Read Hmar EZEKIEL 8 Bible Online

EZEKIEL 8 - Hmar bible

EZEKIEL 8

¹Chun, kum ruknaa thla ruknaa, chu thla ni nga ni chun, ka ina chun ka ṭhung a, ka hmaa chun Juda upahai an ṭhung laiin, Lalpa PATHIEN kut chu chutaka chun ka chunga chun a um ta a.

²Chun, ka en a, mei[8] inlang anga inlang hi ka hmu a; a kâwng le hnuoitieng inlang dân chu mei a na, a kâwng le a chungtieng inlang dân chu var ang, ṭhihna zie ang a na.

³Chun, kut ang tak hi a hang ban suok a, ka samtawma chun a mi man a, chuongchun, thlarau chun vân le hnuoi kâra chun a mi dawm kâng a, Pathien thil hmulâwknahai chun Jerusalemah, tuolsûng sûngril lem dâi kawtkhâr hmâr tieng sawnga chun a mi ṭhuoi ta a; chutaka chun îtthîkna milim, îtthîk dinga chawktho hlaktu ṭhungpha chu a um a.

⁴Chun, ngai ta, chutaka chun phaia ka hmu ta ang tak khan, Israel Pathien ropuina chu a um a.

⁵Chun, ama chun ka kuomah, “Mihriem naupa, i mit khan hmâr tieng hang en rawh,” a mi ti a. Chuongchun, hmâr tieng ka mit chun ka hei en a, maichâm kawtkhâr hmâr tieng panga chun a lûtnaah îtthîkna milim chu ka hmu a.

⁶Chun, ama chun ka kuomah, “Mihriem naupa, an ithaw saw i hmu am? Hitaka hin Israel sûngkuo chun tirdakumna nasatak el an lo thaw ta a, ka hmun inthienga inthawka hlataka ka fe hmang hielna dingin; amiruokchu, tirdakumna nasa nâwk zuol chu i la hmu ding a nih,” a ti a.

⁷Chun, tuolsûng tuollai kawtkhâra chun a mi ṭhuoi a; chun, ka hei en chun, banga chun âwng ka hmu ta a.

⁸Chun, ama chun ka kuomah, “Mihriem naupa, tuhin bang kha hang ker rawh,” a ta. Chun, bang ka hei ker chun, kawtkhâr ka hmu a.

⁹Chun, ka kuoma chun, “Va lût la, hitaka tirdakumna suol an thaw chu va en rawh,” a ta.

¹⁰Chuongchun, ka va lût a, ka va en a, ngai ta, thilhring bawka invâk chi tinrênghai, ramsa tirdakumhai le, Israel sûngkuo milimhai po po chu bang chunga chun a vêla limziekin ka hmu a.

¹¹An hmaa chun Israel sûngkuoa upahai sâwmsari an ngîr a, anni laia chun Saphan naupa Jaazania chu a ngîr a, mi tin chun an kutah riminhnik râwna thlêng an chawi seng a; chuongchun, riminhnik khu rim chu a hang fe a.

¹²Chun, ama chun ka kuomah, “Mihriem naupa, mi tin mâni milim pindan chitah, Israel sûngkaw upahai chun inthim hnuoia chun ieng am an thaw a, i hmu am? Anni chun, ‘LALPA chun a mi hmu nawh, LALPA chun hnuoi hi a nghatsan tah,’ an ti a,” tiin.

¹³Chun, ka kuoma chun, “Tirdakumna an thaw nasatak dang khawm la hmûng i tih,” a ti bawk a.

¹⁴Chun, LALPA in dâi kawtkhâr hmârtienga uma chun a mi ṭhuoi a; chun, ngai ta, chutaka chun nuhmeihai chu Tammuz ṭain an lo ṭhung a.

¹⁵Chun, ama chun ka kuomah, “Aw mihriem naupa, hi hi i hmu am? Hieng nêka tirdakumna nasa lem la hmu nâwk i tih,” a ta.

¹⁶Chun, LALPA in tuollai sûngril lema chun a mi ṭhuoi ta a, chun, ngai ta, LALPA biekin kawtkhâr, maichâm le a tuolpûk inkâra chun mi sâwmhni panga, LALPA biekin chu an hnungtieng innghata, an hmaihai chu khawsak tieng nghain an um a; saktienga nisa chu chibai an bûk a.

¹⁷Chun, ama chun ka kuomah, “Aw mihriem naupa, hi hi i hmu am? Tirdakumna hitaka an lo thaw ta hi, Juda sûngkaw ta ding chun thil chîn tham am a nih? Ram chu inpâwngnêknain an suksip a, lunginsen dingin an mi chawktho nâwk a, en ta, an hnârah sâwlhna an sie a.

¹⁸Chuleiin, kei khawma lunginsenin thaw vêng ka ta, ka mitin anni chu hla naw ni a, lunginsietna nei bawk naw ning; ka naa chun râwl inringtakin hung khêk hai sien khawm, anni chu lo ngai naw ning,” tiin.