Read Hmar HOSEA 2 Bible Online

HOSEA 2 - Hmar bible

HOSEA 2

¹In naupahai kuoma chun, “Ka mihai” ti unla, in farnuhai kuoma chun, “Lunginsietna dawngtu” ti ro.

²In nu hi ngên ro, ngên ro; Ama hi ka nuhmei a ni si naw a. Kei khawm a pasal ka ni nawh; A mit hmua inthawkin a nawchizawr chîng hi pei hmang sienla, A ṭânghai laia inthawkin a uiret chîng hi pei thla raw se.

³Chuong naw chun saruokin siem ka ta, A pieng nia a um angin inumtir ka tih, Thlalêr angin siem ka ta, Ram ṭâwl angin inumtir ka ta, Dangchârin sukhlum ka tih.

⁴A nauhai khawm lainat naw ning, Nawchizawr nauhai an ni si a.

⁵An nu chun nawchi a zawr hlak a, Anni vawntu chu inzâpuiumtakin a um a; Ka bu dâm, ka tui dâm, ka sahmul dâm, Ka pat dâm, ka hriek dâm le, ka dâwn dinghai mi petu, ami hmangaituhai chu hnawt ka tih, a ti a nih.

⁶Chuleiin, ngai ta, i lampui chu hlingin hruk ka ta, Ama dang dingin dai sak ka ta, A lampuihai chu hmu naw nih.

⁷Chun, a dit zâwnghai chu hnawt a ta, Hnawt phâk naw nih. Anni chu zawng a ta, hmu naw nih; Chuongchun, Ka pasal hmasa kuomah kîr nâwk ka tih. Tulai nêk hin kha hma kha ka ta dingin a ṭha lem si, tîng a tih.

⁸Bu dâm, uoin dâm, hriek dâm hi, Tangka ka sukpungpêkhai hi, Rângkachak Baal ta dinga an hmanghai leh; Keima pêk a nih ti a hriet si naw a;

⁹Chuleiin, ka bu chu a hunah, Ka uoin khawm chu a hunah la kîr nâwk ka ta, Ka sahmul le ka pat, a saruok inkhumna ding chu lâkpêk ka tih.

¹⁰Chuongchun, a dit zâwnghai mithmua chun, A saruok zâmaw chu suklang ka tih; Ka kuta inthawk chun tukhawma sansuok naw ni hai.

¹¹A hlimna po po, a ruoiṭhe dâm, a thla thar dâm, A châwlni dâm le a hunbi ruoiṭhehai po po khawm suktâwp vawng ka tih.

¹²A grêp hrui le a theichang kûng, Hieng hi ka dit zâwnghai mi pêk, ka hlaw chu a nih, A ti hlakhai chu sukrêm ka tih. Ramhnuoiah siem ka ta, ramsahaiin fâng an tih.

¹³Riminhnik a rawpêk hlak Baal nihai chu a chungah thung ka ta, Chuong lai chun a nabehai le a în cheinahai chu ân bel a, A dit zâwnghai a pan a, kei a mi theinghil a nih, Ti hi LALPA thu suok a nih.

¹⁴Chuleiin, ngai ta, thlêm ka ta, thlalêrah ṭhuoi ka ta, Bau ṭhatakin ama chu bieng ka ta,

¹⁵Chu chena inthawk chun a grêp huonhai chu pêng ka ta, Akor ruom khawm beiseina kawtkhâr dingin. Chutaka chun a tleirâwl lai nihai le, Aigupta rama inthawka a hung suok ni ang khan dawn a tih.

¹⁶Chun, chu nia chun, LALPA chun a tih, Ka pasal mi tîng i ta, Ka Baal mi ti ta naw ti nih;

¹⁷A baua inthawkin Baal hminghai hi ka lâkhmangpêk ding a ni si a; an hming hi sâm ni ta hrim hrim naw nih.

¹⁸Chu nia chun ramsahai, chunglêng vatehai, hnuoia thilhringhai le an ta dingin thuthlung siem ka ta; thalngulhai, kâwlhnâm dâm le indo nahai hi hnuoia inthawkin sukbohmang ka ta, himtakin inum hmunkhattir ka tih.

¹⁹Kumkhawtluongin ka ta dingin huol tlat ka ti che a, felna dâm, rorêlna dâm, lunginsietna dâm, lainatna dâmin ka ta dingin huol ka ti che.

²⁰Ringumnain huol ka ti che a, chuongchun, LALPA chu hrieng i tih,

²¹Chu ni chun, LALPA chun a tih, Vânhai bieng ka ta, annin hnuoi bieng an tih;

²²Chun, hnuoi chun bu dâm, uoin dâm, hriek dâm bieng an ta; Chun, anni chun Jezreel[1] bieng an tih.

²³Chun, ama chu ka ta dingin hnuoia hin chîng ka ta, Lo-ruhama chu lainat ka ta, Ka mi nilo chu “Ka mi i nih” tîng ka ta, Chun, ama chun, “Ka Pathien i nih,” tîng a tih.