Read Hmar HOSEA 12 Bible Online

HOSEA 12 - Hmar bible

HOSEA 12

¹Ephraim chun thli a ring a, Khaw sakthli chu a zui hlak a; Khêl thu le inṭhedarna thu a sukpung tiel tiel a, Assuria leh thu an thlung a, Aigupta tieng chun hriek a phur lût a.

²LALPA chun Juda chunga khawm hêkna ding a nei bawk a, Jakob chu a um dân angzie peiin hrem a tih; A thilthaw angzie peia thungin.

³Sula khawm khan a unaupa chu a kekhawngah a hung man a, A hung puitling khan Pathien chu ân beipui a,

⁴Anih, vântirko ân beipui a, a hne tah, A ṭap a, ditsakna a ngên a, Bethel hmuna chun ama a hmu ta a, Chutaka chun a kuomah thu a hril a;

⁵LALPA ngei, Sipaihai Pathien chun; LALPA ti chu a hming a nih.

⁶Chuongchun, nang chun i Pathien tieng ngha la, Lunginsietna le rorêlna hmang la; I Pathiena chun innghat rawp rawh.

⁷Sumdâwngtu a na, a kutah bûkna indik naw a um a, Hlêm ngawt a châk hlak a nih.

⁸Ephraim chun, “Ka hausa takzet el ta a, Kân sukmuk takmeu el ta a nih; Ka sinthaw po poahai hlak chun Keimaa thil suol an hmu ding hlak um dêr lo,” a ti a.

⁹Nisienlakhawm, kei hi Aigupta rama inthawk ta khan, LALPA i Pathien chu ka na; Ruoiṭhe hun lai ang khan puon inah lân chêngtir nâwk ka ti che.

¹⁰Zâwlneihai hmangin thu ka hril hlak a, Inlârnahai ka sukpung a; Zâwlneihai hmangin tekhina ka siem hlak;

¹¹Gilead chu rîtlona a ni naw am a nih? Teplo el an ni annâwm; Gilgala chun bâwngchal an inhlân hlak a. Anih, an maichâmhai chu leilet changkuonga Lung dêng khâwm ang el an nih.

¹²Jakob chu Aram rama chun a tlân hmang a, Israel chun nuhmei man a tuok ta a; Nuhmei man ding chun berâm a vêng a nih.

¹³Zâwlnei hmangin Israel chu Aiguptaa inthawkin LALPAIN a ṭhuoi suok a; Zâwlnei bawk hmang chun a hum bawk a.

¹⁴Ephraim hlak chun a suklungsen nasa êm êm el a, Chuleiin, a thisen insuo chu ama chungah a tla a, A hrilsietna chu ama chungah LALPAIN intlâktir a tih.