Read Hmar DANIEL 8 Bible Online

DANIEL 8 - Hmar bible

DANIEL 8

¹Lal Belsazzar rorêl a kum thumnaa chun thil hmulâwkhai, a hmaa ka kuoma hung inlang hnunga khan, ka kuomah, kei Daniel kuoma ngei a hung inlang a.

²Chun, thil hmulâwka chun ka hmu a; Hieng ang hi a lo ni a, thilhmulâwk ka hmu lai chun, Elam rama lal in, Susaa chun ka lo um a; thil hmulâwka chun ka hmu a; Ulai vadung kâwlah ka lo um a.

³Chun, ka mit ka hang meng a, ngai ta, vadung kâwla chun berâmchal ki pahni nei a ngîr ka hmu a; chu kihai pahni chu ân sâng hle a; amiruokchu, a ki pakhat chu a dang nêk chun ân sâng lem a; ân sâng lem chu a hung suok nuhnung lem chu a na.

⁴Berâmchal chu thlangtieng le, hmârtieng le, simtieng chu panin ka hmu a; a hmaa hrim hrim chun ramsa dang ngîr thei an um naw a, a kuta inthawka la dawk thei hrim hrim khawm tukhawm an um naw a; chuongchun, a nuom ang angin a thaw a, ama le ama chu ân chawimawi ta a.

⁵Chun, ka ngaituo lai chun, ngai ta, hnuoi chung po po dâpin thlangtienga inthawkin kêlchal a hung a, hnuoi hrim hrim a tâwk naw a; chun, kêl chun a mithai inkâra chun ki maktak el a nei a.

⁶Chun, berâmchal ki pahni nei, vadung kâwla ngîr ka hmu kuoma chun a hung a; chuongchun, a theipatâwpin ama chu a baw ta a.

⁷Chun, berâmchal hnaia hung chu ka hmu a, a chunga chun lunginsentakin a châng a; berâmchal chu a sik a, a kihai pahni chu a suktliek ta a; ama hmaa ngîr dingin berâmchala chun thilthawtheina hrim a um naw a; chuleiin, hnuoi chungah a tethlûk a, ama chu sirdein a chîl a; chuongchun, ama kuta inthawka berâmchal sansuok thei hrim hrim chu an um naw a.

⁸Chun, kêlchal chu ama le ama nasatakin ân chawimawi a, a hrât hle lai chun a ki ropuitak chu a tliek ta a; a aia chun vân thli palihai tienga chun ki maktak pali a hung suok a.

⁹Anni laia pakhata inthawk chun ki chitê a hung suok a, chu chu simtieng le, saktieng le ram ropui tieng chun ropuitakin a hung um ta a.

¹⁰Chun, vân mipuihai laia khawm chun a hung ropui hle a; chuongchun, pâwl ṭhenkhat le arasi ṭhenkhat chu hnuoiah a pei thlâk a, anni a sirde ta a.

¹¹Anih, mipuihai lal kuoma ngei khawm chun ama le ama chu ân chawimawi a; pumrawhmanga inthawina zing zinghai chu amaa inthawkin a lâk hmang a; a Hmun Inthiengtak chu a pei thlâkpêk a.

¹²Chun, bawsietna leia pumrawhmanga inthâwina inhlân zing zingna le chun mipuihai chu a kuoma pêk a ni ta a. Thudik chu hnuoiah a peithlâk a, a nuom nuom a thaw a, a hlawtling bawk a.

¹³Chun, mi inthieng pakhat thuhril ka hriet a; chun, mi inthieng dangin tu amanih thuhriltu kuoma chun, “Mipuihai le Hmun Inthiengtak sirdea um ve ve dinga pêk ding le, sukrêmtu bawsietna le, pumrawhmang thilinhlân zing zing chungthua thil hmulâwk hi ieng chen am nîng a ta?” a ta.

¹⁴Chun, ka kuoma chun, “Zântienghai le zîngtienghai sâng hni za thum chen nîng a tih; chun, Hmun Inthiengtak chu sukthieng nîng a tih,” a ta.

¹⁵Chun, kei Daniel ngei hin, hre dinga ka izawng thilhmulâwk chu ka hmu ta a; chun, ngai ta, ka hmaa chun mihriem hmêlput hi a hung ngîr a.

¹⁶Chun, mihriem râwl hi Ulai vapanghai inkâra chun ka hriet a, chu râwl chu a khêk a, “Gabriel, hi mipa hi thil hmulâwk kha inhriettir rawh,” a ta.

¹⁷Chuongchun, ka ngîrna hmun kâwla chun a hung hnai a; chun, a hung hnai chun ka ṭi a, ka bawkkhup ta a; nisienlakhawm, ka kuoma chun, “Aw mihriem naupa, thil hmulâwkhai chu hun tâwpa ding a nih ti hi hre rawh,” a ta.

¹⁸Ka kuoma thu a hril lai chun ka hmai chu hnuoi tieng innghatin inhniktakin ka in a; nisienlakhawm, a mi them a, a mîn tungtho ta a.

¹⁹Ama chun, “Ngai ta, lunginsenna hun tâwp tieng hun nuhnunga thil um ding chu inhriettir ka ti che, a tâwpna hunbi ruota ṭhang ding chu a ni si a.

²⁰Berâmchal ki pahni nei i hmu kha Media le Persia lalhai an na.

²¹Kêlchal nunsetak kha Grik ram lal a nih; chun, a mithai kâra ki ropuitak kha lal hmasatak chu a nih.

²²Chun, a tliek a, a hmuna pali hung suok kha, chu hnama inthawk chun lal pali hung ngîrsuok an ta; nisienlakhawm, a thilthawtheina le chu ni naw ni.

²³Chun, an ram hun nuhnung tienga, bawsetuhai an hung puitling pha chun lal hmêl ṭiumtak, thu khir- tak takhai hre thei hung ngîrsuok a ta.

²⁴A thilthawtheina chu hrâttak nîng a ta, nisienlakhawm, ama thilthawtheina hran ngat chu ni naw ni; râpthlâktakin suksieng a ta, hlawtling a ta, a nuom nuom thaw bawk a tih; mi inthienghai le mi hrâttakhai chu sukse bawk a tih.

²⁵A remruot dân hmangin a kuta chun vervêkna chu inhlawtlingtir a ta; a lungrila chun ama le ama chu inchawimawi a tih; chun, an inring naw kârin mi tamtak chu suksieng a ta, lalhai lal chungah ngîrsuok bawk a ta, nisienlakhawm, kut lova suksiet nîng a tih.

²⁶Chun, zântienghai le zîngtienghai thilhmulâwka thil hril chu ân dik a nih; nisienlakhawm, thil hmulâwk chu la khâr hri phawt rawh; ni la hung tlung ding tamtakhai ta ding chu a ni si a,” a ta.

²⁷Chun, kei Daniel chu ka châu a, ni iengzât amani chu ka damnaw a; chun, ka tho a, lal sin chu ka thaw ta a: nisienlakhawm, thilhmulâwka chun mak ka ti êm êm a, tukhawma an hriet thiem si naw a.