Read Hmar EZEKIEL 47 Bible Online

EZEKIEL 47 - Hmar bible

EZEKIEL 47

¹Chun, in kawtkhâra chun a mi ṭhuoi kîr nâwk a; chun, ngai ta, in tuolpûk saktieng panga chun tui hi a suok a, (chu in hmai chu saktieng ngha a ni si a); chun, tui chu a hnuoia inthawk chun, in changtieng pangah, maichâm simtieng panga inthawk chun a hung luong thla a.

²Chun, hmârtienga dâi kawtkhâr lampuia chun a mi ṭhuoi suok ta a; dâi kawtkhâr saktieng ngha lampuiah, dâi kawtkhâr puo lem lampuia chun a mi ṭhuoi vêl a; chun, ngai ta, chu changtieng panga chun tui chu a hung luong suok a.

³Mi a kuta thil tluon chawia saktienga fe peia inkhiin, tawng sâng khat ân khi a, kemit chen tlum tui chu a mîn fekaitir a.

⁴Chun, tawng sâng ân khi nâwk a, tui khûp tlumah, tui chu a mîn fekaitir nâwk a. Chun, sâng ma ân khi nâwk a, tui kâwng tlumah, tui chu a mîn fekaitir nâwk a.

⁵Chu hnunga chun sâng ân khi nâwk a, vadungpui a hung ni ta a, ka fethleng thei ta naw a; tui chu a hung insâng a, vadungpui kai theilo hiel, inhlieuna khawp a hung ni ta a.

⁶Chun, ama chun ka kuomah, “Mihriem naupa, hi hi i hmu am?” a ti a. Chun, a mi ṭhuoi a, vadungpui kamah a mîn kîrtir nâwk ta a.

⁷Chun, chuonga ka kîr lai chun, ngai ta, vadungpui kama chun hi tieng sîr le khing tieng sîra khawm chun thing tamtak an um a.

⁸Chun, ama chun ka kuomah, “Hieng tuihai hi saktieng rama inthawka hung suok an na, Arabaa chun fe thlâng an ta; chun, tuipui tieng fe pei an ta, tuipui tui al chu tui inthiengah inchangtir an tih.

⁹Chun, thilhring tinrêng vadungpuihai fena tieng tienga hung inkhâwmhai chu hring an tih; chun, nga tamtak el hung um an ta; chuongchun, vadungpui luongna phawta tuipui tuihai ân thiengna ding le thil tinrênghai an hring theina dinga hung luong an nih.

¹⁰Chun, nga mantuhai chu a sîra chun ngîr an ta, En-gedia inthawka En-eglaim chenin lênhai dêngna hmun a ni ding a nih; an ngahai chu chi tum tum, tuipui lientak ngahai angin a tama tam nîng an tih.

¹¹Amiruokchu, chutaka dûm hmunhai le dieldâwk hmunhai chu sukthieng ni naw ni hai a, chi dinga mâksan ni lem an tih.

¹²Chun, vadungpui pang sîra chun hi tienga le khingtieng sîra khawm bua ring dingin thinghai ṭo an ta; an hna vuoi ngai naw ni a; an ra khawm hrût ngai bawk naw nih; thla kipin ra thar hung insuong an ta, an ta dingin tuihai hmun inthienga inthawka a hung luong zing leiin; an rahai chu bua ring ding nîng a ta, an hnahai chu sukdamna ding nîng an tih,” a ta.

¹³Lalpa PATHIEN chun hieng hin a tih: “Israel hnam sâwmpahni ang peia rochan dinga ram chu i semna ding, ramri chu hi hi nîng a tih: Josef khawma chan hni a nei ding a nih.

¹⁴Chun, hluong in ta, inang sengin; chu dinga in thlatuhai kuoma pe dinga ka bân ka lo phar tah, hi ram hi in ta dinga rochan dingin a tlu ding a nih.

¹⁵Hi hi hmârtienga ramri chu nîng a tih; tuipui liena inthawka Hethlon lampui zuiin, Zedad lûtna chenin;

¹⁶Hamath le, Berotha dâm, Sibraim dâm, chu chu Damaska ramri le Hamath ramri inkâra chun a um a; Hazer-hattikon chu Hauran ramri sîra chun a um bawk a.

¹⁷Chun, tuipuia inthawka ramri chu Damaska ramria Hazarenon[52] ramri kha ning a ta; chun hmârtieng chun hmâr khâw zâwngin Hemath ramri chu a um. Hi hi hmârtieng pang a nih.

¹⁸Saktieng panga chun, Hauran le Damaska le Gilead le Israel ram inkâra chun, Jordan chu um a ta; hmârtieng ramria inthawk chun saktieng tuipui chen chu inkhi ding a nih. Hi hi saktieng chu nîng a tih.

¹⁹Chun, simtienga sim khâw zâwnga chun, Tamara inthawka Meriboth-kades tuihai chen le, Aigupta vadungtê hrawin, tuipui lienah. Hi hi sim tienga, sim khâw zâwng chu a nih.

²⁰Thlangtienga chun tuipui lien nîng a ta, simtieng ramria inthawka Hamath hang lûtna ep chen khan. Hi hi thlangtieng pang chu nîng a tih.

²¹Chuongchun, ram chu Israel hnam ang peiin nangni lai chun insem in tih.

²²Chun, in ta dinga rochan ding le, nangni laia mikhuol pêm um vehai nau le tê nei tahai ta ding chun ṭhum vâwrin sem in ta; Israel thlahai laia chun anni chu a ram mi ang bawk nîng an tih; Israel hnamhai lai chun nangni leh rochan chu an chang ve ding a nih.

²³Chun, chu pêm chu a tu hnama khawm lo mikhuol sien, chu hnama chun ama chu a rochan chu pêk nîng a tih, Lalpa PATHIEN chun a tih.