Read Hmar EZEKIEL 48 Bible Online

EZEKIEL 48 - Hmar bible

EZEKIEL 48

¹Chun, hienghai hi hnamhai hminghai chu an nih: hmâr tâwpa inthawka, Hethlon lampui sîr peiah, Hamath lûtna, Hamath sîr hmârtienga, Damaska ramri Hazarenon[53] lûtna chenin; an sîrhai chu saktieng le thlangtienga chun nei an ta; Dan chu, chan khat a nih.

²Dan ramri sîra chun, saktieng panga inthawka thlangtieng pang; Aser, chan khat bawk.

³Aser ramria, saktieng panga inthawka thlangtieng pang chen; Naphtali, chan khat.

⁴Naphtali ramria chun, saktieng panga inthawka thlangtieng pang chen chu, Manasse, chan khat.

⁵Manasse ramria chun, saktieng panga inthawka thlangtieng pang chen chu; Ephraim, chan khat.

⁶Ephraim ramria chun, saktieng panga inthawka thlangtieng pang chen chun; Reuben, chan khat.

⁷Reuben ramria chun, saktienga inthawka thlangtieng chena chun; Juda, chan khat.

⁸Chun, Juda ramria chun, saktieng panga inthawka thlangtieng pang chen chu, ram thilinhlân in inhlân ding chu nîng a ta, a khang tieng tawng sîng hni sâng nga, a dung tienga chun, saktienga inthawka thlangtieng chena chan khat ang kha nîng a ta; chun, biekin chu a laia chun um a tih.

⁹Chun, ram thilinhlân LALPA kuoma in inhlân ding chu tawng sîng hni sâng ngaa sei, a khang tieng sîng khat nîng a ta.

¹⁰Chun, hi hi ding hin, thiempuhai ta ding ngei chun, thilinhlân inthieng chu a um ding a nih; hmârtienga chun a dung tieng tawng sîng hni sâng nga, thlangtienga chun a khang tieng sîng khat, chun, simtienga chun, a dung tieng sîng hni sâng nga, chun LALPA biekin chu chu lailung laia chun a um ding a nih.

¹¹Thiempu Zadok naupasalhai hlânthienga um, ka rawngbâwltuhai ta ding chun a ni ding a nih; Levi mihai an invâk hmang a, Israel thlahai an invâk hmang lai khawma invâk hmang ve lohai chu.

¹²Chun, an ta ding chun ram thilinhlân laia thilinhlân, ân thieng tak, Levi mihai ramria chun a ni ding a nih.

¹³Chun, thiempuhai ramri zûl peiah, Levi mihai chun a dung tieng sîng hni sâng nga, a khang tieng sâng khat an nei ding a nih; a dung tieng hrim hrim chu sîng hni sâng nga ni vawng a ta, a khang tieng chu sîng khat.

¹⁴An zawr ding a ni naw a, inthleng khawm inthleng bawk naw ni hai; chu ram ra hmasatakhai khawm chu mi dang chana siem ding a ni nawh; LALPA chanpuol a ni si a.

¹⁵Chun, sîng hni sâng nga hmaa, a khang tieng sâng nga mâksana la um chu, hmang narâna ding nîng a ta, khawpui ding le chêngna ding le, khawpui khawhnâwma dingin; chun, khawpui sûng chu, chu laia chun a um ding a nih.

¹⁶Chu lienzie chu hi hi nîng a tih; a hmârtieng pangah tawng sâng li za nga, simtieng panga chun sâng li za nga bawk, saktieng panga chun sâng li za nga, thlangtieng panga chun sang li za nga bawk nîng a tih.

¹⁷Khawpui chun khawperhai nei a ta; hmârtienga chun tawng za hni sâwmnga, simtienga chun za hni sâwmnga bawk; saktienga chun za hni sâwmnga, thlangtienga chun za hni sâwmnga bawk nei a tih.

¹⁸Chun, a dung tieng a la mahla, ram thilinhlân chen chie la um chu, saktienga chun sîng khat nîng a ta, thlangtienga khawm chun sîng khat bawk nîng a tih; ram thilinhlân zui peiah a ni ding a nih; chutaka rasuok chu khawpuia sinthawtuhai fâk ding nîng a tih.

¹⁹Chun, Israel hnamhai po po laia khawpuia sin thaw mihai chun inlet an tih.

²⁰Ram thilinhlâna siem po po chu sîng hni sâng nga le sîng hni sâng nga bawk inep nîng a tih; chun, thilinhlân inthieng chu a sîr li inangin, khawpui iṭhut sûng ding chun în hlân ding a nih.

²¹Chun, a la mahla chu lal ta ding nîng a ta, ram thilinhlân inthieng sîr hi tieng le khing tiengah, khawpui sûng ṭhut, thilinhlân saktieng sîra, tawng sîng hni sâng nga hma kha; chun, thlangtieng panga ramria chun, thlangtienga chun sîng hni sâng nga hma bawk kha, chanhai zui pei kha lal ta ding nîng a tih; chun, ram thilinhlân inthieng le in hmun inthieng chu, chu laia chun a um ding a nih.

²²Chu nawa khawm chun, Levi mihai chana inthawk khan khawpui iṭhutnaa inthawk le khan, chu chu lailia chun lal chan chu a um a, Juda ramri le Benjamin ramri inkâra chun, chu chu lal ta ding nîng a tih.

²³Chun, hnam danghai chungthua chun, saktieng panga inthawka thlangtieng pang chen, Benjamin, chan khat.

²⁴Benjamin ramria, saktienga inthawka thlangtieng pang chenah, Simeon, chan khat.

²⁵Simeon ramria, saktieng panga inthawka thlangtieng pang chenah, Issakar, chan khat.

²⁶Issakar ramria, saktienga inthawka thlangtieng pang chenah, Zebulun, chan khat.

²⁷Zebulun ramria, saktieng panga inthawka thlangtieng pang chenah, Gad chan khat.

²⁸Gad ramriah, sim khâw zâwnga simtiengah, a ramri chu Tamar-a inthawka Meribath-kades tuihai chen, Aigupta vadungtê chen, tuisuoriet lien[54] chen chun nîng a tih.

²⁹Hi hi Israel hnamhai kuoma aisâna rochan dinga i sem ding ram a nih; chun, hienghai hi an hmun hran hran tamtakhai chu a nih; Lalpa PATHIEN chun a tih.

³⁰Chun, hienghai hi khawpuia inthawka suoknahai chu an nih; hmâr tieng panga chun, inkhia tawng sâng li za nga a na;

³¹chun, khawpui dâi kawtkhâr chu Israel hnamhai hming ang pei nîng a ta, hmârtieng panga chun dâi kawtkhâr pathum: Reuben dâi kawtkhâr, pakhat; Juda dâi kawtkhâr, pakhat; Levi dâi kawtkhâr pakhat;

³²chun, saktieng panga khawm chun tawng sâng li za nga bawk nîng a ta, chun, dâi kawtkhâr pathum; Josef dâi kawtkhâr, pakhat; Benjamin dâi kawtkhâr, pakhat; Dan dâi kawtkhâr, pakhat;

³³simtieng panga chun inkhia tawng sâng li za nga nîng a ta; dâi kawtkhâr pathum: Simeon dâi kawtkhâr, pakhat; Issakar dâi kawtkhâr, pakhat; Zebulun dâi kawtkhâr, pakhat;

³⁴thlangtieng panga chun tawng sâng li za nga bawk nîng a ta, dâi kawtkhâr pathum leh; Gad dâi kawtkhâr, pakhat, Aser dâi kawtkhâr, pakhat; Naphtali dâi kawtkhâr, pakhat.

³⁵A vêl chun tawng sîng khat sâng riet nîng a ta; chu khawpui hming chu chu nia inthawk chun, “Jehova Samma[55] nîng a tih,” tiin.