chu buotsai a ta; dâi kawtkhâr tuolpûka chun chibai bûk a ta; chun, fe suok nâwk a ta, amiruokchu, zântieng chen chun dâi kawtkhâr chu khâr ni naw nih.

³Chun, châwlnihaia le thla tharhaia chun chu ram mipuihai chun LALPA hmaah dâi kawtkhâr lûtnaa chun chibai bûk an tih.

⁴Chun, pumrawhmang thilinhlân lalin LALPA kuoma ân hlân ding chu châwlnia ding chu berâmte paruk demkailo, berâmchal demkailo pakhat leh nîng a ta,

⁵chun, bu thilinhlâna ding chun berâmchal pakhatah epha khat; chun, berâmtehai pakhatah bu thilinhlân ding chu a pêk thei ang ang nîng a ta, chun, epha peia hriek hin khat leh.

⁶Chun, thla thar nia ding bâwng- chal tuoi demkailo pakhat nîng a ta; berâmte paruk le berâmchal leh; an rêngin demkailo an ni ding a nih;

⁷bu thilinhlân ding chu buotsai a ta, bâwngchal ding chun epha khat, berâmchal ding chun epha khat bawk; chun, berâmtehai ta ding chun ân hlân thei ang tâwk tâwk nîng a ta; chun, ephaa chun hriek hin khat a ṭhang pei ding a nih.

⁸Chun, lal chu a va lût pha chun dâi kawtkhâr tuolpûk lampuia khan a fe ding a na; chutaka bawk chun a suok nâwk ding a nih.

⁹“Nisienlakhawm, chu rama mihai ruoiṭhe hunbi neia LALPA hmaa an hung chun chibai bûk dinga hmârtieng dâi kawtkhâr lampuia lût chu simtieng dâi kawtkhâr lampuia khan a suok ding a nih; chun, simtieng dâi kawtkhâr lampuia lût chu hmârtieng dâi kawtkhâr lampuia khan a suok ding a nih; a hung lûtna dâi kawtkhâr lampuia ma khan a kîr nâwk ding a ni naw a, amiruokchu, a hmaa khan a fe thleng nghâl lem ding a nih.

¹⁰An lût pha chun, lal chu anni le chun a lût ding a na, chun, an suok pha khawma, anni ruolin a suok ding a nih.

¹¹Ruoiṭhenahaia le, ruoiṭhe hun- bi neihaia chun bu thilinhlân chu bâwngchal pakhatah epha khat nîng a ta, berâmchal dingin epha khat bawk, chun, berâmtehai ta ding chun a pêk thei zât zât le, epha khata chun hriek hin khat pei leh.

¹²Chun, lal chun mâni nuomthua thilinhlân, pumrawhmang thilinhlân amanih, inremna thilinhlân amanih, mâni nuomthua LALPA kuoma thilinhlân anga a buotsai pha chun, saktieng pang ngha dâi kawtkhâr chu mi pakhatin hawngpêk a ta; a pumrawhmang thilinhlân le, a inremna thilinhlânhai chu châwlnihaia thaw ang bawk khan buotsai a tih; chun, suok a ta, a suok hnung chun mi pakhatin dâi kawtkhâr chu khâr a tih.

¹³Ni tin LALPA ta dingin pumrawhmang thilinhlâna dingin berâmte kum khat mi demkailo buotsai i ta; zîngkâr tina dingin i buotsai ding a nih.

¹⁴Chun, zîng tin tin chun chu le chun bu thilinhlân khawm buotsai i ta, epha hmun ruka ṭhea hmun khat le, hriek hin hmun thuma ṭhea hmun khat, chu beiphit inditak chu suktlawr dingin; chun, dân um zing angin, LALPA kuoma bu thilinhlân chu a ni zing zing ding a nih.

¹⁵Chuong ang chun berâmte chu buotsai an ta, bu thilinhlân le, hriek leh, zîng tin tina pumrawhmang thilinhlân zing zing ni ding chun.

¹⁶“Lalpa PATHIEN chun hieng hin a tih: Lalin a naupasal a tu kuoma khawm thilpêk pe ta ang sienla, ama rochan a na, a naupasalhai ta chu a ni hrim ding a nih; rohluo tieng kawnga an thil chan chu a nih.

¹⁷Amiruokchu, a suok pakhat kuoma chun a rochan chu thilpêk anga a pêk chun; ama chu insuo a ni kum chen chun a ta nîng a ta; chu zoa chun lal kuoma ma chun inkîr nâwk nîng a tih; ama rochan hrim kha chu a naupasalhai ta ding nîng a tih.

¹⁸Chu nawa khawm chun, lal chun an thil neihaia anni nêksâwr dingin mihai rochan chu a lâkpêk ding a ni naw a; an in le loa inthawk a hnawt suok ding a ni nawh, ama thil neia inthawk ngeiin a naupasalhai chu rochan a pêk lem ding a na, chuongchun, ka mihai chu mâni thil neia inthawka mi tin chu an indar nawna dingin,” tiin.

¹⁹Chun, dâi kawtkhâr sîra um lûtna chu a mi fethlengpui a, thiempuhai pindan inthieng sim sawnghaia chun a mi ṭhuoi ta a; chun, ngai ta, a saktieng pang hnungtienga chun hmun hi a um a.

²⁰Chun, ka kuoma chun, “Hi hi a nih thiempu haiin bawsietna thilinhlân chu an suongna ding le, suol thilinhlân an suongna ding hmun chu; bu thilinhlân khawm hitaka hin em bawk an tih; chuongchun, mipui chu inhlânthieng dingin biekbuk tuolzawl a puo lema chun an hung ṭhuoi suok ding a ni nawh,” a ta.

²¹Chun, huon sûng tuollai puo lema chun a mi ṭhuoi a, chuongchun, huon kil lia chun a mîn fethlengtir a; chun, ngai ta, chu huon ki tina chun tuollai hi a um a.

²²Huon sûng tuollai kihai pali chun tuollai inhuonkhum, tawng sâwmlia sei, tawng sâwmthuma lien hi a um a; hieng a kihai pali hi intiet seng an nih.

²³An sûnga hmun li sûnga a vêl el chun lung an rem tlar a, chun, a vêl el chun chu tlarhai hnuoia chun suongna thukhai siem a na.

²⁴Chun, ama chun ka kuomah, “Hieng hi thil suongna in, hi in rawngbâwltuhaiin mihai inthâwinahai an suongna ding chu a nih,” a ti a.