Read Hmar EZEKIEL 6 Bible Online

EZEKIEL 6 - Hmar bible

EZEKIEL 6

¹LALPA thu chu ka kuomah a hung tlung a,

²“Mihriem naupa, Israel tlâng tiengahai sawn ngha la, an kuomah thu hril la,

³‘Nangni Israel tlânghai, Lalpa PATHIEN thu chu lo ngai ta u, Lalpa PATHIEN chun tlânghai le muolhai le, tui luongnahai le, phairuomhai kuoma chun hieng ang hin a tih; Ngai ta u, keiin, keima ngeiin, in chungah kâwlhnâm intlungtir ka ta, in bâwlhmunhai sukse vawng ka tih.

⁴In maichâmhai chu râusan hung nîng an ta, in nisa milimhai khawm chu suktliek nîng a ta, in mi thathai chu in milimhai hmaa chun hung pei thlâng ka tih.

⁵Chun, Israel thlahai thiruonghai chu an milimhai hmaa chun sieng ka ta; in ruhai chu in maichâmhai vêla chun the dar ka tih.

⁶In chêngna hmunhaia po po chun khawpuihai chu suksiet nîng an ta, bâwlhmunhai chu râusan nîng an ta; in maichâmhai chu râusan le suksiet a ni theina ding le in milimhai chu suktliek le suktâwp a nia, in nisa milimhai chu phûr thlûk a na, in sinthawhai chu suktâwp a ni theina dingin.

⁷Chun, thata umhai chu nangni lai ngei tlûng an ta, chun, LALPA ka ni mi hre tâng in tih.

⁸Amiruokchu, ṭhenkhat la hlâng ka ta, ramhaia sukdara in um pha chun, hnamhai laia chun ṭhenkhat chun kâwlhnâm chu pumpel in tih.

⁹Chun, nangni laia chuonga suokhai chun, hnamhai sala ṭhuoia an umnahaiah chun mi hre zing an ta, an lungril uire châkna keimaa inthawka ṭhea um ta le, an mithai an milimhai châktaka an enna chun an mi suknatzie hai chu; Chuongchun, an tirdakumna po poa an lo thaw tah, thil ṭhanaw hai lei chun an mithmu ngeia chun intirdak an tih.

¹⁰Chun, LALPA ka ni ti hrieng an ta; an kuomah hieng thil ṭha naw hi ka thaw ding a nih ka ti hi a mei meia hril ka ni nawh ti hre bawk an tih,’ ” tiin.

¹¹Lalpa PATHIEN chun hieng hin a tih, “I kut ben la, i kein sir la, chun, Ehei! Israel sûngkaw tirdakumna suol po po lei chun, kâwlhnâma le, ṭâmnaa le hripuiah an tlu ding a ni si a, ti rawh.

¹²Hlataka umhai chu hripuiin thîng an ta; a hnaia umhai chu kâwlhnâmah tlûng an ta, chun, umhmuna uma inhuol khuma um chu ṭâmin thîng a tih: chuong ang chun ka lungsenna chu an chunga chun ka sukpuitling ding a nih.

¹³Chun, an mi thathai chu an maichâm vêla an milimhai laia a um a, muol insâng tina dâm, tlâng sâng sîp tinahai dâm, thing hring tin hnuoiahai dâm, thingsaisuo lien hnuoi tinahai dâm, an milimhai kuoma riminhnik an inhlânnahai po poa chun an um pha chun LALPA ka ni ti mi hre tâng an tih.

¹⁴Chun, an chunga chun ka kut chu inlet ka ta, thlalêra inthawka Dibla tieng, an hluona sûng po po chu, ram chu râusana siemin suksieng ka tih; chun, LALPA chu ka ni ti mi hre tâng an tih,” tiin.